【全劇終】《我喺街執咗個失憶嘅女仔返屋企》: 繁星祭篇：今年想特別一點（上）

繁星祭係學校一年一度嘅開放日。
 
每個班別都要籌組一個活動，然後喺當日展示出成果。
 
以往我地都係喺課室求其擺啲展覽板就算，畢竟會嚟嘅街外人只係啲準備畢業嘅小學生同佢地嘅家長，又或者係校友，其餘嘅都係呢間學校嘅老師同學生。
 
換個講法，所謂嘅開放日，其實更加似俾圍內人自high嘅一個活動。
 
不過，學校俾我地嘅自由度相對地大，幾乎冇咩限制，只要諗到嘅都可以整出嚟，抄足日本人嘅文化祭都仲得，見過整章魚燒攤檔嘅又有，整室內過山車嘅又有…
 




而今年，我想將繁星祭當成同小悠嘅最後道別。
 
所以，一定要諗樣特別啲嘅嘢。
 
「冇問題嘅話，我地5E班一於同上年一樣，繼續整課室展覽板！」作為班會主持人嘅Miss宣佈，睇個樣好似想快啲決定咗佢。 
 
每年繁星祭前夕，各班都會召開班會商討嚟緊籌組嘅活動，然後揀兩個掛名嘅班級委員出嚟，負責統籌班上嘅工作。
 
「然後，冇異議嘅話，今年嘅班級委員就繼續由…」Ｍiss將目光投向男女班長，基本上每年嘅班級委員都會由佢地去兼任，盡顯本班頹風。
 




但係，今年絕對唔可以頹。
 
於是，喺Miss將說話接落去嘅前一秒，我將手舉得直一直：「搣時！我有異議！」
 
但發出嚟嘅聲線居然同另一把聲音重疊。
 
我望向聲音來源，只係望到正同我做出一模一樣動作嘅小悠——將手舉得直一直，然後帶疑惑咁望向我呢邊。
 
「兩位高同學，你地有咩異議？」Ｍiss問。
 




我向小悠遞手，示意俾佢講先。
 
小悠重新將目光放到黑板前方嘅Miss：「我覺得我地應該諗個特別啲嘅活動，唔好淨係擺展板咁死氣沉沉！」
 
我暗地叫好。估唔到小悠同我嘅想法不謀而合。
 
「例如呢？」miss問。
 
「例如…開甜品店！或者賣珍珠奶茶！」
 
「唔…」miss陷入思考狀，然後問我，「咁你呢？」
 
「…我覺得小悠講得啱，我地下年都畢業，以後冇咩機會再參加繁星祭。」
 
「咁其他人覺得呢？」




 
班房內一片寧靜，直到有人出聲：「miss，都係唔好搞咁多嘢啦，求其整幾塊board咪算囉。」
 
「但係…」小悠想反駁，但其他人中斷咗佢：
 
「小悠，你要好玩嘅話，都係玩人地班嗰啲算啦，無謂搞到自己咁辛苦…」
 
小悠冇再講啲咩，個樣有啲唔開心。
 
喺我準備出聲之前，miss拍拍手：「既然大家意見唔同，有人想簡單啲，有人想特別啲，咁今年嘅班級委員就由高田帆同小悠你地兩個做，如果你地有咩活動想搞嘅就自己同班上嘅其他人協調，得唔得？」
 
「嗯！」小悠好快答應，然後將視線瞥向我。
 
我趕快應道：「…知道搣時。」
 




我計過，小悠起程嘅日子係繁星祭完結嘅當晚。
 
而距離繁星祭仲有21日。
 
我同小悠喺呢一日成為咗班級委員。