【全劇終】《我喺街執咗個失憶嘅女仔返屋企》: 統測篇：不悠閒的假日

好快到咗禮拜日。
 
十一點幾，我接過哥哥仔送嚟嘅外賣，入面裝咗我、阿妹同小悠嘅四人份早餐。
 
返學嘅日子，我嘅早餐通常有三種玩法，第一係啃麵包，第二係阿妹當日心情好嘅話，會煮俾我食，第三係我當日心情好嘅話，會煮俾自己食，而上述三種玩法嘅出現比率大概係5：2：1。
 
所以，唔洗返學嘅朝早叫吓外賣，絕對係種平凡嘅幸福。
 
食完早餐之後，我伸個懶腰，今日阿妹個fd會上嚟同我地一齊開全日讀書會，所以我決定珍惜朝早呢段可以鳩hea嘅時間。
 




點知5分鐘未夠，阿妹連我呢個小小嘅希望都想捏碎埋：「哥，我地一陣去超市買啲嘢食返嚟吖？」
 
我梗係唔會咁順攤：「又去超市？雪櫃冇嘢食喇咩？」
 
「得返啲零食咋，唔通今晚又食外賣咩。」
 
「我記得冇幾耐之前先買咗好多嘢食。」我走入廚房睇，果然除咗小悠啲零食之外，空空如也。
 
我走返出廳，睥向正喺度餵休比食嘢嘅犯人。
 




「明明尋晚仲有啲急凍嘢喺度，又會一晚之間消失晒嘅？」
 
「…咩呀？咁…我尋晚瞓唔著吖嘛，咪出嚟睇吓有咩食囉。」小悠正眼唔敢望我，淨係摸休比。
 
「遲早有一日連休比都俾你食埋…」
 
「你講呢啲嘢休比會聽到架！你會嚇親佢架！」
 
「係呀，休比一定會俾個咁大食嘅主人嚇親，仲會擔驚受怕唔知自己幾時會成為受害者。」我繼續嚇佢。
 




「我都係唔小心食咗廚房啲野渣嘛！你做咩屈我食休比呀！阿妹呀…」唔知幾時開始，當小悠唔夠我講嗰陣，就會叫阿妹幫拖。
 
而呢個時候，阿妹有80％都會幫住佢，又或者應該話唔會幫住我：「通常係自己潛意識想做，至會將嗰樣嘢講出口。」
 
言下之意，即係又係我錯囉…
 
「喂！我講笑啫！」最後我都係秒速投降，呢一類冇乜營養嘅對話已經逐漸成為我地三個人嘅相處方式。
 
廢話唔多講，總之講唔過佢地之後，我地三個人就出發去咗附近超級市場。
 
「阿帆！我可唔可以推車呀？」
 
我對小悠揮手，表示叫佢去。
 
可能係前世未嚟過超市，小悠依然好雀躍，對於呢種狀況我已經見慣不怪，反而阿妹仲保持到咁冷靜，真係令我有啲佩服。




 
而且，唔知個天係覺得小悠太可愛定係嫌佢未夠低能，至會安排大人size嘅車俾人攞晒，淨返嗰種俾細路過吓癮嘅迷你車。
 
小悠就咁推住架迷你車，衝上咗前。
 
呢個畫面，就好似我同阿妹呢對新婚夫婦第一次帶啱啱學識行路嘅bb嚟超市買嘢一樣。
 
咳，講笑啫。
 
「諗吓今晚食咩先。」我伸個懶腰向前行。
 
「你買還買都要睇價錢呀，你知而家差唔多月尾…」
 
「一陣洗多咗，阿爸又問長問短吖嘛。」
 




「你知就好。」
 
之後我同阿妹去咗睇乾糧，睇睇吓小悠突然衝埋嚟。
 
「阿帆！！！」
 
「咩事呀？」
 
「我可唔可以買零食呀？」雖然佢咁問，但架車已經放滿咗零食，而家即係先斬後奏咁話啦…？
 
我用眼神將問題射俾阿妹，阿妹望一眼之後，點咗吓頭。
 
即使阿妹同意，都唔可以俾小悠咁放肆，所以我答：「你是但揀三樣，其他嗰啲放返佢。」
 
小悠聽到之後扁晒嘴：「咁我樣樣都想食吖嘛。」




 
「冇得傾，揀三樣。」
 
「一係咁，我揀五樣？」
 
「三樣。」
 
「五樣啦，求吓你啦…」
 
「兩樣。」
 
「好喇好喇，三樣喇！」小悠一臉不忿咁放返車裏面嘅零食。
 
「哥。」我想監督小悠嗰陣，阿妹拉住我。
 




「嗯？」
 
「你而家講得未呀？究竟小悠係咩來歷？」阿妹細細聲問。
 
我環顧周圍，確認冇人之後答：「…我冇諗過你會而家問，但我未係時候講住。」呢句只係個大話，實情唔係我唔講，而係我都唔識講。
 
「你之前已經話未係時候，咁幾時先係時候呀？」
 
「總之，真係未係時候呀，你就當…」腦海高速運轉，尋找合適嘅答案，


 
「佢係一個我唔可以掉低佢唔理嘅人。」最後，我咁樣答。


 
「我唔係想講咩呀，不過，我驚阿爸問起我地點解洗多咗錢呀…」
 
果然係阿妹，佢提出咗一個非常現實嘅問題。
 
「如果阿爸真係問起，你俾我聽啦。」
 
其實錢方面，雖然我一直冇對小悠講乜嘢，不過某日食食吓早餐嘅佢突然間話大日一定會還返俾我…令當下嘅我無啦啦FF佢會唔會係個失憶落難有錢女，如果係嘅話，做咗佢救命恩人嘅我今舖仲唔發達…
 
不過妄想還妄想，呢一刻我仍然答唔出關於小悠嘅來歷係一個事實。
 
「多謝你一直以嚟咁信我，同埋肯接受小悠。」我諗咗一陣，就同阿妹講。
 
阿妹聽完，拎轉背睇罐頭。
 
雖然佢咩都冇講，但佢默許小悠買零食嘅舉動，某程度上已經證實咗我頭先講嘅嘢係啱。