【全劇終】《我喺街執咗個失憶嘅女仔返屋企》: 學生會補選篇：能力愈強，責任愈大

我喺書包摷咗啲野出嚟。
 
係我事前print好嗰封用唔知咩文寫俾羅凱撒嘅信。
 
要同一個人打破隔膜，最快嘅方法就係搵佢幫手，咁樣佢就會喺過程入面產生成功感，從而對對方放下戒心。（利申鳩噏）
 
對住唐夕嵐呢個精通8國語言嘅天才，我點可以放過呢個大好機會。
 
事成嘅話，唔單止可以同唐夕嵐打破隔膜，仲可以知道嗰封連google translate 都唔知噏乜嘅信究竟噏緊乜。
 




我佩服自己嘅聰明。
 
「唐夕嵐。」我叫佢。
 
佢回頭。
 
「係咁嘅，我有啲野想搵你幫吓手…」
 
佢等我講落去。
 




我遞封信俾佢：「你可唔可以幫我睇吓上面到底寫緊乜？」
 
佢望咗一眼：「呢封係？」
 
我老作：「我筆友寫嘅信，但我睇唔明佢寫乜。」
 
佢好似有啲無奈：「點解你唔搵翻譯網幫你？」
 
「試過，但因為上面啲字有啲撩，連goolge都認唔到。」
 




「…咁你都冇理由搵我吖？」
 
「有理由，因為你係IQ140，精通八國語言嘅天才初中生。」
 
我講完之後，佢臉上表情出現動搖。我理解唔到咁樣代表咩意思。
 
幾秒之後，我收到佢嘅答覆：「唔好意思呀學長，我諗我幫你唔到。」臉上係嗰副招牌營業式笑容。
 
「…唔會嘥你好多時間架咋。」
 
「唔係嘥唔嘥時間嘅問題，總之…你搵第二個啦。」講完佢孭起書包走。
 
我追上去：「一係咁，你話俾我知上面寫咩文？」
 
雖然好細聲，但我聽到佢發出「摺」一聲。




 
快速掃視操場一周之後，佢對我講：「你好煩，都叫你搵第二個。」
 
「搵到我就唔會搵你啦。」
 
「封野有咩咁重要？你睇唔明咪叫你筆友解俾你聽囉，扯我落水做乜？多餘。」
 
俾佢一講，我一時駁唔到。
 
可能拎住封野去同羅凱撒對質更直接，不過以同佢交涉多次嘅經驗嚟講，佢只會令事件留下更多謎團。
 
不過，俾唐夕嵐咁樣窒一窒，突然有啲唔gur。
 
話晒都大過佢，唔可以喺呢個時候霸氣盡失。
 




所以，我做咗一件大概三分鐘之後就會感到後悔嘅事：「你有冇聽過，能力愈強責任愈大？」
 
佢停低腳步望住我。
 
我開啟道德綁架mode：「我唔知你點解咁抗拒，但係個天俾你精通8國語言嘅才能，你應該諗吓要點運用。」
 
佢個樣呆咗，我趁機開埋老屎忽mode：「頭先句野，我諗你都冇聽過架喇，而家啲10後真係…連蜘蛛俠都未睇過。」
 
可能呢招成功咗，唐夕嵐塊面一下子谷到紅晒。
 
「……」佢um咗句野，我聽唔到。
 
「吓？聽唔到？大聲啲？」
 
「我話，我最憎就係呢種大人口吻…」




 
下一秒，佢突然發出破耳尖叫聲：「第一！我唔係10後！我08年出世架！」
 
我稍微塞住耳仔，估唔到佢人仔細細爆起seed上嚟咁刺耳。
 
「第二！」講到呢度佢抖咗幾啖氣，「就係我死都唔會幫你！你慳啲啦！」
 
然後，佢轉身跑走。
 
睇嚟，我好似愈搞愈禍。