誰是宮鬥冠軍: 二
為著今天被怡嬪侮辱一事，詠棋整夜坐在花園中，一直悶悶不樂的樣子，
「主子，奴婢喺宮外托人買咗你鐘意嘅炸雞啊，同埋奴婢都煲咗一碗涼茶，食完炸雞可以清清熱啊。」
宮女星兒把一桶熱騰騰的炸雞和一碗涼茶放在桌面上。
詠棋二話不説，用手帕拿著炸雞塊，吹一吹，就大大的吃一口。
「主子唔好嬲啦，有傷身體啊。」星兒安慰著。
「唉，以後嘅日子都唔知仲要受幾多委屈。」
「主子喺宮裏面仲有蘇貴人同埋許答應，奴婢相信如果有咩事，佢地都會幫主子你㗎。」
「唉佢地身份都係貴人以下，可以幫到我幾多啊......」
「依家係啫，但如果得皇上寵幸，位份隨時有得升啦，主子你都係啊。」
「唉......皇上願意見我先算啦......」詠棋對宮裏的日子彷彿沒有半點希望。
「一定會㗎！」星兒用肯定的語氣說。
此時詠棋的心有半點欣慰，身邊有一個能給予她力量的奴婢，的確不錯。她寛起心來，賞星兒也一同坐下吃炸雞：「星兒，坐啊，你都試下啲炸雞啦。」
「奴婢不敢。」星兒搖搖頭拒絕說，始終尊卑有別。
「坐啦！就當陪下我傾計！」詠棋拉著星兒要她坐下。
「嗯。」
「啊哈哈哈哈！認真呢？」
「係啊！奴婢親眼見到㗎！」
「頂，好癡線啊，笑死我。」
皇上的坐駕才到達回春堂的宮門，裏頭就傳出女生們談天說地的吵鬧聲，聲如洪鐘。
「究竟係邊啲宮女一啲規矩都冇！咁夜仲嘈亂巴閉！」智琛公公一副不悅的臉孔，決定進去查看並訓斥一番，卻被皇上示意阻止了。
「朕入去親自睇吓。」
「啊......喳。」
踏入回春堂裡，只見花園中間坐著一位小主和一位奴婢正聊得興起，都不曾注意到皇上已在宮門前了。
「皇上，嗰位小主就係羅答應喇，係羅氏詠棋。」
詠棋即使入宮，亦從未一改以往抖腿的習慣。聊得高興，腿也抖得高興，枱面上的那碗涼茶也被抖得水花四濺，沾濕了詠棋的衣裳。一切景象，皇上和他的奴材們都全看眼裡。
「已經身為一個答應，但一啲禮儀都冇，真係冇眼睇。」智琛公公搖搖頭，然後用他的清脆之聲喊：「皇上駕到！」
一切都意料之外，琛公公的一句皇上駕到，把詠棋和星兒嚇得不知所措，一陣慌張後立刻跪了下來，炸雞和雞骨也在手忙腳亂下弄得遍地皆是。
皇上一步步走近詠棋，詠棋就更慌張。第一次面聖，就被皇上看到自己大失儀態。
「係咪懷念宮外嘅小食呢？」皇上看著遍地的炸雞說。
「嬪妾有罪！」
「哈哈哈！何罪之有？」
「嬪妾喺皇上面前失儀，皇上恕罪！」
「你，抬起頭俾朕睇吓。」
詠棋緩緩抬起頭，此時終於看清大家了。詠棋皮膚確實比其他嬪妃黑，可是更多了一份健康活力的感覺，而且有著水汪汪的眼睛，輪廓甚好，皇上喜歡得很。
而皇上俊俏的模樣，精神奕奕的龍袍微微顯著結實的胸肌，瞬間令詠棋臉紅紅，立刻又低下頭。
「冇諗過頭先仲一副爽朗豪氣嘅模樣，依家就變成女兒家怕怕醜醜，哈哈哈！」
「皇...皇上取笑嬪妾。」
皇上向詠棋伸出雙手，並扶了她起身，然後順勢牽着她的手。詠棋臉更紅了，心臟跳得更快。
「扶朕入去坐下。」
「嗯。」
星兒看著他們進入殿𥚃，心裏很是歡喜。看來
主子往後的日子能夠好過了。
————————————
春天朝早的天氣最為舒服清涼，鳥兒在樹上歌唱，用輕快愉悅的聲音來慶祝詠棋的第一次侍寢。
「皇上請慢用。」詠棋在服侍皇上用早膳。
「琴晚仲成隻猛虎咁，今日又成隻小貓咁，真係可愛到叫人疼愛。」
「哼，皇上你又取笑嬪妾。」
「哈哈哈！」皇上先吃一口粥，再說道：「今日晏晝朕難得得閒，你嚟陪下朕去騎下馬啦。」
「下？嬪妾驚啊！」
「琴晚你連一條龍都騎到，何況只係一隻馬？」
「嘻！」詠棋臉露春風，不禁害羞地笑了笑。
「一於咁話！朕晏啲搵人嚟接你。」皇上拍了拍詠棋的肩膊，然後就上早朝了。
「恭送皇上。」
————————————
「姐姐你知唔知琴晚邊個侍寢？」
「點會唔知啊，呢啲唔係秘密啦。」
「真係豬乸都識上樹！今日仲要陪皇上去騎馬，實在太抬舉佢喇！」怡君沒想過那顆黑珍珠終成了皇上手心𥚃的珍珠。
「唉。」瑋程細品一口名茶，然後說：「妹妹你又何必咁在意一個答應呢？佢嘅恩寵唔會及得過你啦。」
「當然！不過佢真係唔配囉！妹妹我收到風，佢嘅行為舉止仲粗魯過啲男人啊。」
「我知你講咩，不過最緊要都係皇上鐘意啫。」
「皇上鐘意，太后都未必鐘意啦。」
此時，怡君靈機一閃。
「唔知太后知道有咁嘅人存在，究竟會點呢？」
「太后討厭毫無儀態之人，咁佢嘅日子肯定唔會好過。」
「咁不如姐姐你去回稟太后，等太后好好教化一下佢啦！」
「唉，唔好搞我啦，我只想平靜渡曰。」瑋程放下那杯茶，然後說：「不過妹妹你去同太后回稟唔係仲好咩？」
「我？」
瑋程點點頭，說：「等太后知道你都有心，願意為後宮嘅事操心，太后對你嘅好感肯定有增無減。」
「謝姐姐指點，妹妹明白喇！」怡君滿心歡喜。「妹妹就先行告退喇！」
「嗯。」
等怡君離開後，瑋程的貼身侍女蓮華忍不住問：「恕奴婢多言，但怡嬪嘅勢越嚟越勁，升妃指日可待，到時仲要同娘娘平起平坐，點解娘娘仲要幫佢？」
「嘿。」瑋程冷笑了一口，說：「太后討厭毫無儀態之人，更討厭興風作浪之人。太后睇任何事都透澈，怡嬪若真係咁做，只係想借太后之手打壓羅答應。太后心裏又能否高興？」
蓮華恍然大悟。
瑋程再接著説：「而且皇上都會知道係邊個向太后稟告，咁皇上又會唔會嫌棄稟告之人呢？」
「娘娘果然聰慧！」