【全劇終】《我喺街執咗個失憶嘅女仔返屋企》: 學生會補選篇：競選的意義

前情提要：為咗同女神去街街，阿帆決定要在學生會補選中打敗小悠，取得新任副會長一席，偏偏呢個時候與關鍵人物唐夕嵐嘅關係跌到冰點…與此同時，阿帆亦開始思考選學生會的真正意義…？

學生會補選機制：50%全校投票+50%現任學生會評核（透過學妹計劃的５次活動對候選人的表現進行評分）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

喺急症室折騰大半日，終於返到屋企。
 
阿妹已經返咗嚟，煮緊今晚嘅晚餐。
 




大概係聽到開門聲，佢轉身同我講：「你隻手點呀？又會咁唔小心淥親都有嘅？」
 
「冇事，叫做仲有知覺。」我笑。
 
阿妹嘆口氣：「旨意你照顧自己真係死得…你抖吓啦，今晚我煮飯。」
 
「好呀，咁我一於等食。」我望住阿妹煮飯嘅側影，佢不經意印咗吓額上嘅汗。
 
見到呢個畫面，我突然想問佢一個問題。
 




相隔一陣，我開口：「阿妹。」
 
「嗯？」
 
「你嗰陣…點解會去選學生會？」
 
佢諗咗陣：「唔…點解我會去選學生會呀？」
 
「嗯。」
 




「我唔會話係想幫學校做啲嘢呢啲冠冕堂皇嘅理由…不過，算係類似嘅心情？」
 
「可唔可以講多啲？」
 
「…自從嗰件事之後，其實我有喺屋企思考過，到底我返到去係想見到一間點樣嘅學校…唔係，應該話…到底一間點樣嘅學校先係當時嘅我想面對嘅學校？」阿妹口中嘅嗰件事，係指中三嗰陣俾班八婆劃花臉件事。
 
我苦笑：「乜你諗啲野咁難明架。」
 
佢繼續：「或者進一步去諗，就係理想中嘅學校…？後來諗吓諗吓，我想喺畢業前盡量見到接近我理想中模樣嘅學校，就去做學生會囉。」
 
講到呢度，佢笑：「所以，我選學生會嘅理由可以話係出於自私。」
 
「咁…你做咗學生會之後，有冇覺得學校同你理想中接近咗？」
 
佢又諗咗陣：「有時候我會覺得幾個人嘅力量唔會改變到啲咩，更何況我地只係學生，大人嘅世界有好多野我地根本理解唔到，亦都控制唔到。」




 
飯煮好，阿妹遞咗幾隻碟俾我。
 
「不過，我相信就算影響唔大，但改變係逐少累積，即使只係好少好少，但到我畢業嗰日，學校一定會離我當初想像嘅接近咗。」
 
改變、理想中嘅學校…
 
我接過碗碟。
 
「係喎，你做咩無啦啦問呢啲嘢？」
 
我笑：「或者，我應該好好諗吓我選學生會嘅理由。」
 
我笑，唔單止因為聽到阿妹嘅答案，仲係因為可以咁樣同阿妹傾心事，自從中三之後都冇乜幾次。
 




「唔記得同你講，你煮嘅嘢食好香，以後多啲煮俾我食得唔得？」
 
阿妹好似呆咗兩秒，然後將手上嘅餐具塞晒落我手：「今晚係例外架咋！邊個話可以成日煮俾你食…！」講完轉身入廚房。
 
「…讚你啲嘢好食都唔得？」
 
果然，阿妹嘅心情真係好難觸摸。