【全劇終】《我喺街執咗個失憶嘅女仔返屋企》: 休比篇：練習（上）

「你諗住跳幾多米？」
 
幫手set好個場之後，小悠就去更衣室換咗PE衫出嚟。
 
佢一邊做熱身：「會長話唔好一開始就好高騖遠，所以我陣間試咗1.75先。」
 
「嗰個咁嘅羅凱撒，你唔俾佢係鳩噏咩…」
 
「咪同你講過，會長初中嗰陣有練過跳高囉。」
 




「咁又點，佢係咁叻嘅話一早破咗學界紀錄，使乜自己提先有人知？」
 
小悠輕嘆一口氣：「阿帆，其實會長唔係你諗得咁差架，點解你就唔可以試吓同佢做朋友呢？」
 
「你係咪唔記得一開始係佢咬住我唔放先？要我同佢做朋友？」我冷笑一聲，「哼。」
 
小悠望住我，居然笑咗出嚟。
 
「笑咩？！」
 




「你頭先係咪扮緊會長？」
 
「幾時有呀？！」
 
「你頭先哼嗰吓，明明就係佢口頭禪，你仲要連啲語氣都似到足。」
 
「…痴線，你唔俾係佢抄我？！」我猶疑咗一吓，然後別過視線，「不過你都幾留意佢喎，連佢口頭禪都知得咁清楚。」
 
「唔止佢！學生會其他人我都有留意！」
 




「嗯？」
 
小悠清一清喉嚨，然後擺出一副樸克臉：「呢位同學你犯咗校規，請跟我過嚟。」
 
「…駱以雪！」
 
小悠拍拍手：「犀利，咁呢個呢？」然後佢喺我身邊繞來繞去，發動噪音攻擊，「阿雪呢？有冇見過阿雪呀？明明見到阿雪嚟咗呢邊格？」
 
我忍唔住笑：「呢個一定係許正峰。」
 
然後小悠又好似諗到啲嘢，壓低把聲：「芝芝話焗好咗焦糖布甸！小悠你去唔去食！」
 
「呢個一聽就知係張廷宇啦…！」
 
點知一講，體育館嘅大門就打開咗：「對唔住！頭先芝芝焗好咗啲曲奇送俾我，所以我遲咗！」




 
我同小悠交換一個眼神，然後笑咗出嚟。
 
「…我會唔會做咗電燈膽？」張廷宇一埋嚟就問。
 
「咩呀？」我瞇長雙眼反問。
 
「冇，見你地頭先個氣氛，周圍有啲粉紅色泡泡啫。」
 
「痴線。」我講咗一句。
 
「粉紅色泡泡？邊度呀？」小悠又犯傻。
 
趁小悠預備緊跳高嗰陣，我拉張廷宇到一旁：「喂！你幫吓眼睇住小悠，睇吓佢有冇乘機耍白痴！」
 




「耍咩白痴呀？你地又玩緊咩？」
 
「唔係玩！呢場係認真嘅決鬥！」之後我同張廷宇解釋來龍去脈。
 
「即係話如果小悠24小時唔做你口中嘅白痴行為，你就信佢俾跟蹤狂跟蹤…」
 
「冇錯！」
 
「…真係唔知話你地幾多歲好。」
 
呢個時候，小悠對企喺場邊嘅我地揮手：「阿帆！張廷宇！我準備跳喇！」
 
「加油！」張廷宇大聲回應。
 
然後，小悠開始做出助跑嘅動作…