【全劇終】《我喺街執咗個失憶嘅女仔返屋企》: 聯校宿營篇：暴力副會長（下）

而且佢跑起上嚟都幾快，我出盡全力都係拋離佢少少。
 
跑咗一陣之後，我地離頭先嗰度已經一段距離，我諗佢應該追唔到阿妹架喇。
 
於是我停喺一棵樹隔離，諗住抖順條氣先。
 
點知駱以雪衝過嚟，一嘢扯住我衫領：「上次就話俾你捉字蝨，今次你冇得走啦？」
 
佢用力到幾乎將我成個人由地下扯起。
 




「喂…你個暴力女…」氣都未抖完又俾佢抆住，我有啲辛苦咁講。
 
佢聽到呢個稱呼之後，更大反應：「你夠膽講多次！」
 
既然我嘅目的已經達成，我就唔同佢糾纏落去：「…你睇清楚啲先啦。」
 
我舉隻手俾佢睇，佢見到之後終於放開我。
 
「…咁你頭先喺度講咩電話？」
 




「邊個話我講電話啫？自言自語唔得架咩？」
 
佢聽完之後面都紅晒，係俾人激嬲嗰隻面紅。
 
為咗令佢冷靜落嚟，我嘗試解釋：「見你咁認真，同你玩吓放鬆吓啫…哈哈…喂！！！」
 
笑都未笑完，佢捉住我戴錶嗰隻手用力咬落嚟。
 
「你覺得好好玩？」咬完之後佢睥住我講，我已經痛到出唔到聲。
 




相信佢係因為校規指明不准打同學，所以先會用咬嘅方式嚟襲擊我，咁樣諗嘅時候其實佢只不過係換個方法捉緊校規嘅字蝨…
 
當然，我仲未想死住，所以冇講出口。
 
呢個時候，又有無人機喺上方經過，然後帶隊老師把聲又喺唔知邊度傳嚟：「各位同學，而家係時間中午十二點正，我宣佈上午嘅山野攻防戰結束，請同學立即停止手上嘅動作，並到飯堂進行午膳。重覆一次…」
 
睇緊時間啱啱好，帶隊老師把聲救咗我。
 
「聽到未呀？停止手上嘅動作呀，你一郁當你犯校規呀。」
 
佢繼續用對眼睥行我。
 
「我去食飯先，你唔食呀？」雖然話就話有兩粒鐘食飯時間，但行到返去都冇咗半粒鐘，所以我決定唔再浪費分秒。
 
「頭先你累我地冇咗16分，呢筆數我下晝再同你計。」講完之後佢掉頭走咗。




 
…睇嚟我要好好珍惜食飯嗰兩粒鐘，下晝應該又有排煩。