【全劇終】《我喺街執咗個失憶嘅女仔返屋企》: 聯校宿營篇：終幕，然後初吻

小悠好似有啲驚訝。
 
「不過我太廢，問唔到佢啲咩，淨係知道佢應該係你搵返記憶嘅一個關鍵。」
 
 可能呢個事實對小悠太衝擊，佢過咗一陣先開口：
 
「阿帆你一啲都唔廢。」
 
「……？」
 




小悠顯然將重點放咗喺個錯誤嘅地方。
 
佢繼續講：「頭先我地嗰隊，最後就係得返你同會長兩個嘅名牌冇俾人搣，仲有呀，踩roller嗰次我知道你係快過會長架，我真係見到架。」
 
聽住小悠呢番夾硬嚟嘅安慰說話，我唯有無奈一笑：
 
「喂喂，你好似一啲都唔在意自己嘅記憶嘅？」
 
呢個時候，小悠俾外面嘅夕陽吸引，跑咗去兩步之外嘅窗邊。
 




「係日落呀！」
 
我跟隨小悠嘅視線望向窗外嘅景色，夕陽就喺我地眼前散發住橘色光輝，略帶金黃色嘅天空就好似一張畫布咁襯托在後，係一片市區絕對唔會見到嘅美景。
 
「…好靚。」我忍唔住讚歎。
 
「嗯。」
 
之後，小悠緩緩轉過身，問咗一個意味不明嘅問題：
 




「阿帆，你覺得我地嘅相遇…係咪一種偶然？」
 
「吓？你噏乜呀？」
 
「雖然我地識咗唔係好耐，但如果有一日你再見唔到我，你會唔會唔記得我架？」
 
佢問啲嘢愈嚟愈奇怪，我load咗陣至答：
 
「見唔到你？你指你記得返晒野之後？」
 
「嗯。」
 
唔知點解，我個心突然一沉：
 
「咁話晒我都叫喺你落難嘅時候幫過你，得閒出嚟食餐飯都得掛？唔會見唔到嘅。」




 
小悠沉默咗一陣，臉上掛起笑容：「又係喎可？」
 
「雖然咁講好老套，但我相信每一段相遇都有佢嘅意義喺度，我會努力記住每一個人生中嘅過客。」
 
「哈哈，估唔到你會講呢啲野～」
 
「而你，我知道一定唔會係一個過客，至少喺我以後嘅人生入面，我都想見到你。」
 
講完之後，我先發覺句嘢會唔會太似表白……
 
但我隨即鬆一口氣，畢竟眼前嘅係小悠，佢照計唔會get到嗰種意思。
 
「阿帆…」
 




小悠好細聲叫咗我個名，然後踏前兩步，好似想講啲咩。
 
下一秒，就發生一件我意想不到嘅事。
 
小悠俾塊爛鬼地板kick親，成個人失去平衡將我壓倒床上。
 
我地喺極近距離之下對望。
 
同一時間，唇上傳嚟一片柔軟到好似棉花糖般嘅觸感。
 
除咗嘴裏嘅士多啤梨味之外，鼻腔仲充斥住一陣BB油嘅香味。
 
我意識到係小悠身上嘅味道。
 
空氣好似凝結咗咁，我分唔清究竟過咗五秒、十秒，抑或係更長嘅時間，然後小悠突然起身，一句說話都冇講就跑咗出房。




 
「喂…」我想叫住佢，但叫唔切。
 
頭先…？
 
我一條友喺房直到其他人入嚟，腦海不停loop住剛才嘅意外。