只想和你愛一次: 48. 改變了的軌跡
沒有了偷吻事件的發生，讓Elven和Rachel的關係能保持友好之餘亦進入了一個未知的全新領域，也讓Elven知道了Rachel這五年本身對他是近乎空白的很多事。
Rachel畢業後再讀了一年碩士然後加入了一間上市公司做management trainee，而她男朋友則自己開辦了一間以大自然體驗為主旨的活動中心。離開了hall後由於生活回歸正常，她們相處的時間多了，大家的生活圈子也再次接近了，所以一路上都再沒甚麼大爭執，感情十分穩定。
Elven和Rachel則繼續這好朋友的關係，不時會互相message告訴大家自己發生的事，大概每一個月也會出來吃一次飯互相見面。
相比起之前斷絕了來往，縱使Elven現在感覺還是不太好受，但對比之前已經好了很多。
以前沒經歷過失去，他以為抽身自己會比較好過，但經歷了那沒有靈魂的五年，他知道他寧願選擇現在這種幸福與痛苦的雜燴。他寄望只要繼續加深大家的關係，等待著四年後她們感情變淡分手的一刻，那大概是他最有可能的機會。
轉眼間一年多又過去，Elven憑著自己極強的儲錢能力，買了一個小單位搬了出來成為自住巴。而不知是有心還是無意，他選址的地方和Rachel屋企只有一站之遙，這無疑讓他們更容易相約見面。
「下星期搵晚食飯?」這日Elven text Rachel問道。
Rachel: 「下星期唔得呀，去咗旅行~」
Elven: 「咁開心? 同男朋友?」
Rachel: 「係呀，去日本~」
Elven: 「真係幸福!」
這對Rachel而言是幸福，但對Elven而言卻是折磨。每次聽到Rachel說和男朋友去旅行，Elven那段時間的心情也會十分低落。雖然知道這是理所當然無可避免，但只要一想起Rachel和第二個男仔朝夕相對，晚上互相相擁而睡，Elven的心就不停在滴血。
為了平伏情緒，這段時間通常他會把自己的schedule排滿，不讓自己有太多時間靜心思考。有晚他約了大學hallmates打籃球，但因為情緒不穩有點發了瘋般想發泄，結果在一次剷籃中落地拗柴，而且因腳掌碰巧夾在對手們的兩隻腳中間沒有緩衝，清脆的骨裂聲讓Elven知道這次真的仆街了...
被送到急症室照了X光，發現腳腕有碎骨需要打石膏三星期，之後還要配戴高達腳固定再加復健三個月。
「返嚟喇! 搵日嚟搵你食飯順便比份cheap cheap手信你呀~」Rachel回港後不久便text了Elven。
「咁好? 好唔好玩呀? 不過我估我短期內都出唔到嚟見你喇…」Elven半躺在床上回覆Rachel。
Rachel: 「?? 點解??」
Elven: 「我跛咗依家隻腳打緊石膏呀🥲 (苦笑)」
Rachel: 「!!!咁嚴重? 點整親㗎?」
Elven: 「前幾日打波拗柴呀…」
Rachel: 「咁唔小心呀... 你自己一個住喎，咁咪好唔方便?」
Elven: 「有兩支嗰啲扶手棍其實都行到幾步嘅，有時都會落樓下買嘢食同補給下物資...」
Rachel: 「真係慘… 叫咗你快啲搵返個女朋友咁咪可以有人照顧你囉!」
Elven: 「無法啦，無人肯要~」
(你明唔明我想要嘅女朋友就只有你咋…)
Rachel: 「你要求高啫~ 咁我聽晚放工過嚟探下你啦，你唔駛落街買嘢食喇。」
Elven: 「好呀~」
翼日
“叮噹”
Elven慢慢走到門前一開門便看見Rachel，兩隻手各自拿著一大袋東西。
「知你無啖好食，所以專登買咗餸上嚟煮比你食呀，仲有啲杯麵零食等你唔駛成日落街~」Rachel笑住講道。
「多謝你呀… 都係徒弟仔最錫師傅~」Elven一臉感動說道。
「睇落你真係好嚴重喎…話時話，雖然知你住哩頭，但我都係第一次上嚟，幾骨子喎哩度都~」Rachel入屋放下東西後左望右望審視了一會後便說道。
「係呀，都幾好住，有用心設計過㗎嘛，以後得閒咪上嚟坐下，順便煮吓野比我食囉~」Elven笑著說。
Rachel: 「哈哈，諗下啦，再係咁我都驚你變獨居老人，你駛唔駛裝返個平安鐘呀?」
「可能都真係要…」Elven裝作認真思考的樣子。
「傻佬! 坐低休息陣啦，好快有得食~」令Rachel忍不住笑了一笑。
望著Rachel在廚房為自己準備晚飯，Elven有一種幸福到要死掉的感覺，突然間，他覺得原來斷腳了也不是甚麼壞事呀?
不久，兩碗熱辣辣的蕃茄牛肉麵加一碟清菜出現在桌子上。
「嘩，好似好好食咁喎!」望著桌上Rachel為自己精心準備的晚餐，Elven兩眼發光一臉興奮地說。
「都係求其整咋，兩個人好似都唔食得多，又唔知你廚房有啲咩，快啲試下啦~」Rachel則好像有點不滿自己今晚的水平同時又有點期待說道。
「真係好好味呀!」夾了一注麵入口，那種幸福的暖流直入Elven心扉，若不是Rachel在旁，Elven可能已經哭起來了。
「真係? 我係咪都算入得廳堂呢~」看見Elven一臉滿足的樣子，Rachel像鬆了口氣然後帶點自滿笑著問。
Elven: 「無得頂! 突然間覺得你男朋友好幸福呀…」(其實係一直都覺得你男朋友好幸福唔知佢上世做咗咩好事…)
「如果佢都好似你咁諗就好了…」Rachel的笑容突然僵了一僵，然後說道。
「做咩呀? 旅行發生咗啲事?」察覺到Rachel的異常Elven立即問。
「又唔係，只不過有時覺得大家好似都淡咗，感覺同以前有啲唔同…」Rachel的臉上掛上了點憂心。
「咁哩啲時間每段情侶都會經歷過嘅，捱過就無事㗎喇~」Elven安慰道。
「希望啦… 算啦，唔好講佢喇，我仲買咗雪糕一陣有甜品食呀~」很快Rachel便換了另一臉孔有回笑容說。
「咁正? 不如你以後晚晚都上嚟啦，最多我比返鐘點錢你呀~」這刻不用雪糕Elven已經感受到甜味。
「你就想! 當我工人呀?」Rachel不依道。
吵吵鬧鬧了一輪，Rachel洗完碗後便拿了兩盒雪糕坐到正在看電視的Elven旁邊打算和他一起享用。
「其實你有無諗過養返隻寵物唔駛一個人咁悶?」揭開蓋子吃了一口後Rachel見電視正播放著一個寵物節目便問。
「唔會喇，我自己又要返工，成日留佢喺屋企實悶死佢呀，同埋我好驚有咗感情後又要經歷生離死別，始終佢地就算好彩都係得十幾年命仔…」Elven搖頭答道。
Rachel: 「咁都係嘅…」
「不過你講開寵物，講樣你實估唔到嘅野你聽呀，其實我好細個嗢陣都算有養過寵物~細個嗰陣我係住喺鄉郊地區，然後有日我地見到有隻牛BB 喺屋企附近受咗傷又無咗牛媽咪，於是我地就帶咗佢返屋企包紥仲照顧咗佢一段時間。不過之後因為要搬出市區，所以就被逼放生咗佢lu…」Elven邊回憶邊說道。
「嘩，養牛都真係幾特別，你可以去做農夫喎!」Rachel讚嘆道。
Elven: 「係呀…仲襯返我金牛座添~」
「咩喎… 係呢，你有無聽過打石膏嘅人比人探完要要求探自己嘅人喺上面簽名唔係唔會好返?」這時看見Elven腳上的石膏Rachel突然笑笑口對Elven說。
「哈，你想簽咪隨便簽，畫幅畫都仲得呀~」Elven說完便立即把腳放到一張椅子上。
「哈哈，好嘢~」說完Rachel便拿了一支筆開始在Elven腳上的石膏寫作起來。
“早日康復唔好再整親
徒弟仔到此一遊 😝”
旁邊Rachel還畫了一個很大以前MSN他們會常常用的一個招積表情符號。
「攪掂!」Rachel畫完蓋上了筆一臉童心未泯的樣子。
「小姐你貴庚呀?仲成個細路仔咁…」看見Rachel的樣子Elven沒好氣說道。
「咩啫，做人間中係要低B下㗎啦，唔係好易老㗎~ 好啦，我差唔多要走喇，遲啲得閒再黎探你哩個傷殘人仕啦~」望了望錶見時間不早Rachel便說。
「一定要呀，辛苦晒~」縱使不捨Elven仍得裝作自然。
接著三星期Rachel每星期也會上來一天照顧Elven，這讓Elven差點便決定要再扑碎自己腿骨一次好等Rachel能繼續照顧自己。
在折石膏的時候，Elven還特意叫師傅保留了Rachel寫字的一部份，然後俏俏把它帶回了家中藏起來。