魔獸工作室: 屠城(中)

虛擬世界，暴風要塞。

這是一個堅固、輝煌的軍事建築，從高聳的大門往內望，吊燈照明的過道四通八達，而在王室所在的殿堂處，數十個裝備精良的聯盟玩家簇擁著他們的會長，圍在陣營首領伯瓦爾‧佛塔根的四週，正在激烈爭論。

公會長A(不忿): 「…所以，責任究竟喺邊個身上？大家都知道『無名』盛產『海盜』，四、五個技能互補嘅角色，守喺來往東、西大陸嘅船上面，利用地圖轉移之後會復活嘅BUG，不斷殺人，已經嚴重影響到所有聯盟玩家嘅交通！」
 
『硬頸花園』會長: 「我講過好多次，當初挑起成件事嗰個獵人玩家一早已經畀我哋革除，有問題嘅係嗰班人同佢哋背後工作室嘅遊戲態度，我哋錯喺邊？」
 
公會長B(和和氣氣): 「各位，唔需要追究前因啦，今日齊聚於此，就係為咗團結解決『無名』嘅問題。我哋代表嘅係大眾嘅聲音，只需要持續同客服反映問題，相信佢哋好快就會受到制裁。」
 




公會長C: 「哼，齋等客服做反應有咩用！本公會會號召有時間嘅滿級玩家護衛商船，持續打擊對方氣焰，一定要將佢哋趕出魔獸！」

「叮，本地防務通知，英雄谷受到攻擊」，這時眾人耳邊都響起這則系統提示。

公會長A(不耐煩): 「部落又嚟攻城？前幾次未入到貿易區就屍橫遍野嘅教訓仲未夠？」
 
公會長C: 「小打小鬧啫，大家繼續……」

話未說完，一個硬頸花園的成員騎馬急匆匆地穿進過道，上氣不接下氣的來到眾人面前。





『硬頸花園』成員: 「會長，英雄谷失守！」
 
『硬頸花園』會長: 「咩話？咁快？」
 
『硬頸花園』成員: 「今、今次攻城嘅唔係部落，而係一隻世界BOSS，係末日領主卡扎克，唔知邊個將佢引嚟，守門嘅NPC衛兵已經全軍覆沒！」

■■■■■■

平日聚滿商販的暴風城貿易區，如今遍地都是屍體，比樓房都要高的卡扎克舉著巨劍大開殺戒。鴻漸三人收起座騎，一直往內退，來到運河的橋上。





幽幽(感動): 「畫面好壯觀啊！」
 
弦思(奸笑): 「嘻嘻，估唔到個Game咁有意思。」
(手放嘴邊大喊): 「反抗『無名四十人團』嘅人，今日就係你哋嘅末日，全城嘅新手都會為你哋陪葬！」
 
鴻漸: 「咪搞事啦，弦思。」
(召喚座騎，上馬): 「任務仲未完成，死喺城門嘅聯盟睇嚟唔打算復活，我哋仲要將卡札克拖入主城深處，咁樣清秋佢哋先可以安全帶軍入城！」
 
幽幽: 「宋姐，卡札克屬於中立怪，如果『無名』嘅部落玩家企得太近，會畀卡札克啲技能殺死㗎！」
 
弦思: 「嗯嗯。」

弦思手冒綠光，光織成的葉子飄舞過後，她的寵物狼被復活起來，然後在弦思驅使下向卡札克猛撲過去。