【全劇終】《我喺街執咗個失憶嘅女仔返屋企》: 道別的方式（下）

然後，又係一如以往嘅上學日。
 
小息嗰陣搵勻都唔見張廷宇，一問之下先知佢去咗家政室整餅。
 
望住佢嗰堆唔成形嘅麵粉，我忍唔住問：「你做緊咩？」
 
「學整蛋糕囉。」佢輕掃一下臉，麵粉隨即留下白痕。
 
「芝芝唔係烘焙學會架咩？你仲要學整蛋糕？叫佢整俾你咪得囉。」
 




「唔關芝芝事，我係整俾小悠架。」
 
「…小悠？」
 
張廷宇岳高頭，開始自言自語：「以而家呢個進度，應該聖誕節就趕得切送俾佢…」
 
我暗地嘆氣。
 
要出發去旅行嘅事，小悠或者仲未向其他人提過。
 




如果係張廷宇嘅話，應該可以講嘅——咁諗嘅同時，我準備開口：「我有樣嘢要講俾你聽，就係到聖誕節嗰陣，小悠已經…」
 
點知我未講完，張廷宇就幫我接落去：「離開咗呢度，去到一個叫做敍爾特嘅小島吖嘛。」
 
「你一早知道？！」
 
「係呀，嗰日佢自己同我講嘅。」
 
呢個時候，班主任Miss入嚟：「張廷宇，我明明叫你小息嚟搵我吖嘛…咦，你整緊蛋糕俾小悠呀？」
 




「係呀Miss 。」
 
「但係要將個蛋糕送去歐洲，會唔會好麻煩架…」Miss低語。
 
我大驚：「連Miss都知道？！」
 
「你講小悠要走嘅事？我緊係知道啦，佢之前親口同我講嘅。」
 
…我潛意識以為，小悠淨係講咗俾我聽，頂路講埋俾芝芝聽，但睇嚟事實唔係咁。
 
不過諗落又係，我又唔係小悠邊個，根本冇必要淨係講我聽。
 
諗到呢度，一陣羞恥感從腳到頭湧現——我一定係以為自己係咩特別嘅存在，至會認為小悠淨係會同我講。
 
我跑出家政室，見人就捉住佢嚟問：「你知唔知小悠要走嘅事？」




 
…理由大概係想同內心嘅羞恥感抗衡。
 
「小悠要走？我梗係知啦，我仲約佢臨走之前打排球。」第一個遇到嘅係許正峰，佢一臉爽朗地回答。
 
「雖然佢嘅去留本身唔關我事，但身為學生會成員，要了解全校學生狀況，所以你覺得我會唔知咩？」第二個遇到嘅係駱以雪，佢咁樣同我講。
 
「嗯，師母走咗之後就冇人再教我整蛋糕…」第三個遇到嘅係唐夕嵐，佢一臉落寞咁講。（後來佢同我解釋，呢個令人吐血嘅稱呼係小悠教佢整蛋糕而得嚟）
 
「嗚哇哇哇哇哇哇哇——」最後，係杜朋也。我問都未問完，只係提到小悠兩個字，佢就喊到豬頭咁，睇個樣佢都知道小悠要走嘅事。
 
與此同時，電話傳來訊息嘅聲音。
 
係阿妹。
 




頭先喺家政室跑出嚟之後，我喺電話問佢知唔知小悠要走。
 
「小悠講咗俾我知喇，嗰陣我同千惠咁啱喺街撞到佢，佢好開心咁同我地講咗。」呢個係阿妹嘅回覆。
 
連千惠都知…我好奇，究竟有冇人係唔知。
 
「喂，阿飯！」張廷宇追咗出嚟，「你跑咗去邊呀？我諗過喇，整蛋糕真係好L柒難…」
 
「你又話想聖誕節寄俾小悠做禮物？」
 
「係，不過學唔好嘅話到時咪仲衰，所以我喺度諗，有冇其他方法代替…其實主要想多謝佢呢個學年帶俾我咁多歡樂回憶啫。」
 
歡樂回憶…
 
「阿飯？」




 
腦海裏閃現剛才一張張嘅臉孔，仲有5E班嘅每一個人，包括Miss …
 
我拍拍張廷宇膊頭：「多謝你，我好似諗到啲嘢！」
 
「諗到啲嘢？」
 
「嗯，你講得啱，小悠真係帶咗好多回憶俾我地，會咁樣諗嘅一定唔只得我地兩個。」
 
「…即係點呀？」
 
所以，我都要幫佢創造回憶。
 
我望向走廊嘅壁報板，上面貼住嘅係一張大型海報。
 




「學期完結前嘅最後一個活動，亦都係小悠喺呢間學校嘅最後一個回憶。」
 
每年都會搞，但搞嚟冇乜意義。
 
但今年，終於有唔同。
 
由學生會主辦嘅盛宴——繁星祭。（又名開放日）