【全劇終】《我喺街執咗個失憶嘅女仔返屋企》: 相遇篇：垃圾房的女孩（中）

我九秒九跑去對面便利店買咗20蚊3pack嘅繽紛樂，一支水同埋一把遮，再跑返垃圾房。
 
好彩個女仔依然挨咗喺垃圾桶隔離，望落仲係清醒嘅，只係有啲虛弱，我將頭先買嘅繽紛樂同水遞俾佢：「你快啲食咗佢先啦。」
 
佢慢慢打開包裝，雖然頭先俾我嘅訊息係佢好肚餓，但似乎連狼吞虎嚥嘅氣力都冇。
 
我企喺一邊，睇住佢食完3pack繽紛樂，然後問：「仲要唔要？使唔使再買？」
 
佢慢慢擰頭，之後好似想飲水，但扭極都扭唔開個蓋，然後粒聲唔出遞支水俾我。
 




「嗱。」我輕易地幫佢扭開樽蓋，再遞返俾佢。
 
佢飲咗兩啖之後咩都冇講，只係望住地下，表情有啲茫然。
 
我趁機會俾埋頭先買嗰把遮佢：「陣間唔知會唔會又落雨，你拎住旁身啦。」
 
佢依然咩都冇講，只係輕輕接過我買嘅遮。
 
既然佢睇落冇咩事，咁我繼續企喺度都冇用，況且出嚟咁耐，唔知阿妹會唔會擔心，於是我同個女仔揮揮手：「拜拜。」
 




佢仲係冇應機，場面變得極度尷尬。
 
都係早走早著好啲。
 
等等，以三九唔識七嘅陌生人嚟講，我頭先係咪做多咗，令到個女仔覺得好無言？
 
早知唔買啦……
 
可能個天真係好唔鍾意我，返去嗰陣突然落起雨嚟，我焗住一邊用手擋雨一邊跑返屋企。
 




跑緊嗰陣，充斥喺我腦海入面嘅，唔知點解係頭先個女仔流住眼淚嘅樣。
 
唔會無端端喊掛？我諗，九成九係我眼花。