【全劇終】《我喺街執咗個失憶嘅女仔返屋企》: 學生會補選篇：天才初中生（下）

「8、8國語言？！」
 
「冇錯，之前暑假嗰陣好似仲有外國嘅大學邀請佢去做交換生。」
 
乜原來唐夕嵐咁猛料…唔怪得咁難相處啦，通常天才都係比較難接近，好似係。
 
「…不過幾叻都唔關我事，我同佢電波對唔到。」
 
「聽你頭先講，你地要見面5次，過程俾現任學生會評分？」
 




「嗯，本來今日係第二次，好彩請咗假啫。」我鬆一口氣。
 
「即係你地之後仲要見多3次…」阿妹諗咗諗，「如果我係你嘅話，會盡量喺呢3次入面打破同佢嘅隔膜，呢個係向學生會表現自己嘅好時機。」
 
「我知…但係，我想像唔到同佢打破隔膜，而最重要嘅係，我根本冇心要做學生會。」
 
阿妹將準備餵入我口嘅匙羹隊返落個碗度，個樣有啲嬲：「既然你有份選，唔該你俾啲心機啦。」 
 
「係學生會啲人…」夾埋迫我選——我本來想咁講，但諗起體育館嗰日的確係我自己發神經話要參選，「冇野喇。」 
 




至衰都係小悠！同埋許正峰！
 
「如果你冇動力去做好呢件事，你就搵個理由俾自己，咁大個人，搵次認認真真做好一件事俾我睇好唔好？好似上次統測咁。」一不留神，阿妹開啟咗說教mode。
 
「…知喇。」我求其應，免得阿妹繼續煩。
 
阿妹一笑，重新拎起匙羹：「咁就乖喇！」
 
久違嘅感覺，好耐冇見過阿妹咁寵溺嘅笑容。
 




就好似返返去中三嗰件事之前咁。
 
我忽然諗到：「屋企好耐冇試過得返我地兩個。」自從小悠嚟咗之後。
 
一講完，阿妹突然拎唔穩手上嘅碗，成灘粥就咁倒落我下半身。
 
「啊啊！！！！！好熱啊！！！！！」我發出慘叫。
 
「sor... sorry！」阿妹即時拎咗紙巾，望住我褲浪位又突然唔知做咩停晒手：「…俾、俾你。」
 
我接過紙巾：「乜你咁唔小心呀？頭先仲話怕我倒瀉白粥，點知而家倒瀉嗰個係你…」
 
「…咩、咩呀！最衰都係你呀！」講完阿妹衝咗出去。
 
「喂！我又錯咩呀？」