【全劇終】《我喺街執咗個失憶嘅女仔返屋企》: 學生會補選篇：災難日常

第二日。
 
阿妹去返學，小悠就話同芝芝去食甜品，所以晨早流流間屋得返我一個。
 
趁雪櫃啲嘢未俾小悠食晒之前，我決定整碟蒜香意粉，再沖杯熱mocha做早餐。
 
望住杯入面啲咖啡粉，我個腦一直思考尋日小悠講嘅嘢。
 
突破口。
 




只要搵到呢樣嘢，就可以打破同唐夕嵐嘅尷尬。
 
究竟，唐夕嵐嘅突破口係咩…？
 
我諗起阿妹講過，佢係一個IQ140，精通八國語言嘅天才初中生。
 
唔通係語言？
 
既然佢識咁多隻話，對語言應該好有興趣。
 




我將啱啱煲好嘅滾水倒入杯。
 
或者我應該由語言入手，同佢製造共同話題先。
 
但問題係我根本對語言一啲興趣都冇！
 
如果為咗珀奈嘅話，我可以對日文有少少興趣嘅…
 
即係，我應該搵機會同唐夕嵐講吓日文呢個話題。
 




一不留神，杯入面嘅滾水滿瀉。
 
「啊！！！嘩屌！！！」我發出慘叫聲，本能反應整跌埋手上隻杯。
 
清脆嘅玻璃落地聲。
 
發紅嘅整隻手掌。
 
話說，呢次已經係幾日之內第二次燙傷。
 
用大量凍水沖緊傷口嗰陣，電話不合時宜地響。
 
我用另一隻手撳著，發現係張廷宇sd嚟嘅訊息：
 
早晨！今個禮拜會發生意想不到嘅好事第二位！




點呀？有冇發生意想不到嘅好事呀？
 
早幾日佢同我講星座，話我今個禮拜會發生意想不到嘅好事。
 
而家睇嚟好事就冇嘞，黑仔嘢就一大堆。
 
我撳著個錄音制，用盡丹田向佢咆哮：
 
「冇！一件都冇！收皮啦！！」
 
 
搵凍水沖咗半粒鐘，隻手都好似冇乜知覺，於是我決定浪費吓醫療資源：去急症室。
 
去到之後，姑娘俾咗個籌我，我望一望輪候時間——好彩今日全日得閒。
 




玩咗陣電話，又發吓吽哣之後，我無意中望向窗外，出面係個俾病人休息嘅花園，裏面有細路喺度跑，同埋有老人家喺度散步。
 
突然間，眼角捕捉到一個熟悉嘅身影，身上著住一件病人衫。