【全劇終】《我喺街執咗個失憶嘅女仔返屋企》: 學生會補選篇：封測學妹玩家

「今次補選50％會由全校學生投票，淨低嘅50％就會係學生會內閣評核。」
 
What？學生會內閣評核？真係聞所未聞。
 
但我冇出聲，聽羅凱撒講落去。
 
「至於評核方式，有請前任副會長講解。」羅凱撒示意許正峰。
 
「咳咳，唔該會長，」許正峰拎疊文件出嚟，「今次補選嘅評核方式好簡單，亦都可以話係一個大型計劃嘅搶先試行版。」
 




聽到許正峰講出「計劃」兩個字，我突然有種不祥預感。
 
「——學長學妹計劃，兩位將會成為試行版嘅參與者，並且過程會由學生會內閣進行評核。」
 
「…你之前唔係話呢個計劃係一對一補課咩？有咩好評核？」我問。
 
「或者我講多少少，補課只係成個計劃嘅其中一part。成功配對學妹之後，你地一共會進行5次會面，每次活動形式不盡相同，有補課，有運動…呢樣遲啲會再公佈。」
 
咪住，全場竟然冇人吐槽「成功配對學妹」呢個講法…
 




「即係話，我同小悠一人帶住一個低form，然後你地學生會就會喺隔離評核我地？」我消化一次之後問。
 
羅凱撒點頭微笑：「冇錯。」
 
「低form呀…？好似好好玩咁…」小悠已經一臉沉醉。
 
「我再講多次，呢個係認真嘅補選，唔該你唔好當玩，」駱以雪睥完小悠再睥我，「仲有你都係。」
 
「又關我事？」
 




呢個時候，許正峰拍拍手：「大家都理解得幾好，就等我做個總結啦，我呢個學長學妹計劃而家係測試版階段，搵咗你同埋小悠做封測玩家，而我地學生會就係GM，會一路修復計劃嘅bug，同時監察你地嘅表現。」
 
「多謝你呢個莫名其妙嘅總結…」
 
「補選會喺一個星期之後進行，所以內閣評核將會喺聽日正式開始。」羅凱撒補充一個正常總結。
 
「等等，你頭先話嗰個乜鬼野計劃一共有5次會面，即係聽日就係第一次會面？」
 
「冇錯。」
 
「唔知會派邊個低form俾我地呢？」小悠半自言自語講。
 
應機嘅係駱以雪：「呢一層，你地聽日會收到一個人名，放學之後就可以去班房領取你地嘅學妹，或者學弟。」
 
我已經唔知由邊度開始吐槽駱以雪嘅用詞好…




 
「之後就帶埋學妹，或者學弟去多用途特別室集合。」
 
「知道！」
 
「咪住，我想問多樣。」我舉手示意。
 
「？」
 
「我地負責嗰個低form係由你地指派，定係抽籤決定？」
 
「哼，問得好。」羅凱撒嘅眼鏡反射出一絲令人不安嘅白光，「不過，而家我地唔會講住。」
 
我只希望，上天…吖唔係，係學生會唔好彈個咁難搞嘅低form俾我。