黑魔后: 鐵三角

「排骨仔！你估我尋晚見到邊個！」電話那頭傳來Kayla興奮的聲音。
「見到邊個呀食肉獸，你啲ONS炮友？」難得放假，Cleo正和她的小徒兒逛驚安殿堂。
「炮你個死人頭！如果係哩啲碎料就唔call你啦！我見到Liz同個B一齊呀，用真樣，係真樣呀！」
「咁爆？！佢哋有無拖手呀？有無kiss呀？」
「我都想知呀，約食飯啦！」
「Okay，照舊你負責買嘢，我負責約，WhatsApp聯絡啦！」


星期日，鐵三角的聚會。





飲飽食醉，又到了摸著酒杯底談心的時段。
「鍾懿，我覺得你今日有啲唔同。」Kayla搖著酒杯，把話題帶到Liz身上。
「我都覺，你好似... 點講呢... 我知喇，你笑多咗！」Cleo一副發現新大陸的樣子。
「點止笑多咗，直頭嘴角含春啦！」Kayla一臉促狹的笑著。
「你兩個扯哂貓尾咁，想講咩呀？」Liz看著眼前一唱一和的兩個人，沒好氣的反了個白眼。
「我尋日咁啱經過PP，又咁啱見到你同個高大又靚仔嘅B一齊喎。點識㗎？講嚟聽吓！」Kayla伸出手撓著Liz，一臉好奇。
「普通同事啫。」Liz總算明白了二人整蠱做怪的原因。
「Kayla話你無化妝，唔係，係無偽裝喎！我記得你講過你唔會喺office啲同事面前現真身，點解佢可以有優待先？」Cleo也拿著酒杯坐到Liz的另一邊，加入戰團。
「 Kayla哩排唔得閒，我要去巡舖。所有人都知我返工係咩樣，所以巡舖嗰陣我通常會用真樣加太陽眼鏡，等佢哋無咁容易認到我，Kayla都知㗎！咁啱嗰日係臨時想落舖睇吓，我又費事返屋企換衫，咪去買過條裙順便執吓個樣囉，就係咁簡單。」Liz有些心虛地避開了重點。
「我見你都試咗好多條裙喎！巡舖求其買條裙就得啦，洗唔洗連little black dress都試埋呀？！同埋佢點睇都唔似係做shop喎！」Kayla挑眉看向Liz，明攞著不會輕易讓她粉飾太平。




「佢係Marketing個MD。」
「即係office嘅同事啦，點解喺人哋面前試咁多條裙先？你平時買衫一向都好知道自己要咩㗎喎！」Cleo也沒打算放過Liz，在Kayla的助攻下，問題繞著繞著又回到了重點。
「試衫之前佢已經估到我返工個樣同真樣唔同，仲挑我機！咁既然佢都已經估到，咪俾佢睇吓囉。」
「乜我哋嘅女皇唔係一向都對挑機視若無睹㗎咩，點解今次咁上心呀？如果係另一個同事估到又同樣地挑你機，你係咪都會俾佢睇？一視同仁？」Kayla繼續步步進逼。
「除咗佢無人夠膽咁做囉。」Liz又再次顧左右而言他。
「唔好借啲意岔開話題。你根本就介意佢點樣睇你，唔想佢個腦入面浄係得你返工個惡樣，你想俾佢知道真正嘅你到底係點嘅樣，係咪？」看到Liz秀眉微蹙的樣子，Cleo知道自己猜對了，最後的問句只是用來要Liz面對自己的心。

在今天之前，Liz隱隱約約也覺得自己那天的行為有些反常，只是她不願多想，直到現在被她們兩個抽絲剝繭的分析下來，難道... 自己真的對那傢夥...