【全劇終】《我喺街執咗個失憶嘅女仔返屋企》: 學生會補選篇：十一月是你的謊言（下）

「近排你幾好嘛？」
 
「一啲都唔好。」反正佢問到，我就將學生會補選，同埋唐夕嵐嘅事講晒俾佢聽。
 
佢諗咗一陣：「呢個唐夕嵐，我好似有啲印象，係咪上年拎完傑出學生獎嚟過我地學校講talk？」我記得阿妹都有提過呢件事。
 
「就係佢。」
 
「不過真係估你唔到，你居然會去選學生會。」
 




「我有我嘅理由。」就係，為咗可以同珀奈聖誕節出街——我冇講出口。
 
「係咪為咗小悠？」
 
我俾佢突如其來嘅一句嚇親：「關、關小悠咩事？況且，佢今次都有份選，我同佢係競爭對手嚟。」
 
「唔關小悠事嘅話…」佢諗咗陣，「咁我估係上次喺你學校門口見到嗰個叫珀奈嘅女仔。」
 
「你點知架？？」我意識到自爆後，急忙改口，「唔係，唔關任何人事！我自己想選唔得咩？」
 




「你講過你淨係對唔麻煩嘅野有興趣，選學生會咁麻煩，我先唔信你係真心去選。」
 
估唔到聯校宿營嗰陣嘅鳩噏佢到而家都記得咁清楚…
 
「總之！想選咪選囉，使乜一定要理由？」
 
「嘻嘻，同我嗰陣一樣。」
 
我突然醒起佢係學生會會長：「你嗰陣都係無緣無故走去選？」
 




佢坐咗喺草地上，我跟佢一齊坐低。
 
「又唔係無緣無故嘅～嗰陣有好多師姐叫我選，不過我猶疑咗好耐，最後決定咩都唔諗，組咗閣先算。」
 
「…咁你都幾有行動力吖。」
 
「多謝喎，」佢望向天空，「不過，到真係當選之後，企喺講台向全校致辭嗰陣，我好似搵到做學生會嘅理由。」
 
「係乜野？」
 
「我曾經諗過一大堆，為學校服務？幫同學爭取福利？畢業之後寫落CV？好似全部都唔係，後來我先發覺，六年時間眨吓眼就會過，我唔想到死嗰一刻先發現原來中學生涯乜嘢都冇做過，冇一件事係值得記住嘅，我唔想咁。」
 
「但係啲大人成日懶係嘢咁講，到你出到社會，就會覺得中學嘅嘢根本細到粒沙咁，只係佔你人生入面好少好少嘅時間。」
 
佢眼神忽然變得落寞：「…唔係每個人都有機會體會到你所講嘅感覺，對於某啲人嚟講，中學生涯或者已經係佢人生嘅全部。」




 
我嘗試理解呢句說話嘅隱藏意思。
 
下一秒，佢恢復笑容：「我地返去啦。」
 
佢起身嗰陣，我一手拉住佢：「喂，你究竟點解會入咗醫院？」
 
「係喎，唔記得答你呢個問題添…」呢個時候，有姑娘喺遠處同佢揮手，似係催我地快啲返去。
 
千惠冇講落去，唔知點解我都冇勇氣再問。
 
入到去，姑娘叫我地等一陣，空氣突然有種壓迫感。
 
直到醫生遞咗份野俾佢：「一切正常吖，身體好好，keep住呀，冇問題走得架喇。」
 




我忍唔住問：「…醫生，佢到底咩事？」 
 
「哦，佢嚟一年一次身體檢查啫，唔使擔心。」
 
「身體檢查？乜佢唔係…」我選擇收皮，俾人知道我以為佢有絕症嘅話一定笑我睇太多膠劇！
 
可惜，我收皮都冇用，已經聽到隔離千惠嘅忍笑聲。
 
「你唔係以為我有絕症吖嘛？乜你份人諗啲野咁膠嘅？」佢掩住半邊嘴恥笑。
 
「…無啦啦喺醫院撞到你！講嘢又立晒flag咁！我咁諗好正常啫！」
 
「唔係咁樣點成功整估你？」佢笑到失控。
 
真係頂佢個肺，果然特登玩嘢，等我以為佢就嚟死。




 
「好彩我份人大方…俾著第二個你玩啲咁嘅嘢一早同你絕交喇。」
 
「我冇親口講過自己絕症喎～係你自己誤會咋喎～」
 
連個醫生都想恥笑我咁款，笑笑口走咗去。
 
佢深呼吸幾吓，終於笑完：「不過，我頭先講嘅係真架。」
 
「你有邊句真呀？信住先？」
 
「關於我選學生會嘅理由，我冇呃你。」
 
望住佢一下子變得認真嘅表情，我開始思考當中嘅意義。