只想和你愛一次: 24. Singing Competition (1)

「你做咩溝我hall 啲 freshman呀?」回到hall不久見Rachel MSN 上線Elven便問道。
 
「咩溝溝聲咁難聽呀... 你估我想搵你hall 個阿傑咩!」看來Rachel心情亦不算太好。
 
「咁係咩事?」這讓Elven來了興趣。
 
「你唔知咩?今年唔知邊個發起攪咗個Interhall Singing Competition，有獨唱同合唱環節，獨唱每間hall要搵一個人參加，合唱每間hall都一定要至少一隊cross-hall咁參加，仲一定要一男一女。獨唱都叫有人主動報名，但合唱無人報咪逼住要抽籤囉，我同你間hall又咁啱一間男hall一間女hall，而你知哩啲嘢實屈year 1㗎啦，結果每人抽一個就抽中我同你hall個阿傑囉... 我唔想唱呀! 點解我咁黑女㗎...」Rachel不滿呻道。
 
「你講開好似有聽過下，不過我完全無理... 咁節哀順便啦~ 所以頭先大家諗住互相認識培養下感情?」Elven想了想依稀記得好像確實是有這一件事。
 




Rachel:「住咁近佢提議出嚟見個面傾下唱咩歌喎...」
 
Elven:「咁有無定案?」
 
「未呀... 佢提議啲歌全部好老土唔想唱... 咩現代愛情故事、明星、甚至倚天屠龍記都講得出!佢係咪真係我個年代㗎...都唔知你地hall收埋啲咩人!」Rachel繼續瘋狂抱怨。
 
「可能屋企人成日要佢聽掛... 咁幾時比?」Elven嘗試幫阿傑想一個合理原因。
 
Rachel:「一個月後...」
 




「噢...加油呀! 我一定會嚟睇你㗎~」Elven一副幸災樂禍的樣子。
 
「Roar!!!」Rachel只能咆哮道。
 
 
 
晚點Ada打電話給Elven。
 
「Honey今日sorry呀...」
 




「好少事啫... 你roommate無嘢嘛?」Elven問道。
 
「同佢傾完計好返啲喇...」接著Ada把阿Yan遇到的問題告訴了Elven。
 
「竟然係咁? 不過佢生得咁靚，又真係好大引誘嘅...」Elven慨歎。
 
「咁係咪引誘到埋你?」Ada聽到後立即追問。
 
「梗係唔係啦，我有你就夠~」Elven出了一身冷汗差點便引火自焚。
 
「你都係男人咁你有無咩意見或者睇法?」Ada想問Elven意見。
 
Elven:「哩啲嘢... 我會明佢男朋友想要係正常，不過就無得逼同埋要識尊重囉...阿 Yan 唔想就唔好為咗取悅男朋友而勉強自己，最緊要佢要肯定男朋友唔係為哩樣嘢而同佢一齊， 唔係我驚佢比人咩咩咩咩咋...」
 
「咩咩咩咩?」Ada一頭霧水。




 
「中出即飛...」Elven很細聲說道。
 
「你地啲男人真係好賤格呀! 唔同你講喇，我再睇下佢點先...」說完便快速收了Elven線。
 
真是躺著也中槍，Elven心裏罵了阿Yan男朋友千百萬次。
 
 
 
經過hall庄的努力加上新一班freshman的加入，Elven三隊球隊已湊足了人數練習，順利建立和參加比賽，而和Rachel合唱的阿傑亦在數星期前加入了游水隊。
 
「咦，阿傑呢?有無人見過佢?」這天練習Elven發覺阿傑缺席。
 
「隊長，佢唔知係咪上次練習冷親依家患咗重感冒發緊高燒，琴晚屋企人接咗佢返屋企休息喇...」其中一個隊友答道。
 




「哦， 咁叫佢好好抖下，希望佢快啲好返啦...」
 
(咦，仲有三日就係歌唱比賽喇喎，咁Rachel點算好? )Elven暗地裏想。
 
 
「喂...阿傑病咗應該參加唔到個比賽喎，你諗住點?」練習完後Elven message了Rachel。
 
「佢今朝同咗我講喇... 我都唔知點算好，問咗committe又唔比棄權，叫我自己睇下搵唔搵到人代佢，唔得佢會叫你地hall再抽一個喎...唉，時間咁急自己搵都有啲難度...」Rachel有點frustrate。
 
Elven:「係咪求其搵個人都得㗎? 搵你hall 啲人代得唔得?」
 
「一定要其他hall嘅人同埋係男性呀...啊! 我突然諗到一個合適人選符合晒所有要求喇!」Rachel諗諗下突然靈機一觸。
 
「邊個咁好彩?」Elven好奇。
 




Rachel:「你囉!」
 
「我? 咪玩啦...」Elven心裏說了聲”奶野，早知唔問...”
 
「你幫我下啦...我唔想再求其搵個唔識嘅人合唱呀，仲要得返三日...」Rachel開始哀求。
 
「我唱歌好難聽㗎...」Elven嘗試推搪。
 
「你扮咩啫! 之前教會聽你唱過歌明明就好好聽，又識彈結他! 你係咪真係咁忍心由我死呀... 嗚嗚...」Rachel一嘢督爆Elven，然後繼續發動可憐攻勢。
 
「唉...好啦咁...」Elven認命知道推不掉，亦不想Rachel那麼可憐。
 
「好嘢! 我就知你一定唔會見死不救㗎喇!」Rachel 像在大海中找到救生圈一樣興奮。
 
Elven:「你地本身唱咩歌?」




 
Rachel:「嗯...最佳位置。」
 
Elven:「咁好彩我都識... 你彈琴我結他?」
 
Rachel:「好!」
 
Elven:「咁我自己練一練先，哩兩晚再抽啲時間出黎大家夾一夾，大後日就一齊去受死啦...」
 
「要死咪一齊死囉，反正我地又唔係未一齊經歷過生死，唔係咩?」Rachel講笑的同時又感覺到有點甜意。
 
「哈哈，You win you win，咁一齊再死多次啦...」Elven無奈道。
 
 
 
和另一個女仔合唱參加歌唱比賽這樣大件事，Elven當然要和Ada備案。
 
「你又英雄救美，又係Rachel喎...」Ada難免有點呷醋。
 
「我都唔想㗎...咁佢又無其他辦法，時間又得返三日唔夠...」Elven一臉無奈的語氣。
 
「哼，你之後要搵日同我去唱K，唱返到我夠為止!」Ada嘗試做一個開明的女朋友。
 
「無問題無問題，都聽你的~」這時候Elven怎敢say no。
 
 
接下來兩天，Elven和Rachel有空時都會嘗試在hall有琴的地方夾下歌，幸好本身Elven都熟悉這首歌所以整體上問題也不大，很快便到了比賽當日。