黑魔后: 結局
晚上6:00
Liz看著下午剛速遞到家的禮盒，陷入了天人交戰。禮盒裏放著公司今季新上市的晚裝，是她最喜歡的款式，只是... 要不要穿呢？總感覺穿上了就會失陷，再無法逃離...
晚上8:15
Caprice靠窗的桌子前，一身白色西裝的Zico為她的女主角拉開座椅。
「你今晚好靚，條裙好襯你。」Zico毫不掩飾眼中的欣賞。
「多謝。」基於說不清道不明的原因，Liz考慮再三之後，終於還是穿上了Zico送過來的裙子... 既然穿上了華麗的晚裝，髮型和妝容也要配合一下，這是為了襯裙而做的悉心打扮，才不關某人的事，哼！
晚餐在靜謐的氣氛下進行，平時舌燦蓮花的Zico竟然很安靜，這讓Liz有點不習慣。
「你係咪有嘢想講？」侍應把最後的碟子拿走後，Liz終於忍不住打破沉默。
Zico深呼吸，鼓起勇氣開口...「我係做Marketing嘅，social係我工作嘅一部分。我知道有陣時太過social會令其他人有錯誤嘅期待。以前讀書嗰陣，有個女仔只係同我傾過兩次計，我讚過佢對眼幾靚，佢就當正自己係我女朋友，見到我同其他女仔傾計就要生要死。嗰次之後我同人social嗰陣就變得好小心。我唔會隨便讚美對方，唔會講踩界嘅話題，小小都唔會。我亦唔會做任何會令人誤會嘅小動作或者同對方有身體接觸，除非...」說話的時候，Zico全程都看著Liz，她沒有漏掉Liz在聽到她說讀書經歷時臉上那一閃而過的羞惱，她大概以為自己在為昨天的事情揶揄她吧...
「一係繼續講，一係埋單。」女皇用她的方式催促著。
「除非係我鍾意嘅人。大半年前，我識咗個女仔。佢嘅五官明明好精緻，偏偏化妝化到自已一臉煞氣，又日日著黑色套裝紮高髻，一副生人勿近嘅樣，身邊啲同事同佢起咗個花名，黑魔后，而佢自己似乎亦都唔介意其他人怕咗佢。但係唔知點解，每次我見到佢自己一個，我都覺得佢好孤單，我好想陪住佢。所以我成日撩佢傾計，我好好奇，除低面具之後嘅佢到底係點嘅樣。終於有一次，我哋一齊去巡舖，我專登攞咗幾條fancy嘅裙俾佢試，估唔到佢竟然肯試，仲願意俾我睇到佢真正嘅模樣。She is more beautiful than I can imagine. 就喺同一日，我仲發現咗佢不為人知嘅另一面。黑魔后嚴厲苛刻嘅外表下竟然有一夥體恤下屬嘅心，我終於明白點解佢啲下屬怕佢但係又撐佢。哩個女仔真係好特別，我發覺自己開始成日都會諗起佢。之後慶功宴，我見到GM係咁斟酒俾佢，我好後悔自己叫佢著casual啲... 如有唔係咁，GM就唔會纏住佢，當時我真係咁樣以為。嗰一刻我覺得自已處於暴走嘅邊緣，就快痴線。我冒住得罪GM嘅危險，將佢上台講嘢嘅環節調咗上嚟，就係唔想佢繼續灌醉個女仔。結果到最後個女仔都係飲醉咗，而我就送咗佢返屋企。佢喺迷迷糊糊之間，同我講咗句嘢，佢話我同佢Daddy一樣，去到邊度都被女人圍住，到處留情...」
「夠喇！」Zico的話還未說完，Liz的臉色已經變得一片蒼白，她撇下Zico，衝出了餐廳。
Zico從餐廳追出來，拉住了她。
「Liz，我同你Daddy唔同，我唔會拈花惹草，我唔會到處留情，我唔會！我只會買咖啡俾你，只會送小禮物俾你，只會同你一個講我覺得你好靚，只會... 鍾意你一個...」Zico的聲音低了下去，她不知道，情緒激動的Liz到底有沒有把她的真心話聽進去...
Liz掙開Zico的手，轉身背對著她。Zico以為她會就此離去，她卻慢慢開了口...「我Daddy好Charm，由後生到結婚到步入中年，無論喺邊個時間段，無論去到邊一度，佢都係所有人目光嘅焦點。但係佢份人生性風流，雖然同媽咪結咗婚，生咗我，佢都無收歛，仍然喺外面拈花惹草。喺我大學畢業嗰年，佢喺外面嘅女人終於忍無可忍，放火燒咗佢架車，佢同媽咪就咁就走咗。係佢嘅花心累死咗媽咪... 係佢！由一開始，媽咪就唔應該愛上佢...」背對著Zico，Liz環抱著自己的雙臂，仰起頭不願讓眼淚流下。
「Liz, I am sorry for what happened.」Zico從後抱住了她，認真的承諾著...「我唔會要你經歷你媽咪經歷過嘅嘢。俾個機會我，我會向你證明，你嘅白武士只會忠於你一個。」
「放手。」果然... 還是不相信嗎... Zico滿心苦澀，慢慢鬆開了手... Liz卻在下一刻轉身抱住了她，柔嫩雙唇壓在她的唇上... 反應過來的Zico再次張開雙臂，緊緊抱住了懷中的人兒，加深了那個吻...
良久...
「你要記住你講過嘅嘢。」被Zico摟在懷中的Liz，雖然氣勢弱了一截，卻還是清楚的說出了自已的要求。
「遵命，女皇大人。講個秘密俾你知...」Zico神神秘秘的湊到Liz耳邊，呼吸輕拂，如願看到美人的耳尖泛起紅霞。
「講啦。」Liz縮起肩膀想要躲開那惱人的呼吸，惹來Zico的輕笑。
「你飲醉咗我送你返屋企嗰晚...」
「唔準講！」Liz俏臉微紅，羞惱的瞪著Zico，大有你夠膽講就死定了的意味。
「Okok我唔講，唔講。」Zico舉起雙手作投降狀，然而正經不過三秒...「其實呢，我唔介意女皇大人強吻我。」
「Zico Yeung，你係咪想死！」
「女皇饒命呀！哈哈哈...」
寒冷的冬夜，彷彿因戀人的打鬧嬉笑而變得溫暖起來...