【全劇終】《我喺街執咗個失憶嘅女仔返屋企》: 學生會補選篇：芬達橙與芬達提子（夠鐘加更）

我攤喺體育館嘅長椅閉目養神，臉上敷住駱以雪走之前俾我嘅冰袋。
 
佢話，個冰袋係打我一巴嘅賠罪咁話。
 
順帶一提，佢頭先同羅凱撒自首，承認犯咗打同學呢條校規，所以作為懲罰，放學自願嚟體育館打掃一個星期。
 
真係唔知應該話佢死板好，定係勇於承擔好…
 
不過，佢呢巴嘅力度真係唔細，敷住冰袋塊面仲係赤赤痛。
 




如果唔係頭先無啦啦跳制，都唔使受呢一巴…
 
講開又講，究竟我做咩事跳制？
 
諗緊一堆無謂野同時，額頭突然一陣冰涼感。
 
我擘大眼，小悠喺我正上方，拎住罐野飲貼喺我額頭。
 
我彈起身：「…你幾時行過嚟架？一啲聲都冇！」
 




「係阿帆你諗野諗得太入神…！」
 
「我、我邊有。」我努力趕走腦入面許正峰同小悠嘅畫面。
 
「你呀！記住請我飲珍珠奶茶呀！」小悠打開自己罐芬達提子，放咗支飲筒落去啜。
 
「得喇，走你數咩…」
 
「不過，今日真係玩得好盡興，我好耐都冇試過…」小悠講講吓冇講落去。
 




「仲好講，咁大力車個波埋嚟！肝都俾你打爆…諗落都係唔請你飲珍奶喇，用嚟抵返醫藥費就差唔多…」我搓住頭先中波餅嘅右腹。
 
「喂！邊有得咁計架？」
 
「咁你點賠償我身體受創先？」
 
佢將頭先貼喺我額頭罐芬達橙遞出：「唔…最多，我請你飲？」
 
「喂！呢罐唔係本來就請我飲架咩？」
 
「邊個話？我買嚟自己飲架…咁你要唔要架？」
 
「要！梗係要！」雖然一罐芬達橙都唔係好抵到一杯特大珍珠奶綠多甜。
 
小悠對我笑笑，然後幫我打開咗罐芬達橙。




 
我望住佢開罐嘅動作，目光好自然落喺佢白晢嘅手指上。
 
……。
 
連我都解釋唔到，點解會不停loop返頭先佢同許正峰十指緊扣嘅畫面。
 
為咗令頭腦回復正常，我搶過小悠手上嘅芬達橙，然後一飲而盡。
 
「……UR！！！」
 
「阿帆原來你好口渴？」
 
「唔、係！我地返屋企！」講完我起身就走。
 




「等埋我呀！」
 
今日體育館嘅氣場睇嚟唔多掂，至會連帶我都變得怪怪地，都係此地不宜久留。