【全劇終】《我喺街執咗個失憶嘅女仔返屋企》: 對卷日

對卷日，同時係阿妹生日。
 
我晨早返到學校，今日係結果揭盅嘅日子。
 
究竟呢兩個禮拜努力有冇白費，心入面對阿妹嘅承諾可唔可以兌現，就睇今舖。
 
我諗，第時放榜都冇咁緊張。
 
「快啲返埋位，呢個係今日對卷時間表…」
 




我合埋眼，深呼吸。
 
順帶一提，小悠今日請假。
 
理由係今朝臨出門口前發生嘅呢件事：
 
因為朝早我地同阿妹各自要返學，所以我就叫小悠今晚預時間同阿妹食餐生日飯。
 
點知佢得知今日係阿妹生日之後，反應誇張過膠劇：「吓？？？今日係阿妹生日呀？？？？！！！」
 




「…殊，你細聲啲啦！阿妹仲未出門口架！」
 
「搞錯呀！咁重要嘅野你咁遲先同我講！」
 
「因為我預備咗驚喜送俾阿妹，講俾你知你實爆響口。」
 
我指嘅驚喜，梗係今次嘅統測成績啦。
 
「驚喜？係咩驚喜呀？」
 




「話明驚喜點可以講架？總之你放學唔好周圍去，同我乖乖地返嚟ok？」
 
小悠一臉不甘：「唔得！我都要整驚喜俾阿妹！」
 
「驚喜？咩驚喜呀？」
 
「話明驚喜點可以講架？總之…」
 
「你個衰妹抄我講野又要接唔到落去，柒唔柒啲？」
 
俾我串完之後佢更不甘：「總之！我今日唔返學！我要留喺屋企預備驚喜！」
 
以上。
 
至於佢喺屋企搞咩，睇怕要返到去先知。




 
好彩阿爸阿媽有幫間屋買保險。
 
萬一因為俾小悠獨留家中，而造成我同阿妹以後要瞓街嘅話，我實在…
 
諗緊呢啲無聊野嘅時候，Miss大叫我名：「高田帆！」
 
到我拎卷。
 
「進步咗好多，孺子可教也。」
 
我接過數學試卷，一時間手都震埋。
 
…努力，真係會有回報。
 




我坐返埋位，開始諗今晚應該點同阿妹慶祝。
 
「至於唔合格而需要補測嘅同學名單，已經貼咗喺出面走廊…」
 
結果，每一科嘅分數都俾上學年高咗一截，放學嗰陣我小心翼翼將所有卷放入書包，準備俾驚喜阿妹。
 
返到屋企，小悠好悠閒喺度食薯片。
 
我即時檢查成間屋，發現一切正常，冇穿冇爛。
 
都冇我想像中嘅氣球滿屋飛，或者大大個牌寫住happy birthday to阿妹嗰啲野。
 
我疑惑：「你成朝喺屋企搞咗啲咩驚喜出嚟？」
 
佢隊塊薯片入口：「好啦，見係你就話俾你知。」隨即指住廚房。




 
啲語氣得戚到佢……
 
我抱住懷疑行入廚房，一入去，一切正常，冇特別。
 
「邊度？」
 
「打開雪櫃睇吓？」
 
我照佢講嘅做，一個整得好靚嘅蛋糕出現喺我眼前。
 
「…好靚呀！」
 
屌！一時唔為意，將心聲講出口，小悠聽到一定仲得戚！
 




如我所料，佢蹦蹦跳跳走過嚟：「靚哩？我整得好辛苦架！」
 
「呢個蛋糕有冇名堂？」
 
「#&#&!&#$&%」
 
「吓？」
 
佢重覆：「#$&@#$&!?#$」
 
 「…你噏乜？」
 
「呢個蛋糕個名囉。」
 
…算，睇個樣應該係啲高級到冇中文名嘅蛋糕，所以小悠至會噏一堆外星話吖唔係，係外語出嚟。
 
「估唔到你真係識啲野架喎…」
 
「梗係啦！」
 
「你今日嘅sick leave請得真係值。」我俾隻手指公小悠。
 
「嘻嘻！係喎今日係咪派卷呀？阿帆你考成點？」
 
我立一吓頭髮：「呢啲濕碎野，梗係難我唔到啦～」
 
「咁就好喇！」佢拍拍手：「你嘅努力冇白費！」
 
「不過呢，有人數學就要補測囉。」
 
「邊個呀？」小悠天真地問。
 
我敲佢頭：「你呀！」
 
「吓？咩話？」
 
放學嗰陣，我喺走廊嘅補測名單上面發現小悠個名。
 
「我呢就甩難嘞，至於你就徘迴喺數學地獄多一個禮拜啦吓！」
 
「咩、咩呀！我嗰日因為太肚餓所以先至考得咁差咋。」
 
「重要嘅係結果，結果係你要補測，哈！」恥笑小悠果然係一件令人放鬆嘅事。
 
雖然嗰日食咗佢份早餐嘅係我，咳。
 
之後我見時候唔早，就趁阿妹未返，同小悠係咁咦佈置吓個廳。
 
搞掂嘅一刻，門外傳出鎖匙聲。