【全劇終】《我喺街執咗個失憶嘅女仔返屋企》: 學生會補選篇：打掃操場

返到課室，小悠好有興致同我講：「阿帆！你尋日唔返學真係走寶，你知唔知我同朋也玩咗啲咩？」
 
「唔知。」我冷冷道出，兼且用凌厲目光望住佢。
 
「係二人三足呀！！然後我同朋也都係第一次玩啦，所以仆到成隻腳損晒，嘻嘻。」
 
「…二人三足？」嘩屌，真係好彩冇返學，我想像唔到同唐夕嵐玩二人三足嘅話氣氛會冰到一個咩地步。
 
屌，一不留神放鬆咗眉頭。
 




「…阿帆你個樣做咩咁嬲呀？」
 
「仲好講！如果唔係你對住我打乞嗤我使乜請假？」雖然我應該多謝小悠幫我避開咗同唐夕嵐嘅見面。
 
「有咩理由向你打咗個乞嗤就返唔到學架！唔好話你自己孱得滯…」
 
「收聲！為咗報仇，我要同你爭學生會副會長呢個位…」
 
小悠聽到，雙眼突然發光：「你講真架？」
 




「係，同我做好覺悟啦，我認真起上嚟連我自己都驚…」
 
「實在太好喇！」
 
我唔明：「我而家同你爭喎，你仲嗌好？」唔通小悠其實都係諗住hea選…
 
「有競爭先有進步架嘛！我地為咗小食部有炸豬扒丼飯，一齊努力啦！」小悠講完伸出手。
 
「邊有人選學生會係為咗炸豬扒丼架，服咗你…」 我無奈笑道，同小悠碰咗吓拳。
 




「阿帆，如果你認真想當選，記得喺今日放學好好表現！」
 
「我知，學生會會喺隔離評分吖嘛。」我啪響手指關節。
 
羅凱撒講過，今次嘅補選50％係學生會評核，50％係全校投票。
 
而要拉高學生會對我嘅評價，我首先需要學識點樣同唐夕嵐相處。
 
好快到咗放學。
 
我同小悠去到特別室集合，房入面除咗我地之外，仲有唐夕嵐、杜朋也，仲有駱以雪，睇嚟今日佢代表學生會評核我地。
 
然後，駱以雪宣佈今日嘅活動係：打掃學校。
 
Fuck。




 
一返到嚟就冇好野。
 
我望吓唐夕嵐，佢好專心聽緊駱以雪講嘅提醒事項，仲要一路聽一路做筆記。
 
咁講可能有啲馬後炮，但我而家先注意到，佢身上果然散發出一種天才獨有嘅氣場，同阿妹有啲相似，不過比阿妹嗰種更加不可親近。
 
我地各自獲派一個掃把，然後就去咗操場，駱以雪都跟埋嚟。
 
「…副會長，請問你可唔可以企遠啲？」我唔係好慣做野俾人睥住。
 
「唔可以，企遠啲我仲點樣觀察你地表現？」佢一口拒絕，然後拎支筆唔知寫乜。
 
我嘆口氣，繼續掃眼前呢個一粒塵都冇嘅操場地下。
 




望吓唐夕嵐，依然面帶微笑專注喺呢項苦差上。
 
幾經辛苦捱咗粒半鐘，駱以雪示意今日嘅活動完畢，跟手走埋。
 
我揚起勝利嘅笑容，一切都係為咗得返我同唐夕嵐嘅呢一刻。
 
同唐夕嵐打破隔膜嘅時機嚟喇！