【全劇終】《我喺街執咗個失憶嘅女仔返屋企》: 休比篇：禁止耍白痴打賭（三）

禁止耍白痴大挑戰，當日。
 
今日係一切如常嘅返學日：我照舊起身、照舊刷牙洗面、照舊坐到飯枱前。
 
早餐係阿妹預備嘅班尼迪蛋，小悠早就坐咗喺度食得津津有味，嘴角沾滿蛋汁。
 
我望吓而家嘅時間：七點二十五分。
 
點知小悠好似識讀心一樣，帶點得戚對我講：「你唔使望喇～而家未到八點，我做任何嘢都唔算犯規～」
 




我回睥佢：「俾心機食埋你嘅最後早餐，三十五分鐘之後就會係你嘅死期。」
 
「哼，我係你嘅話，就趁而家上網睇定邊度買原箱繽紛樂有特價喇。」
 
「…你！」
 
「你地兩個…朝早可唔可以俾我靜吓…我一陣有小測…」阿妹有啲唔耐煩咁望實我地。
 
為咗阿妹嘅小測表現，我決定稍作忍耐。
 




然後，小悠喺雪櫃拎咗兩包繽紛樂，我地三個就踏上返學嘅路程。
 
因為阿妹趕住返去溫書，所以行先一步，淨低我同小悠優哉悠哉地走在路上。
 
我一路聽住小悠食繽紛樂嘅聲，一邊望住電話時鐘。
 
七點五十三分——仲有七分鐘，我隔離呢個晨早流流食朱古力嘅白痴喺接下來嘅十六小時都唔可以耍白痴。
 
諗吓都覺得開心。（因為白痴係會傳染嘅，好似係）
 




最後一分鐘，我開始倒數：「仲有六十秒，禁止耍白痴挑戰就正式開始，五十九、五十八、五十七…」
 
「等等等等！阿帆你＃$＆@＃$＆@＃＆喇！」可能見時間緊迫，小悠選擇將手上嘅幾支繽紛樂一次過隊晒落口，導致我聽唔到佢噏乜。
 
「二十七、二十六、二十五…」
 
最後廿幾秒，佢快速用紙巾將嘴巴抹乾淨，然後整理好身上嘅校裙。
 
「最後十秒，九、八、七、六……」
 
「…我一定會贏今次嘅打賭！阿帆你睇住嚟啦！」臨入學校前，佢用食指指住我講。
 
…幼稚。
 
「我地之間嘅決鬥…」喺我地一同步進校門嘅一刻，時鐘嘅指針亦指向八點——




 
「正式開始。」
 
空氣嘅流動喺非常突然嘅一瞬間改變咗。
 
我將視線投向旁邊。
 
依然係我見慣嘅小悠。
 
但係，某種我講唔出係乜，只能靠意會嘅嘢，確實唔同咗。
 
或者見我盯住佢，小悠轉過頭來：「嗯？」
 
「冇、冇嘢。」
 




頭先嗰一個「嗯」字，喺各種方面上都同平時嘅小悠有啲違和。
 
如果要俾一個形容詞嘅話，就係聲音聽起嚟比平日要更柔軟一啲。
 
睇嚟為咗原箱嘅繽紛樂，佢非常認真地想要嚟真。
 
「我地快啲返課室喇，阿帆。」講完佢走喺我前面。
 
不過，夾硬扮出嚟嘅一面，理應唔會太難攻破——只要我諗啲計謀，令佢不慎露出馬腳，恢復成平時白白痴痴嘅小悠，勝利就係屬於我嘅。