你是一名在戰場上的無名士兵: 第13章 - 1

你想起一件很重要的事，「邊個係馬伕？」「你依家先察覺到呢個問題？慢咗少少。」一把看似熟悉的聲音從後方傳來。「你係咪叫奇諾？」你連將視線轉向後方也做不到。「正是。不過我對同你哋溝通呢種行為唔係太有好感，你無視我就得。」奇諾對你說。

「咁點解佢又可以周圍走嚟走去？」你對着那個總是在關鍵時刻出現的小女孩問。「咁係因為當一啲改變出現嘅時候，我哋要將佢引導返去原本嘅結果。」「咁你平時去咗邊？」「匿埋睇住佢。佢成日亂嚟，冇人睇住就好容易出事。」「你話邊個成日亂嚟？」她突然插嘴，「又嚟喇。我咪同妳講過，要諗清楚先好做嘢嘅？」「我！」她聽起來想要反駁，但馬上改變了態度，「對唔住。」

他們應該已經相處了一段時間，不然也不會指派這兩個相處不來的人到這裏。與其說是合不來，倒說是一個用心良苦的老師在教導一個反叛期的小孩。除此之外，奇諾似乎隱瞞着甚麼。他們這趟旅程對他們而言代表甚麼？在抓到目標後便是完結了嗎？還是回去後還有更多危險要面對？雖然你們在戰爭完結之後應該都不會再見，但你還是為這兩位不速之客擔心。

「啫係你一直都睇住我哋？」你問。「係。嚴格上嚟講，係睇住你。」他加重最後一個字。「我有咩咁重要？我嘅意思係，呢度有幾百萬人，有幾十萬人打緊仗，點解要睇我一個？」況且你現在有幾個月只能躺在床上盯着天花，到時戰爭也完結了吧？但愛利文帝國和加斯林帝國又不知為何開戰，你快要睡着了。

「個原因咪就係你自己囉。」他並沒有提供任何解釋，也許將來你會拖着這副廢掉的身軀做出甚麼事來，但你現在甚麼都做不到。另外兩人一直目瞪口呆，找不到加入的空間，「你哋好似好熟咁。」海迪路絲驚訝地說，「雖然凱倫同我講咗好多嘢，但係你好似仲知好多。」雪倫說得對你們的關係非常好奇。





「其實我都......」你支撐不住，再次陷入昏睡。

你一直都忽略了一點，假如傷勢不會復原，這一生等同完結呢？冬天快要降臨，而你的心也沉浸在暴風雪當中。

又不知道過了太久，你張開眼，發現繁星佔據了夜空。周圍一點人聲都沒有，只有車輪和馬匹低鳴着。「全部人瞓晒？」你用不大但在整輛馬車內迴響的聲音呼叫。不知道是誰的鼻鼾聲斷斷續續地回應。「你醒喇？」奇諾用低沉的聲音對你說。「係，雖然咁講有啲奇怪。我哋仲未到？」「應該聽朝就會到。你不如瞓多陣。」「我依家咁樣瞓同唔瞓冇乜分別。係喇，你哋唔可以用啲方法幫我回復原狀咩？」

「正常嚟講，如果你未死咩問題都可以搞掂。但係我哋要用最低影響嘅方式去捉嗰個人。況且......」他停下來，「況且咩？」說真的，這副身體形同虛設，你不但動不了，也感覺不到脖子以下的任何器官。你想望向他也不行。「我知幾個月好難捱，不過有兩個靚女陪住你應該冇問題。」他說出你最不想聽見的答案。

「係喇，喺出面嘅時候我哋會遮住你對眼，呢度啲太陽好晒。」他指的似乎不只是地方，因而引發你的好奇心，「未來嘅太陽係點？」「雖然唔係幾關太陽事，但係好熱。」「點解會變熱？」「自從一樣改變人類生活方式嘅元素出現咗之後，人類不斷利用佢嚟令生活變得方便。但代價係氣候改變。不過都係離依家百幾年後，甚至幾百年後嘅事。」「嗰個元素係咩？」「我講咗你都唔會明。」他特意回避你的問題，除了又是那個「天機不可洩漏」的禁忌，你認為他在暗示甚麼。





「你既然咁講，我都唔再問。」你閉上眼睛，「如果聽朝打開眼見唔到嘢唔好驚。」他用冷酷的語氣說出這句應是輕鬆的話。「遵命。」你大慨理解他不顯露情感的原因，他們雖然來自同一個地方，但經歷過的事定必大相逕庭。