只想和你愛一次: 17. 閒談

「恭喜你呀！你游水嗰陣真係好有型~ 接力最後果棒我睇到都覺得好緊張！」這晚Rachel主動MSN Elven。
 
「你有嚟睇? 其實都無咩值得恭喜呀，我地最後都係輸咗… 只係叫最後可以拎返少少安慰獎啫，我嘅夢想實現唔到了…」Elven有點意外從沒想過Rachel會有來觀看比賽。
 
Rachel:「有呀，咁我都要嚟支持下自己hall嘛~ 你指嘅夢想係咩?」
 
Elven:「以前我地學校喺學屆D2贏左，全部人都會跳晒落泳池慶祝好開心架…所以今年我好想贏然後同全hall人一齊跳晒落泳池染橙個泳池（橙色係C-hall嘅顏色）…」
 
Rachel: 「好青春熱血呀! 不過你要求都好高啫，人地個個u team，邊有可能贏呀…」
 




Elven:「雖然好矛盾，但我成日覺得如果目標一定要覺得到做到先去訂立，我地其實永遠都唔會知道自己嘅極限可以去到邊，永遠唔會超越到自己。一個人最後去到的高度，其實好取決於佢一開始為自己訂立咩高度。 Aim high and you will reach high，如果我一開始只求拎第三，今日好可能連第三都無，所以你對自己嘅目標都要set得高啲呀。」
 
Rachel: 「知道！哈， 你好似嗰啲智慧老人咁~」
 
Elven:「係呀， 世外高人嚟㗎， 駛唔駛拜我為師?」
 
Rachel: 「師傅飲茶 ☕! 請受徒兒一拜~」
 
Elven:「徒兒乖~」
 




Rachel: 「師傅， 我地都就快開始比賽喇， Team cap話因為另一個隊友會去exchange，所以我好大機會打正選，好大壓力呀 ><」
 
Elven:「將壓力變為動力比啲火出黎！我有問過Jacky，佢覺得你ok㗎。」
 
Rachel:「真係㗎?多謝你呀！🔥🔥🔥」
 
Elven:「駛咩多謝呀，加油啦，唔好好似我咁又有遺憾呀...」
 
Rachel:「其實我覺得你真係好叻㗎， 喺你面前我成日就好似個細路女咁… 唔好灰心啦 ，嚟緊仲有兩隊靠你帶領㗎!」
 




Elven:「咁係因為你未了解我啫，聽聞你讀書都好勁， 10A拔尖上嚟㗎喎~」
 
Rachel: 「好彩啫… 咪住！點解你會知㗎? Susan講你聽?」
 
Elven:「唔係佢仲有邊個?」
 
Rachel:「可惡！唔得，你都要話返個秘密我聽！」
 
Elven: 「我無咩秘密㗎喎…」
 
Rachel:「我唔信！衣個世界邊有人無秘密㗎!」
 
Elven:「好啦，如果你有得出場又贏到第一場我就講個大秘密你聽啦~」
 
Rachel:「你話㗎，一言為定！」