貧民窟走出嚟嘅異能球星 (第一季已完結): 第01章
01
———2088年，美國紐約市內著名貧民窟Bronx，有一個無家可歸嘅黑人男仔叫Martini Akona(馬天尼)。
———無父無母嘅馬天尼因為太大食而俾收養佢嘅舅父一家踢咗出街 ，開始到處流浪。
———馬天尼初時都有去佢相熟嘅同學仔屋企借宿，但每次住唔夠一星期就要過檔，始終果度啲人太窮。
———想食飽飯嘅馬天尼初中都未讀完就輟學去跑散打工，但美國打擊童工太成功，佢基本上都係飽一餐餓一餐。
———結果有一次佢經過一個籃球場見到有班細路賭錢鬥射三分，贏一舖賺幾蚊美金，於是打過吓幾年籃球嘅馬天尼走去同人賭，每日執到少少錢。
———於是馬天尼每晚就會喺Emerson公園搵食，得閒操吓肌、練吓射波、同人鬥吓波、同果度嘅陀地交流吓。
———連續落咗幾日雨，無波打無收入，馬天尼餓到頂唔順，就趁今日好天喺條街度執野食，佢大概知道邊度會有好食啲嘅廚餘飯尾。
———行到Brooklyn Bridge佢見到前面約10米有一個白人金髮女人帶住4個細路行街，結果發生咗一件改變佢生命嘅事。
———金髮女人手推一架BB車再拖住另一個幼童行，另外兩個大啲嘅細路女喺前面邊行邊玩手機。
———一架白色Benz七人車突然跳出一個男人，抱走咗矮啲嘅細路女上車，然後駛走，個金髮女人想衝上前阻止都嚟唔切。
——目睹成件事嘅馬天尼多少都知道發生緊咩事，眼見架車即將駛到自己身邊，佢選擇咗救個女仔。
——用身體攔截起步咗10米嘅七人車，好彩七人車司機及時煞車，馬天尼即時橫移喺車窗拉個司機落車。
——15歲嘅馬天尼身高已經1米70，肌肉發達，拼盡力拉個1米65嘅瘦削男司機出車都唔係咩問題，問題係剛才擄走少女果個壯健啲嘅男人隨即喺側門落車幫拖。
———以一敵二嘅馬天尼俾個壯男打咗兩拳就趴咗喺馬路，壯男即時幫助俾車窗同安全帶卡住嘅司機。
———被擄嘅少女趁機逃走，走咗出車兩步又俾壯男捉返住，兩人掙扎咗一陣馬天尼橫空出現，一腳伸咗個壯男去對面線，又咁啱有架Audi喺對面線駛過撞死咗個壯男。
———身為同黨嘅司機諗都唔諗就開車逃亡，因為佢見到馬天尼用餓狼嘅眼神望住佢。
———後來警察到場，事件搞到半夜先完結。
———警方無起訴馬天尼，但因為無監護人，變咗要由社區保護兒童組介入佢嘅Case。
———而金髮媽媽嘉莉(Kelly Tinsley)非常感激馬天尼，當知道馬天尼係孤兒之後，佢覺得馬天尼係神派落凡間守護佢嘅天使。
———「我可以收養你嗎？你守護咗我一家人，我無法想像我的二女兒艾瑪(Emma Tinsley)被擄走之後的哀傷生活。」嘉莉問道。
———「我只是做我認為對的事，妳的主意讓我感到很驚喜，但我怕我會破壞妳們一家原本美好的生活。」馬天尼嘅思想相對比同齡嘅細路成熟。
———嘉莉叫哂全家過嚟馬天尼面前逐一介紹：「這是長女愛米彌亞(Amelia Tinsley)，這是你剛才所救的艾瑪，這是三女仙蒂(Cindy Tinsley)，這是小兒法蘭奇(Frank Tinsley)。」
———「I am Martini, Nice to meet you all.」馬天尼好禮貌咁介紹自己。
———嘉莉問啲仔女對收養馬天尼有無意見，愛米彌亞同艾瑪都表示同意，其餘果兩個細路太細個無咩反應。
———至於Mr. Tinsley兩年前車禍死咗，無得俾意見。
———最後，嘉莉透過正式向法庭申請，成功收養馬天尼做仔。
———馬天尼因為一場意外挺身而出，同Kelly佢地成為咗一家人，而且衣食無憂，報讀埋一間少有名氣嘅高中重返校園。
———原來馬天尼同艾瑪同年同月同日生，平日喺屋企艾瑪都會痴住馬天尼玩，但馬天尼偏向鍾意同大佢兩年嘅愛米彌亞相處，情竇初開嘅佢應該愛上咗愛米彌亞。
———愛米彌亞喺另一間音樂學校讀書，彈得一手好琴，馬天尼經常會陪愛米彌亞練琴，喺身邊欣賞愛米彌亞彈琴時女神級嘅氣質。
———不過既然成為咗一家人，馬天尼唯有將呢份愛慕收埋喺心底。
———漸漸馬天尼成為咗Tinsley一家最可靠嘅男人，所有粗重野、整水喉電器等事務都攬哂嚟做。
———平時屋企無野幫手馬天尼都會去附近球場打波，雖然而家唔愁伙食，但對於籃球場上嘅賭鬥始終戒唔甩，而且佢發現自己有一種神奇嘅異能。
———佢發現每當置身球場嘅時候，身體就會有種潛伏嘅能量，佢動用呢種能量拋出嘅所有投籃，只要喺投擲嘅力量範圍都必定全部百發百中，每日可以動用3次。
———憑住呢種神奇力量，馬天尼喺球場賭鬥再無輸過錢，每當劣勢嘅時候就出絕招逆轉，用哂3次就收細賭注。
———喺果一帶嘅社區街場，Clutch Shooter成為咗馬天尼嘅稱號。
———又咁啱有個同馬天尼同校嘅學長，名字叫Howard，認得插班入去讀高中一年班嘅馬天尼，於是叫馬天尼去校隊試腳。
———馬天尼從來未接觸過正規籃球，都想試吓體驗校隊生活，想了解自己嘅技術水平。
———當晚Kelly媽媽得悉馬天尼想打校隊當然表示支持，甚至流下眼淚，馬天尼嘅童年太命苦喇，認識咗佢近三個月，第一次聽到佢有目標，係開心嘅。
———見到養母落下高興嘅淚水，馬天尼立定決心要喺球壇發光發亮。