【全劇終】《我喺街執咗個失憶嘅女仔返屋企》: 休比篇：運動會（七）

賽場上嘅選手準備得七七八八。
 
裁判一聲令下，我地站到起跑線上。
 
同今朝親子接力賽一樣，羅凱撒再次被分到我旁邊嘅賽道：
 
「睇你咁有鬥智，今次又係為咗邊個？」
 
我一邊作最後嘅熱身運動：「為咗5E班30個人。」
 




仲有小悠。
 
羅凱撒將眼鏡一托：「哼，有意思。」
 
然後佢遠望喺賽道旁觀戰嘅小悠，再回頭補多句：「祝你好運。」
 
「on your mark, set！」
 
鳴槍聲響起，我朝向抽籤箱進發。
 




但畢竟缺乏鍛練，速度明顯落後於其他人。
 
撇除羅凱撒唔講，就算係尾二嗰個，都領先於我兩個身位。
 
四肢不斷重覆擺動，眼前嘅中途站卻彷彿半毫米都冇移近過，眼見羅凱撒同其他人先後到達，喺箱裏面抽咗張紙就陸續往觀眾席四散，尋找所需物件。
 
我稍為調整呼吸，然後一口氣往抽籤箱處衝去。
 
「嘰嘰嘰嘰！」
 




我朝向聲音來源，係休比，仲有喺賽道外不遠處觀戰嘅小悠。
 
「阿帆！休比話你仲有得追架！」
 
我正想向佢地比拇指，但頭先嘅過度衝刺令每一下呼吸都變得格外費力：「咳…！咳咳咳咳咳…！」
 
慰問我嘅係抽籤箱前嘅駱以雪，佢似乎被派嚟做比賽嘅工作人員：「咳成咁，你死得未？」
 
畢竟時間緊迫，因此我選擇無視佢，快手從箱裏面抽起一張紙，隨即打開——
 
「咪話我唔提你，每人最多可以抽三次，如果你覺得紙上面寫嘅嘢太高難度，可以再抽。」
 
我二話不說，將手上嘅紙塞返落箱，然後換第二張。
 
剛才寫嘅嘢，一時三刻根本冇可能搵到。




 
…都唔係唔得嘅，如果唐夕嵐喺度嘅話。
 
但今年運動會分開高中組同初中組兩日舉行，要我喺高中級別搵第二個「學妹」頂替，不論係時間抑或心理上都令我有所卻步。
 
話說，會喺紙上面寫「學妹」嘅除咗許正峰之外都諗唔到第二個。
 
只可以講，今年學校俾我地嘅自由度真係大。
 
打開第二張紙同時，不忘望吓觀眾席嗰邊，羅凱撒佢地似乎仲搵緊要搵嘅物件，即係話我仲有機會贏。
 
低頭一瞥：
 
『學生會成員嘅運動外套（要著住跑去終點）』
 




……。
 
我握摷手中嘅籤紙，心裏默唸一句許正峰你個死仆街後，快速搜索肉眼範圍可見嘅學生會成員…然後目光停留喺眼前嘅學生會副會長身上。
 
駱以雪厲眼瞪我一下，將身上外套嘅拉鏈拉到最頂：「諗你都唔好諗。」
 
「…放心，我都唔想死住。」
 
最後一次機會。
 
我趁羅凱撒佢地未返到，一邊祈求上天俾我抽到好物，一邊喺箱中翻滾再翻滾——
 
千祈唔好又係許正峰寫嘅奇怪嘢。
 
「阿帆！你抽到啲咩呀？係咪抽到我寫嗰張呀？」小悠將手放喺嘴邊，向我呢邊吶喊。




 
…差啲唔記得小悠頭先講過，箱裏面嘅紙，佢係有份寫嘅。
 
即係話一定唔慌有好嘢。
 
我埋怨學校點解唔搵人監管成個借物跑項目（雖然要講嘅話，呢個項目連出現都唔應該），起碼喺決定物件嗰陣要搵個品格優良嘅學生主理，我就唔使落得如此田地。
 
「唔好再拖時間，快啲抽最後一次。」駱以雪木無表情地催促。
 
佢講得啱，再拖落去，我就會輸。
 
「拜託，俾我抽啲容易搵嘅嘢…」我閉眼默唸，憑感覺撈起最後嘅勝負關鍵——