貧民窟走出嚟嘅異能球星 (第一季已完結): 第06章
06
———喺個個都沉醉於首勝嘅歡欣嘅時候，教練鬍鬚佬表示仍然感到不滿，球隊喺比賽發揮唔到練習時嘅一半水準，於是佢將每個人都痛斥一輪，再追加地獄式嘅訓練。
———因為想贏落去，每個球員都咬緊牙關採練。
———「教練，我想變得更強。」新星斑操後對鬍鬚提出。
———「因為馬天尼？定係因為覺得自己有咩不足？」鬍鬚佬摸住條鬚反問。
———「係馬天尼。」新星斑老實回答。
———「哦，咁你籃球員嘅道路只會更加辛苦。馬天尼喺1-4號位都擁有唔錯嘅天賦，而你只有1-2號位嘅潛力，喺1號位嚟講你未來面對嘅障礙非常多，2號位嚟講你必須改變自己嘅打法，你覺得呢？」鬍鬚佬亦直接咁講出新星斑嘅問題。
———「我想交出更華麗嘅數據，我應該向邊一個方向前進？」新星斑問。
———「2號位，得分後衛，呢個位置只會睇重得分能力，但你要表現出場均28+嘅能力，先會引起到球探嘅注意。
———「我知道喇，拜託你指導我成為一個出色嘅得分後衛。」新星斑向鬍鬚佬求助。
———鬍鬚佬喺以前執教嘅高中，指導過一個現役NBA明星級射手Josh Wallance，所以新星斑想喺鬍鬚佬身上學哂所有秘訣，成為籃球巨星。
————於是接住落嚟嘅球隊訓練，由馬天尼改打控球後衛，新星斑打得分後衛，哥連斯打小前。
———馬天尼身材高大，打控球有一定優勢，而且組織性比新星斑果種獨食風格優勝。
———第二場聯賽當日，對手因為太過魚腩，所以AF過中輕鬆取勝，新星斑轉型後拎到全場最高34分6抄截，但助攻得1個。
———馬天尼13分13助攻10籃板8抄截首次拎到大三元數據，Louis都賣力地交出14分10籃板4封阻，侯活全場出手5投5中，高效率拎到10分8籃板。
———馬天尼今場並無使用絕招，佢漸漸覺得自身實力先係關鍵，絕招應該要用喺比賽嘅關鍵時刻絕殺對手。
———另一方面，馬天尼漸漸喜歡上艾瑪，覺得佢無比性感，而且思想越嚟越成熟，佢地關係火速升溫，晚晚交換完禮物再相擁入眠。
———但有時佢同愛米彌亞獨處嘅時候又會小鹿亂撞，有次佢同愛米兩個去附近超市買嘢入貨，離開嘅時候有個賣花嘅妹妹，叫馬天尼買支花送俾女朋友。
———當時馬天尼都係做好心幫吓個妹妹賺10蚊美金，結果個妹妹俾咗支紅玫瑰馬天尼，對愛米彌亞講：「佢真係好好人，將來姐姐妳嫁俾佢一定好幸福快樂。」
———場面又變得非常尷尬，馬天尼拎住支花唔知送好定唔送好，最後都係遞咗俾愛米：「呵呵，我人生第一次送花呀，妳收咗佢啦。」
———愛米笑笑口答：「多謝，咁係咪代表要嫁俾你㗎？」
———「最好係咁啦。噢唔係，啲細路亂嗡講吓笑，唔好當真。」馬天尼唔係果啲口花花嘅人，呢點個個都知。
———愛米忍唔住嘰嘰聲咁笑，拎住支花轉個身就行。
———學校入面馬天尼嘅知名度高咗，吸引咗唔少發花痴嘅女仔走嚟認識馬天尼。
———其中有個幾索嘅拉丁美洲裔一年級四眼妹Nana，身為黑人嘅馬天尼面對Nana嘅搭訕完全係零抗拒，傻更更咁答應同對方交換電話。
———呢件事馬天尼無話過俾人知，但艾瑪就唔知點解會知道咗，嬲到即刻要馬天尼Block咗Nana嘅電話。
———馬天尼卻認為自己都有認識新朋友嘅權利，苦口婆心咁同艾瑪講解同Nana清清白白，結果都係要Block......
———當一向都好狗公嘅Howard聽到艾瑪刪咗Nana嘅聯絡電話事件，表示非常同情馬天尼嘅遭遇，但下一句就問馬天尼攞Nana嘅電話。
———馬天尼答：「食蕉啦你。」
———心入面完全無打算同Nana發展啲咩親密關係，純粹想識多幾個朋友，擴闊下社交圈子，但艾瑪居然搞咁多限制，令馬天尼內心非常不滿。
———果晚開始二人並無再交換禮物，馬天尼晚晚都瞓唔著，有啲唔自然，有啲嬲，有啲失落。
———第三場小組聯賽，艾瑪無去睇馬天尼比賽，比賽開局就陷入苦戰。
———馬天尼表現都差差地，球隊第三節中段落後緊12分，佢好快就俾教練換出場。
———「你又搞邊科呀？」鬍鬚佬直接盤問馬天尼。
———馬天尼又擺出一個心事重重嘅衰樣。
———「光頭！你睇住斑兵！你！同我過去果邊講！」鬍鬚佬嗌光頭助教帶隊，自己拉住馬天尼到場邊傾「戰術」。
———「我俾5分鐘時間解決你嘅問題，到底咩事？」鬍鬚佬非常強勢，喺比緊賽嘅緊要關頭擺低帥印走嚟開解一個球員。
———馬天尼如實稟告鬍鬚佬。
———鬍鬚佬都算好脾氣，你條咸濕仔鑊鑊賓周痕都搵著隊波嚟搞，竟然俾咗個指示馬天尼：「你咪好似講過你想媾愛米嘅？Right？而家你打俾佢，話想佢俾啲力量你，你一陣第四節再落場打爆對面，之後再好好多謝佢，明無？」
———馬天尼心諗：咁絕嘅媾女橋都俾你諗到？
———「快啲入去更衣室打啦！Now！」鬍鬚講完即刻返去接手球隊，好彩分差縮短咗，輸緊11分......
———馬天尼返更衣室，但打咗俾艾瑪...先，同艾瑪講咗句對唔住，艾瑪都消哂氣咁同馬天尼講比賽加油。
———收線之後，馬天尼打埋俾觀眾席上嘅愛米，按照教練嘅指示講咗一次，愛米就表示全家都好擔心馬天尼，佢地每人對馬天尼講咗句加油說話就收咗線。
———「我唔會令你地失望。」馬天尼坐喺更衣室默默低頭自言自語：「我已經有你地，對我嚟講已經好足夠。」
———馬天尼重新返回球場，對第三節完場休息緊嘅球友講：「各位，對唔住，我錯喇，我太唔穩定、太情緒化，但我知錯喇，我地第四節要追返失地。」
———「兄弟，而家輸緊18分喇...」新星Ben出聲：「唔緊要啦，呢場輸咗以我地戰績小組出線機會都幾大。」
———「唔係，唔係，比賽未完我地都唔應該放棄。」馬天尼死心不惜鼓舞隊友。
———哨子聲響起，第四節即將開始，AF高中各個球員都心灰意冷咁再次出場。
———主場白色衫嘅AF高中發球，馬天尼接過Collins開出嚟嘅波即刻帶去前場，然後3分線起跳，投籃，比數追成55:70。
———主場嘅觀眾反應都有啲冷淡，只有零星嘅掌聲。
———馬天尼專心防守，睇準對手一次輕率嘅長傳，飛身抄截，然後快攻，傳失波嘅對手收窄喺內線，但馬天尼喺3分線再次急停起跳，呼。
———58:70。
———對手射失，馬天尼搶到進攻籃板，傳俾新星斑Give and go，新星斑回傳後馬天尼再次3分線急停，引嚟對方起跳攔截，馬天尼佯攻得手，挨身射3分。
———「咇！」
———犯規，3分入網有效，加1個罰球！
———場內一陣哄動，呢個白色27號決心想要推翻呢場比賽。
———馬天尼入埋球罰球，62:70，輸緊8分。
———形勢逆轉，AF高中氣勢如虹，其他隊友重拾鬥志，喺第四節進行大反擊。
———對手俾馬天尼擾亂陣腳，造就新星斑大量空位切入得分，侯活亦針對敵方薄弱嘅內線進行轟炸。
———最後球權喺AF高中，馬天尼拖足23秒再喺超遠距離3分位置跳投，用最後嘅絕招完成絕殺！
———84:82由AF高中完成大逆轉取得勝利。
———雖然新星斑拎咗36分超級閃耀，但馬天尼先至係呢場比賽真正嘅MVP。
———個人打出17分8助攻5籃板4抄截，得分全部嚟自第四節，包括最後絕殺。
———完場後全場AF高中觀眾大叫「MVP」近5分鐘，為21號馬天尼送上一份榮耀。
———校園記者賽後採訪馬天尼，但馬天尼卻回答：「帶領球隊贏波嘅功臣係斑，我只係及時俾教練點醒，努力彌補返頭3節嘅失誤，我唔係一個穩定嘅球員，我必須依賴整個團隊先會打出好表現，Thank you。」
———馬天尼拉住新星斑埋嚟受訪，自己就行返入更衣室，換件衫同屋企人團聚。
———所有人都鍾意馬天尼呢份謙虛，實而不華。
———夜晚新星斑打電話俾馬天尼，講話有條大學球探打嚟講提供大學獎學金嘅事，新星斑向佢推薦咗馬天尼，下場次輪小組有機會親身過嚟睇波，叫馬天尼打握機會。
———馬天尼成晚諗咗好多嘢，若果將籃球視作職業，有幾多人會成功呢？
———但一到夜晚12點，當一個熟悉嘅身影潛入馬天尼間房，馬天尼將所有問題拋諸腦後，因為拆禮物嘅時間到喇。
———「大英雄，有無掛住我先？」瑣好房門，艾瑪用嫵媚嘅聲線問。
———「掛，好掛，掛到仆街。」馬天尼望住除剩條底褲嘅艾瑪。
———「衰人，我要好多好多禮物補數。」艾瑪撲入馬天尼懷抱。