【全劇終】《我喺街執咗個失憶嘅女仔返屋企》: 聯校宿營篇：POWER（上）

「不過，就算你女朋友點犀利都好，都唔會贏到羅凱撒。」
 
「等等，女朋友呢個稱呼…」雖然頭先解釋咗一輪，但似乎係嘥口水。
 
「羅凱撒呢個人為咗贏絕對會不擇手段。」
 
「你好似知道好多嘢？」
 
佢突然唔出聲。
 




「我聽講上年嘅聯校宿營係羅凱撒唔知出咗啲咩茅招至贏到，係咪真架？」
 
「我點解要同你講咁多？」
 
我突然間諗到，如果想知呢個羅凱撒究竟咩料，問長期同佢共事嘅駱以雪應該會係個唔錯嘅選擇。
 
加上，正好有樣嘢可以迫駱以雪就範：「頭先我應承組隊，而家到你應承返我啲嘢喇。」
 
「你想點？」
 




「我想知道多啲關於羅凱撒嘅嘢。」
 
一個咁守規矩嘅學生，我唔信佢會反口。
 
果然，駱以雪諗咗一陣就問：「你想知道佢啲咩？」
 
我慢慢坐低：「所有嘢。」
 
聽完之後，佢用一副狐疑眼神打量我，我即刻解釋：「你放心，我唔係Gay，我咁樣問係有原因。」
 




「你唔諗住對我解釋嗰個原因？」
 
「如果我答係嘅話，你就唔諗住講落去？」我反問。
 
駱以雪咩都冇答。
 
冇幾耐佢轉咗個坐嘅姿勢，開始由頭講起：「而家嘅學生會係上年連任，呢樣你知架啦？」
 
我點頭。
 
「POWER呢個閣係中四嗰陣羅凱撒話組嘅，佢搵咗我同另外三個人，就係你而家見到嘅學生會，同埋一個已經退咗學嘅女仔。」
 
我突然諗起上次集隊嗰陣張廷宇都有提過，好似話係外務秘書…？
 
「選得學生會嘅都係學校最top嗰班人，無論係成績抑或操行，加上羅凱撒阿爸係校監，而我阿媽就係家教會主席，所以POWER好順利當選…」




 
「等等，羅凱撒阿爸係校監？」仲有，我頭先係咪聽到啲咩黑箱作業…
 
佢點頭，然後好似識讀心咁：「不過，POWER嗰陣係靠票數贏，唔係你諗嘅黑箱作業。」
 
「之後呢？」
 
「之後一直都好順利，因為學生會嘅所有人都係以建設校園為宗旨，但即使目標一樣，唔代表處事手法都會一樣。」
 
「我冇估錯嘅話，跟住就發生宿營嗰件事，而且同嗰個女仔退學有關？」我唔知，不過頭先駱以雪嘅表情話俾我聽兩件事有關係。
 
佢猶疑咗陣，慢慢點頭：「上年宿營試過有隔離學校嘅人俾人推落山坡，雖然只係受輕傷。」
 
「係羅凱撒做嘅？」
 




「冇人知。學校嗰邊話無人機影唔到，所以只係當成一單意外，但我知道事實唔係咁。」
 
佢繼續講：「因為秋涵同我講，佢救起嗰個人之前，見到係著住我地校服嘅人做嘅。」
 
佢口中嘅秋涵，應該係退學嗰個女仔。