只想和你愛一次: 第二部 1. 被遺忘的故事(一)
嘟嘟…嘟嘟…
「Judy?」
「喂，Ada，你知道Elven…」聽見對方接聽，Judy緩緩說道。
「嗯…」聽見Elven的名字，Ada知道Judy想說甚麼便立刻回應阻止Judy繼續說下去。
Judy:「你得閒可唔可以過一過嚟我屋企? 有啲野我想比返你…」
Ada:「… 同佢有關?」
Judy:「係…」
Ada:「好… 我依家過嚟。」
雖然大家都已經畢業投身了社會一段時間，不過Ada 和Judy還是十分友要好的朋友，不時都會相約見面。
“叮噹”
「咁快嚟到嘅?」
Judy打開門，看見了雙眼仍帶點紅腫明顯是剛哭過的Ada說道。
「今日放假喺屋企本身都無咩做咪直接過嚟囉…」Ada稍為解釋，但實情是因為心情低落所以她臨時向公司請了urgent leave。
「你喺梳化坐低等我一陣啦。」說完Judy便走入士多房，然後很快拿出了一個大紙箱。
「本身我以為依世應該都唔會有交哩箱嘢比你嘅一日，甚至我自己本身都已經忘記咗佢地嘅存在，不過依家… 我估物歸原主會比較適合，而且我覺得應該要比你知道佢曾經為你做過啲咩…」Judy帶點傷感地說。
Ada接過紙箱，凝望了它好一陣子，然後終於下定決心把它打開。映入眼廉，是一大堆信件和六個正方型紙盒。
「個傻仔嗰陣每日都會寄一封信同摺一朵花比你，足足寄咗600日，佢先終於肯正式接受你永遠唔會再返去佢身邊哩個事實… 啲花我費事”散修修”就幫佢用紙盒入好咗…」說到這裏Judy忍不住聲音開始略帶點沙啞。
「佢真係好傻…」撫摸著一封又一封的信件，Ada像是說給Judy聽，又像是說給自己聽。
把整個紙箱帶了回家，Ada望著紙箱發了一會呆後終於鼓起勇氣開始打開了藏在最底層的一封信。
“沒有Ada的日子 第1日 雨
親愛的Ada,
如果你睇到哩封信，唔知係咪代表你已經返左嚟我身邊呢? 一定係嘅! 唔係你應該永遠唔會知有哩封信嘅存在…
我諗過喇，因為之前我同你太少溝通成日冷落咗你，所以我決定咗以後每一日都會寫封信比你話比你知我嗰日發生過啲咩事~ 而且我咁耐以嚟都無咩送過花比你，所以以後每一日我都會摺一朵比你，等佢盛載著我嗰日對你嘅思念…
好希望將來有一日我地可以復合，然後我可以攬住你同你一齊睇返我寫比你嘅每一封信，到時一定好浪漫啫! 唔知最後會有幾多封呢? 希望越少越好啦，因為越少代表住我地越快就喺返埋一齊~
你依家應該已經搭緊飛機返英國了，估唔到突然間我會變到連送你機嘅資格都無咗… 諗返上一次送你機，我終於明白點解嗰次我地感覺都好似特別唔捨得咁，或者係因為大家一早心入面已經有不安嘅預感?
到依家，其實我都仲完全未接受到你已經離開咗我哩個事實… 如果哩個殘酷嘅現實只係夢，我可唔可以快啲醒? 哩個幾月，我不時都會回想返由我地相識到相戀嘅一點一滴，彷彿係一個好長嘅故事… 你記唔記得我地第一次嘅交談係點發生?”
看到這裏，Ada的眼淚已經再制止不住又流了下來，她亦開始回想起專屬於自己和Elven的故事。
在中一那年的水運會
「我依家宣佈，第56屆XX中學水運會丙組全場總冠軍係 – 中一B班嘅黃天佑! 」
隨著體育主任宣佈成績，周邊的同學亦開始起哄。
「嘩 ，原來Elven游水咁勁㗎，中一已經打低晒中二三啲師兄拎全場總冠軍!」
「你睇佢又高大又靚仔運動又叻!」
「佢仲要讀書都好叻仲有玩音樂… 點解上天咁唔公平㗎…」
對於比較活在自己圈子的我，那是我第一次聽見Elven這個名字，那時我只知道你是一個集外形、讀書、運動、音樂天賦於一身的男人，是自己中學裏的一顆新星。
到到中二，我順利進入了精英班，很自然和你成為了同班同學。坦白說，開學第一天，雖然我知班上有這一號的人物存在，但那時我並沒有特別留意你，只是照常活在自己的圈子裏。不過那天當我回到家打開ICQ，卻發現有一個叫 ”天涯浪客”的不知明人仕加了我contact。
「你好，我係Elven Wong呀，應該係你同班同學，你係?」
(Elven? 係佢?) 我心裏想。
「咁好笑嘅你? 唔知我係邊個又add我?」然後我好奇回應道。
Elven: 「係呀，我想add晒全班嘅同學所以周圍問人拎contact，但又唔知係邊個打邊個喎，結果咪每個都要咁問囉…」
我:「icic… 我係鄧詠欣 Ada呀，nice to meet you~」
Elven:「oh! 我記得你係坐我右邊隔黎後一個位嗰個女仔!」
我:「haha，好似係掛，sorry我都無特別留意附近邊個打邊個呀。」
Elven:「唔緊要，係我太唐突啫~ 係呢，之前未見過你，你上年讀邊班㗎?」
我們就是這樣互相認識了對方，自此每一天你一見我online都會hi下我和我傾偈。