【全劇終】《我喺街執咗個失憶嘅女仔返屋企》: 休比篇：運動會襲來

臨瞓之際，我收到今朝個女仔嘅訊息，內容係一段片。
 
我打開嚟睇，見到休比好有精神喺一隻手掌上面打關斗。
 
研究咗一陣，我確認片入面嘅真係休比，而且冇剪接痕跡——即係話，此時此刻嘅休比應該安全。
 
我即刻彈起身，拎俾床下嘅小悠睇：「睇吓！今朝個騙子sd 咗條片嚟，證明休比真係仲喺佢度！」
 
「…嗯。」佢把聲聽落唔係好精神。
 




「果然…你好掛住休比？」
 
佢有啲落寞：「咁多晚都有休比陪住我，而家冇咗佢所以瞓唔著。」
 
內心嘅自責感又開始湧現，不論係今朝整唔見休比嗰份，定係十幾年前自己隻龍貓走失嗰份。
 
月光之下，小悠一雙紫瞳顯得份外靈動。
 
「我應承你，一定會帶休比返嚟。」
 




＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
第二日嘅放學，我去咗美術室畫畫。
 
畫到一半時，唐夕嵐喘晒氣咁趕到。
 
「終於嚟喇咩？副會長。」
 
佢冇應機，撥開滿枱嘅畫具，趴咗喺枱面。
 




「又俾羅凱撒糟質？」我邊畫邊問。
 
佢嘆一口氣：「會長佢俾咗個大型活動我跟，呢排忙到畫都冇時間練。」
 
「哈，好彩我嗰陣選唔到，如果唔係而家忙到踢晒腳嗰個係我。」
 
「雖然學生會其他人都會幫手，但所有嘢都係由我跟，會長仲叫我加啲創新元素落個活動度…」佢繼續呻。
 
「咩活動呀？」
 
「嚟緊下個月嘅運動會。」
 
「要有創新元素嘅運動會？」
 
「嗯。」




 
「加入瞓覺項目，或者發呆項目有冇得諗？」
 
「如果係咁嘅話，不如加個畫畫項目！」
 
我笑，同唐夕嵐接觸多咗，發覺某啲時候佢會表現出童真。
 
「咩項目都好，反正運動會不嬲與我無關。」
 
「你由中一到而家，一個項目都冇參加過？！」佢有啲驚訝。
 
我搖頭：「冇。」回想過去四年嘅運動會，基本上係由朝坐到黑。
 
「噢，今年會有唔同喇。」
 




「有咩唔同？」我內心昇起不祥預感。
 
「會長話中五級係最後一年參加運動會，所以規定每個人至少報一個項目。」
 
我掉低手上嘅筆，以示不滿。
 
「我咁早同你講，都係想你有心理準備…」
 
對於一向缺乏鍛練嘅人嚟講，運動會只係將鳩坐一日嘅地點由學校轉成運動場。
 
我拎返起支筆，用筆尖指住唐夕嵐。
 
「你答我，我係咪你師父？」
 
「係！一世都係！」




 
我嘴角一揚：「咁就得嘞，我要你運用你嘅權力，令我唔使參加運動會。」
 
「我一早估到你會出呢招架喇，」佢一面為難，「但好可惜，會長講到明，唔得。」
 
「你聽日開始唔好再叫我師父。」
 
「唔好呀！你聽我講先啦！」睇嚟靠嚇呢招係work嘅，「我諗咗一個對策！」
 
「咩對策？」
 
「我會向會長建議喺運動會入面加個新項目，而呢個新項目係師父你呢種行兩步都嫌多嘅人都頂得順嘅程度。」佢一副胸有成竹嘅樣。
 
「即係乜嘢新項目？」
 




「未諗到，不過唔可以同既有項目重覆。」
 
如果係平時唔運動嘅人都頂得順嘅程度，做個樣參加吓都得嘅…
 
「咁我信你架喇，我嘅性命就掌管喺你手上。」
 
「放心，我唔會俾你命喪運動場嘅。」
 
之後，我地交換一個微笑。
 
「好，畫畫。」
 
「嗯！」