【全劇終】《我喺街執咗個失憶嘅女仔返屋企》: 未及誕生的親人

先確認一吓我地嘅隨身物品。
 
我：測驗卷 x n、電話 x1
阿妹：電話 x1
 
完。
 
即係話，連去租酒店住嘅機會都冇。
 
我同阿妹喺街上漫無目的咁行，經過細個時成日去玩嘅公園。




 
我無奈笑：「唔通今晚真係要瞓公園？」
 
「…癡線！邊個想同你瞓公園！」
 
「講笑咋，你升中之後都嫌低能冇去過公園啦。」
 
「…咩呀！」
 
轉個街口，突然見到前面有閃令令嘅招牌。




 
寫住「廉價租酒店，fps/payme可」
 
「有救喇！」我快步跑過去。
 
行行吓都搵到間唔使俾cash/卡嘅酒店，個天應該好同情我俾小悠搞到屋企都冇得返。
 
「行快兩步啦！」準備拉阿妹入去嗰陣，佢企喺原地唔郁。
 
對眼望住招牌另一邊嘅細字。




 
我跟住佢望，未睇得切寫咩，阿妹已經紅住臉走人：「我返去瞓公園！」
 
「喂！」
 
我再次望吓個牌，寫住「提供乾淨床單，各種制服/玩具」
 
…差啲中伏。
 
我急急腳跟住阿妹，好快返到公園。
 
呢個公園同以前一樣，有韆鞦打。
 
總算搵到今晚落腳嘅地方，都好嘅。
 




阿妹粒聲唔出，坐咗喺韆鞦。
 
我坐喺佢隔離。
 
「…乜原來附近有間咁嘅酒店，真係聞所未聞。」我嘗試打破尷尬。
 
「…你唔好再提呀！」阿妹臉上紅暈依然未退。
 
「okok…話說，我地好耐冇嚟呢個公園喇。」我改變話題。
 
「仲細咩，仲嚟做咩。」雖然阿妹咁講，但開始細力盪個韆鞦。
 
我返正題：「係喇，頭先講到…」
 
「邊個會想收你啲卷做禮物。」阿妹細細聲講。




 
我將成疊卷交佢手：「你睇完就明架喇！」
 
我兩個禮拜以嚟嘅心血結晶。
 
阿妹望咗啲卷一陣：「…咩意思？」
 
「喺解釋之前，有樣野我要同你道歉，我之前幫你整電腦嗰陣開咗你寫嘅日記嚟睇。」
 
阿妹一臉驚訝。
 
「我想你明白，就算嗰年我真係入唔到精英班，讀唔到想讀嘅科，但我從來都冇後悔過。」
 
講完呢句，空氣沉默。
 




過左好耐，阿妹先至話：
 
「明明只係統測…」
 
我無奈笑：「因為我唔想等到下次考試先送呢份禮物俾你。」
 
「明明成績差到冇得再差…」
 
「差咪好囉！即係進步空間大！你知唔知今日派卷啲Miss勁讚我呀…」
 
「明明…」阿妹冇再講，只係耷低頭。
 
「…妹？」
 
「明明…我只係個6歲嗰陣無啦啦走入你生活嘅代替品。」




 
講到呢度，我地都停咗。
 
我知道，阿妹耷低頭係因為唔想俾我見到佢喊。
 
代替品。
 
異常沉重嘅三個字。
 
阿妹喺孤兒院被領養返嚟之前，我本應有另一個親生嘅妹。
 
本來係咁。
 
如果阿媽唔係意外流產嘅話。
 
嗰年阿爸阿媽面上冇出現過笑容，雖然我得幾歲，但都隱約察覺到一啲好重要嘅嘢冇咗。
 
差唔多同一時間，我養緊嘅龍貓走失埋。
 
全家愁眉苦臉，直到有一日阿爸阿媽將阿妹接咗返嚟。
 
雖然我同未出世嘅bb冇機會見面，但阿妹一直喺度。
 
並唔係以乜野代替品嘅身分。
 
我踎低喺韆鞦前，幫阿妹抹走臉上嘅眼淚。
 
「我從來冇當過你係代替品，因為…」
 
同我地一齊住嘅頭個月，阿妹好怕生，就好似一隻去到陌生家庭嘅幼貓。
 
我將我所有玩具分俾佢，想佢快啲融入我地屋企。
 
紙箱戰機，機械爆丸，爆旋陀螺，咩都俾。
 
不過佢唔係好領情，成日縮喺角落頭。
 
日子耐左，佢問我：「點解你咩都分俾我玩？」
 
「點解分俾你玩？」我望住陀螺盤入面轉緊嘅轟擊天馬。
 
然後諗起阿爸阿媽同我講過：「因為…」
 
「你係我唯一嘅阿妹。」現實同回憶嘅聲音重疊，只係時間向前行咗十年。
 
我抬頭，望向月明星稀嘅晚空。
 
「唔知bb同龍貓而家喺第二個世界做緊咩？」
 
冇幾耐，阿妹逐漸收起喊聲，抬頭答：「佢地一定喺某個地方守護緊我地。」
 
「如果有一日可以再見嘅話就好…」