不如我們分開一年，好嗎？: 第十章

「你想追我個女？」

「係，我好鍾意佢。」

「係咁你知唔知道佢有咩興趣？你知唔知道佢鍾意咩？」

「唔知，我淨係知道我鍾意佢。」

「佢有好多嘢都鍾意，不過肯定唔係鍾意你先。過埋今日，唔好再煩住我個女好冇？」



＊＊＊

我整晚也在發這些夢，潛意識一想到明天要見詠琳父親，我就在床上輾轉反側。

其實多想一層，我好像真的不太了解詠琳……

睡覺吧，否則明天沒精打采，詠琳也肯定不會開心。

不知道明天發生什麼事呢？我們會玩得很開心？我們會吵架？我們會進不了場？



但反正現在怎麼想也影響不到明天，還是快點睡覺吧。

但是我越勸自己睡覺，腦子便越反叛地轉得更快，結果我睡了等於沒睡，像殭屍一樣爬了起床，勉強梳洗、吃了少許東西過後，便走到詠琳家樓下。

待會應該怎樣稱呼詠琳爸爸？叫他uncle？叔叔？還是乾脆「你好」便算？他會問我甚麼問題？他會問我為什麼會跟詠琳一起去迪士尼？我又應該……

「唔好意思呀，等咗好耐？」詠琳的聲音打斷了我的思緒。我抬頭一看，只見到詠琳，不見她的爸爸。

「你爸爸呢？」我忍不住問。



她奇怪地看著我。「你識我爸爸？」

「唔係呀。」

「你鍾意咗我爸爸？」

我朝她翻了個白眼，她沒有理會我，繼續說:「你想陪我爸爸定陪我先？」

又來這些令我尷尬的問題。「咁梗係你啦。」

「算你啦，我爸爸去咗攞車，我地一齊行過去啦。」

然後我終於看見她爸爸的廬山真面目……是個普通得不能再普通的上班族。

「上車啦。」他有點冷漠但友善地跟我們說。



「你叫阿明呀可？」詠琳爸爸問我，使我立即緊張起來。

「係呀……」

「詠琳有同我提起過你。」

我立即看看詠琳，她對我微微一笑。

詠琳向他爸爸提起過我，那麼我在詠琳心目中也應該有一點地位吧……？

「暑假有咩做呀？」他再問。

「都係喺屋企睇下書咁……」我如實回答。



「睇書好吖，可以增廣見聞。你讀書可以嘛？」

「不過不失啦。」

「俾啲心機讀書呀，咁樣你將來先至可以做到自己鍾意做嘅嘢，最緊要呢就係要孝順父母……知唔知呀？」他本來是跟我說話的，但很明顯最尾一句是說給詠琳聽，這逗得詠琳哈哈大笑。

「我唔洗你擔心我讀書已經算係咁啦，仲想點喎？」她說。

「你讀書好勁？」我問詠琳。

她奸狡地看著我。「不過不失啦。」

我拿她沒好氣。

車程不算太長，眨眼間我們已經到達。



「唔該晒uncle。」我下車前跟詠琳爸爸說。

「唔使客氣，你哋兩個係玩得開心啲啦！」

世間上有一樣比過山車更驚嚇的東西，就是和暗戀對象的家長談話。幸好，我捱過了。