【全劇終】《我喺街執咗個失憶嘅女仔返屋企》: 學生會補選篇：曾經的夢想

我對住張和泉紗霧研究咗一陣，心入面大概拿捏好比例同角色特徵之後，開始動筆。
 
鉛芯筆觸紙嘅感覺，令我諗返起好耐之前一啲無謂嘢。
 
「帆帆，你喺度畫緊咩呀？俾媽媽睇吓？」
 
五歲嘅我，粒聲唔出繼續畫。
 
「帆帆，你咁樣唔得架，媽媽知道冇咗妹妹同龍貓你好唔開心，爸爸媽媽都好唔開心架，但係我地有冇一粒聲都唔出吖？冇吖嘛…」
 




畫上最後一筆，一幅大門大獸就完成咗。
 
我將畫紙舉俾阿媽：「睇吓。」
 
阿媽摸吓我個頭：「終於理人喇咩？」
 
「…我冇唔開心，雖然見唔到bb，又搵唔到龍貓，不過有得畫畫，有得畫畫我就開心。」
 
「知道喇，你大日要做漫畫家吖嘛！」
 




「嗯！我要做漫畫家！」
 
阿媽流產之後，有段時間我完全沉迷喺畫畫入面。
 
嗰陣全家愁雲慘霧，唯有喺畫畫嘅時候，我搵到自己嘅世界。
 
不過升中之後，張廷宇成日叫我去踢波，整整吓我都冇再執起過畫筆。
 
更加唔好話做漫畫家呢個不切實際嘅夢想。
 




望住紙上逐漸成形嘅和泉紗霧，內心忽然昇起一種微妙感覺。
 
呢個時候，後面傳嚟小悠把聲：「阿帆！你喺度做咩呀？」
 
我即刻遮住幅畫：「冇呀，碌緊ig。」
 
俾人見到自己畫畫，仲要畫和泉紗霧，始終係一件幾羞恥嘅事。
 
不過，遮得幅畫嚟又遮唔到啲筆，我畫緊畫呢件事睇嚟已經俾小悠識破：「…你喺度畫畫呀？」
 
「畫吓鬼畫符唔得咩？！」
 
小悠靜咗幾秒，視線一直望住我幅畫：「我可唔可以睇吓？」
 
「唔得！」講完之後，發現語氣好似重咗，於是我解釋，「…畫俾唐夕嵐架。」




 
「夕嵐？」
 
「嗯。」我將發現唐夕嵐ig，同埋佢鍾意和泉紗霧嘅事同晒小悠講。
 
「…哦，所以你就諗住用幅畫氹返夕嵐。」
 
「唔係氹！呢啲叫修補關係！等場面唔好咁老尷，知唔知？」
 
「嘻嘻，」小悠笑咗兩聲，「阿帆你果然好溫柔。」
 
「溫柔？我邊忽溫柔呀？都話係修補關係！」俾小悠用個咁乸型嘅詞語去形容，我梗係反擊。
 
「阿帆。」
 




「又點呀？」
 
「你可唔可以都送一張俾我呀？」
 
我暫停手上嘅動作：「…你又要？乜你都鍾意和泉紗霧咩？」
 
小悠搖搖頭。
 
「咁你要嚟做乜？」
 
「唔一定畫和泉紗霧架，不過…」
 
手一震，和泉紗霧隻左眼歪咗。
 
我用擦膠將畫歪嘅地方擦乾淨。




 
「都係算啦，你俾心機畫，我去瞓喇。」講完之後，小悠返咗自己嘅被舖。
 
「嗯，早抖。」
 
可能太耐冇拎起支筆，我改極都唔係好滿意，最後頂唔順趴喺書枱瞓咗。