【全劇終】《我喺街執咗個失憶嘅女仔返屋企》: 番外篇：芝芝的真面目（上）

我企喺鏡前，望住反射出嚟嘅自己。
 
今晚呢個重要日子，我整咗個平時唔會整嘅髮型，著上平時唔會捨得買嘅新衫。
 
呢一切，都係為咗陣間嘅約會。
 
事緣係，喺學生會補選落敗之後，我已經疊埋心水聖誕節摺喺屋企，但上天似乎未放棄我，喺假期嘅前一日，珀奈約我喺天台見面——
 
「喂！你聖誕節想唔想同我一齊過？」
 




我停頓數秒，思考珀奈嘅意思。
 
「但係，我都冇當選學生會…」如果我選到嘅話，佢就同我去街——呢個係我之前同珀奈嘅約定。
 
佢搖搖頭：「唔～呢個係我單方面對你嘅邀請。」
 
「…邀請？」
 
「嗯，如果賞面嘅話，聖誕節嗰日我喺…」
 




就係咁。
 
雖然唔知咩原因珀奈居然主動約我，但呢啲都唔重要，重要嘅係如果我今晚好好表現，話唔定可以增加佢對我嘅好感。
 
而且，難得有機會同珀奈二人獨處，我實在諗唔到有咩理由唔去。
 
「我出去喇。」等到時間差唔多，我對住空無一人嘅客廳講。
 
除咗我之外，其他人都各自有節目：小悠約咗芝芝；而阿妹尋日已經出發咗去學生會集訓。
 




如果唔係珀奈及時對我發出邀請，我諗今晚要喺屋企食杯麵。
 
所以，我準備咗聖誕禮物送俾珀奈。
 
約定時間前十五分鐘，我嚟到珀奈講嘅地點。
 
街上熙來攘往，好不熱鬧。我戴上耳機，靜心等候憧憬嘅身影——
 
耳機裏播放嘅唔係音樂，係中三嗰陣珀奈風雨不改send俾我嘅錄音。
 
「高田帆，我講樣嘢你聽你覺得好唔好笑？今日英文堂嗰陣呢，Miss將beach講成bitch，之後有人問佢係咪話緊自己…」
 
「你妹妹嘅事，我聽海sir講咗喇，不過我冇同其他人講架…我想講嘅係，大家都好想快啲見到你返嚟架！」……
 
將全部錄音loop過一次之後，我想見到嘅人依然不見蹤影——距離約定時間已經過咗半個鐘。




 
唔通喺路上出咗意外…？
 
考慮到呢個可能性嘅同時，我決定打俾珀奈。
 
電話喺響斷嘅前一刻先接通。
 
「…我係阿帆。」
 
隔咗一陣，珀奈好大反應：「…Sorry呀！Sorry呀！我唔記得今日原來約咗你！」
 
「…唔緊要，反正都等咗咁耐。」
 
電話對頭傳來一堆雜音。
 




唔知係咪我聽錯，仲隱約有把男性微喘聲。
 
同埋可能係傢俬碰撞發出嘅「啪、啪」聲。
 
「Sorry呀，其實…」珀奈講到呢度開始喘氣，或者喺屋企搬緊傢俬，「海Sir而家喺我屋企呀…你、你記唔記得邊個海Sir呀？我地中三個實習老師…」
 
「記得呀。」
 
「記得就好喇！你知唔知…」珀奈講到一半，突然「呀」一聲叫出嚟。
 
就算手頭上冇鏡，我都知道自己呢一刻木無表情。
 
「hana，你冇嘢吖嘛？」發出嘅聲線比想像中冷靜。
 
又係一陣雜音。




 
「冇、冇嘢…阿、阿飯，不如我聽日再打俾你？」
 
「唔使喇，等你忙完先。」講完之後，我掛上電話。
 
企喺原地，街道上嘅嘈吵聲此刻聽起嚟混濁無比。
 
直到附近嘅人消失一大半，大概每個人都已經等到要等嘅人。
 
…浪費心機。
 
早知，唔嘥錢買新衫。
 
都係搭巴士返去罷啦。
 




今晚特別多人，連平時返屋企嘅路線都排晒長龍。
 
準備上車嘅時候，一個身影從後趕上：「阿帆阿帆阿帆！！！」
 
我嚇到手上份聖誕禮物都爭啲跌。
 
「俾我打尖！」嗰個人未經我同意，就搶先過我上咗架巴士。
 
我趕快向後面嘅人道歉：「對唔住…我識得佢架。」
 
喺上層坐低之後，我問：「你唔係約咗芝芝咩？」
 
小悠舉起手上嘅紙袋：「嗯！我預備咗一份聖誕禮物俾佢！不過我記錯咗地方，所以而家要趕返去搵佢！」
 
「正常發揮…」我嘆口氣。
 
「咁你呢？」
 
「…我？我準備返屋企，頭先出咗嚟買啲嘢。」我講咗個大話。
 
「如果係咁嘅話，不如你同我一齊去搵芝芝？」
 
「去搵…芝芝？」
 
「冇錯，去搵芝芝。」
 
呢個時候，天空突然落下一道旱天雷。
 
芝芝——傳說中張廷宇嘅現任女友；小悠嘅好好好朋友，經常邀請佢去甜品學會又食又拎。
 
雖然我地之間有兩個共同朋友，理應好容易碰見，不過我同佢依然一次都冇見過面。
 
每一次，我都只係喺張廷宇或者小悠口中聽見佢嘅存在。
 
或者，我可以趁呢個機會，一睹芝芝嘅真面目。
 
我吞下一口唾液：「…好。」