只想和你愛一次: 19. 命運的牽引?

Elven回到香港後的第一個星期日，他如常返了教會，氣氛亦一切如舊，直至活動完結後他第一次看見了Rachel和Daniel拖手。
 
霎時間Elven感到自己的內心有種錐心之痛，面色變得極其難看，其實就算在原本的世界，Elven也沒有親身見過Daniel和Rachel的親密行為，所以這個視覺衝擊對他影響十分之大。
 
「你無事嘛?」察覺到Elven的異樣，Susan問了句。
 
而這說話亦吸引到走在前面的Daniel和Rachel回頭。
 
「你面色好差喎，係咪唔舒服?」Daniel問道。
 




「突然間有啲唔舒服...我唔同你地食嘢喇，可能返hall抖抖先...」Elven有點中氣不足地說道。
 
Susan:「咁一係我送你返去啦，你面色真係有啲蒼白...」
 
Elven:「唔駛啦，我自己ok㗎喇...」
 
Susan:「唔緊要喎，橫掂我一陣都要過海，順路啫~」
 
Elven:「咁好啦...唔該晒」
 




「唔駛客氣，老實講無咗你我都唔想自己一個做電燈膽~」Susan望了一眼Daniel 和Rachel後說笑道。
 
「點會呀...」還沒習慣的Rachel和Daniel立刻有點面紅。
 
Susan:「好啦，咁我送佢返去，遲啲再見啦，拜拜~」
 
 
小巴上
 
「Elven，老老實實，你係咪見到Rachel到Daniel一齊先唔舒服呀?」不得不讚賞Susan對某些事情是特別細心。




 
「點會呀...痴線㗎咩...」Elven否認。
 
「唔好扮嘢喎，哩幾個月唔好以為我乜都睇唔到，放心啦，我唔會同人講㗎...」Susan死心不息繼續問。
 
「你睇到啲咩呀?」Elven並不意會自己之前有意無意間的行為和表情所以很好奇。
 
「睇到你由第一日識Rachel已經成日偷望佢，睇到你有時會對佢特別好同超溫柔，睇到佢對你嚟講係特別嘅存在~」Susan把早屈在心中多時的觀察連珠炮發。
 
「有無咁誇張呀...」被當眾揭穿Elven有點靦腆不好意思。
 
「可能你自己都唔覺，但真係有囉... 點呀，真係仲要暪我?」Susan追問。
 
「唉... 你可唔可以應承我會保守秘密，之後我講嘅嘢邊個都唔可以講? 包括Rachel同Ada...」或者Elven亦需要一個傾訴對像去講出現在自己的古怪現像。
 




「好~」Susan當然答應。
 
「其實唔知點解由我第一眼見Rachel開始，我就有種好特別好熟悉嘅感覺，好似我之前已經識咗佢好耐咁，而且仲好似有一種好特別嘅感情。 而隨著大家越來越熟絡，同佢相處嗰種舒服同自然，更加係我之前從未同第二個人試過... 所以你講得啱，對佢我係真係有種好特別嘅感覺，解釋唔到點解...」Elven緩緩說出屈藏已久的心底話。
 
Susan聽完後很驚訝，甚至她真的開始相信這世界上是有前世今生，Rachel一個人自己有這感覺可以是神經反常，但若果連Elven也有相同感覺，那唯一能解釋得就只有他們二人真的有某種關連存在，不過這實在太匪夷所思了...
 
「所以你鍾意佢?」Susan問道。
 
「唔係， 只係有種特別好感啫，係鍾意我就唔會幫Daniel手啦，而且我仲好鍾意Ada㗎，不過我都唔知點解見到佢地一齊個心就好似好唔舒服咁... 有時我覺得我好似有另一個人格，有啲負面感情係由佢而嚟...」Elven還想起那次在英國對Ada所做的失常行為。
 
「你越講越恐怖咁... 駛唔駛睇下醫生?」若果是早兩星期Rachel還沒有和Daniel一齊，Susan或許會把Rachel的感受和心意告訴Elven，作個猛烈助攻。但現在既然Rachel已經有Daniel，Ada又因為Elven而回來香港，那她實在不應該再節外生枝，而且她相信若果命運真的要把兩人連在一齊，那將來必定會有某個契機出現，而她現在只需食住花生靜待那刻的來臨便可。
 
「哈哈，我講下笑啫~」Elven自己也覺得有點可怕，所以決定說笑帶過，以免造成不安。
 
「咦，你依家面色好返好多好似無晒事喇喎?」Susan發現Elven已不自覺間完全回復正常。




 
「嗯，感覺無晒事喇~」經Susan提醒Elven亦發現自己已經再沒不適。
 
「果然係眼不見就無事~」Susan調笑Elven道。
 
「唔好再講我喇，不如講下你啦~ 依家有幾多追求者呀?」Elven決定轉移話題。
 
「唔話你聽~」Susan怎會好意思把這些事告訴自己的夢中情人。
 
「其實我一直好好奇，以你條件點解會一直無拍拖? 係咪你要求太高呀?」Elven乘勢問道。
 
「你覺得我條件好好?」Elven的說話讓Susan有少少開心。
 
「好呀，靚女性格又爽朗， 應該好多男仔鍾意哩type㗎喎~」Elven坦白說出自己對Susan的觀感。
 




「咁點解嗰陣你又鍾意Ada唔鍾意我?」Susan問出這麼多年來一直想問的問題。
 
「呀...因為我第一眼係見到Ada先囉...」Elven終於明白甚麼是搬石頭砸自己的腳...
 
「即係如果你係見到我先就會追我?」Susan不放過機會繼續追問。
 
「無發生嘅事我又點答你呢?」Elven真的不知該如何作答。
 
「算啦，係你眼中只係得Ada同Rachel，點會有我呀...」Susan細細聲自嘲道。
 
「唔好諗咁多啦，我可以肯定你對好多男仔都有吸引力，你睇嗰陣阿Paul幾迷戀你呀~」Elven再度努力轉移視線。
 
(係囉...如果嗰陣唔係因為你而接受咗阿Paul，唔知依家又會點呢?) Susan心裏卻默默在想。
 
 




回到hall後，Elven繼續思考著為何自己有那樣古怪的感覺。
 
(會唔會以後唔再返教會好啲呢? 次次見到佢地都唔舒服，遲早穿煲㗎喎... 嗯，為咗唔好比自己諗咁多嘢，或者我都應該要搵啲寄託，下定決心為hall同自己做返啲想做好耐嘅嘢喇!)
 
就這樣，Elven開始思考如何籌備和組建在原本世界曾經是他一切的三隊球隊。Elven覺得作為一間男hall，沒有Sports Teams實在太不像話，他很想為hall建立更多屬於自己的文化和價值。
 
“召人
 
游水隊
籃球隊
足球隊
 
作為男人，有手有腳的你仲諗啲咩?
快啲加入一齊稱霸Inter-Hall啦!”
 
很快，一張Poster便被貼在C-hall門口的報告欄上。