你是一名在戰場上的無名士兵: Real - 第一章 - 2
「嗡嗡嗡......」你聽見小鳥鳴叫的聲音，帳幕擋住了陽光，但從門縫透進來的狹窄光芒告訴你天亮了。你搓搓眼睛後便站起來，其他人也到外面去了。你換回兵服，便離開營帳。
你一走出去，便看見所有人在列隊，羅傑斯隊長在台上說話。你心知不妙，馬上穿過人羣回到自己的位置，「唔好意思......唔好意思......」其他人用不滿的眼神看着你。
「各位，雖然尋日布朗斯帝國班賤人嚟偷襲我地！而我哋都有啲弟兄為國捐軀或者受咗好嚴重嘅傷，甚至有平民傷亡，我喺度代表你哋因為我哋嘅無能而受到牽連嘅所有人獻上最崇高嘅敬意。」羅傑斯隊長用右手掩着左胸，單膝跪地。然後他站起來，「不過我哋有一位勇士，諗咗個好方法令佢地撤退，佢就係劉巴奇士兵！......不過佢依家喺邊呢？」羅傑斯隊長對着整個軍隊喊話。
其他人明顯地對你剛才的行為有意見，聽到後便散開指着你。只有站在你旁邊的尼克停留在原地。「喺度。」「喺度囉！」「你哋知唔知當你用一隻手指指住我嘅時候，有四隻手指指住你自己？」你作出徒勞無功的反抗。「原來你喺度！請你上嚟先！」雖然羅傑斯隊長這樣說，但你雙手搭着尼克的肩膀躲在他背後。
「佢一定係因為我尋日自把自為，所以想喺所有人面前懲罰我。」你小聲地說。「劉巴奇！劉巴奇！劉巴奇！」你聽見整支軍隊都在呼喚你的名字，連在樹上的鳥都被洪亮的呼叫嚇走了。「呢班友......」你在心中苦叫。當你正在想要從哪個方向逃走時，你卻發現尼克轉過頭來，你和他四目相投。「唔好......」你不斷搖頭對他說。
「隊長！巴奇喺度啊！」尼克二話不說便把你招出來，然後將你推上前。「唔係啩......」你又苦叫。你也沒有其他辦法，只好硬着頭皮走上台。「巴奇！你喺度就啱喇。指揮官已經下令我地要開戰，但係依家我仲未諗到要攻打邊度。既然係咁，咁不如我哋就搵你出嚟決定喇好冇?」羅傑斯隊長喊道。
「我何德何能？我覺得隊長你係見我做到嘢，所以之後就算出事都可以搵我嚟祭......」你還未說完，羅傑斯隊長用一個接近抱有殺意的眼神看着你。「我......我講笑啫，隊長你梗係唔會咁做啦。我哋有咩選擇。」
「係嘅，巴奇先生。我知道你嘅計謀好出眾，所以我先嚟搵你決定去攻打邊個地方。我地依家有三個選擇。一，位於我地北面嘅安哥要塞。二，位於我地東面嘅安離留斯之城。三，位於我地東南面嘅哥施陰要塞。你覺得我地要去邊度?」羅傑斯隊長問。「呃，我覺得......」「咪住！」隊長打斷了你的話，「你要決定都要啲情報先㗎係咪?我依家同你地講下，」羅傑斯隊長接過一位士兵的地圖並將它展示。
「首先，安哥要塞有重兵把守，火炮齊備，不過佢位於山谷，我哋可以利用。
其次，安離留斯之城只有一般嘅兵力把守，但火炮設備都完整良好。
最好，哥施陰要塞完全冇人防守，淨係得啲平民，不過防護設備都好勁。」羅傑斯隊長說。「隊長，張地圖係咪啱？」你問。「你點解點問？」隊長質疑你。「張地圖幾時畫？」「二十年前。」
「咁你啫係玩嘢啦，特登整個局做我啦，大佬啊，邊有人打仗會用啲陳年地......」「最後一次機會。你再係咁，唔該請你即刻返鄉下同你屋企人耕田。」「係，唔好意思。咳哈。」你清了清喉嚨，然後看着地圖。「成二十年，我嗰陣都啱啱先出世，二十年都夠打完一場戰爭......」你看着毫無參考價值的地圖，決定隨便選一個。
「我決定好喇！就去打哥施陰要塞啦！」你充滿自信地說。「呃......唔......」「隊長，有咩問題？」「冇，我只想講係一個聰明嘅選擇。好啦！咁我哋就去攻打嗰度！」羅傑斯隊長猶疑了一下說。「咁我哋下晝出發，你哋要準備好。」羅傑斯隊長又說。
「劉巴奇，你可以落返去先。」你按着隊長的說話回到自己的位置。其他人用鄙視的眼神看着你。「做咩？依家係佢陰我，我先係畀人迫害嗰個......」然而其他人覺得你無藥可救，只是像看着瀕死之人般搖搖頭便繼續看着羅傑斯隊長。「咁依家我哋解散。三十分鐘之後請各位去練兵場熱下身。」
「遵命！」其他人便回去做各自的事。「你啱啱點解要咁講嘢？」尼克問。「首先，我唔知佢攞張同我差唔多年紀嘅地圖係咩意思。第二，我邊個都唔係，點解我會無啦啦決定啲咁重要嘅嘢？」你和尼克一邊走回營帳一邊說。「你呢個工作態度完全唔掂。」「咁你想我點？見到啲唔合理嘅嘢，但因為要「緊守崗位」就當睇唔到？」尼克歎了一口氣，「咁就證明你一啲都冇變。」「只可惜我能力唔夠。」你語重心長地回應他。
你回到營帳伸了個懶腰，「巴奇啊，點解你會去打嗰度?」尼克問。「因為嗰度睇落去好易打囉！」你開口大笑地說。「呃.......你認真㗎？」尼克很認真地問。「吓？」你充滿疑惑地回應。「你真係認真？」「點解唔係？佢張地圖錯啫，但啲情報應該唔會錯，佢啲情報啫係佢送自己人去死。」你說。「所以隊長啱啱係試你？」
「好明顯啦，佢由頭到尾都係想陰我。唔係我醒，我應該真係去咗耕田。」「真不愧係隊長。」
你整理好自己的物品後，便趁剩餘的時間圍着軍營外面跑步，好讓頭腦清醒一下。這裏是愛莉密斯之城，原本是位於四個帝國中央的中立城市。但自從和布朗斯帝國開戰後，這裏成了雙方必爭之地。而你們在數個月前攻下了它，以作為前線據點。至於進攻的過程就......
看着正在重建的街道，你希望戰事可以快點完結，但這只是愚昧的妄想，因為戰爭才剛剛開始。你們和布朗斯帝國對峙了一段時間，但都沒有甚麼大動靜，直至昨天的突襲。你留意着自己的每一下呼吸，非常沉重又拖泥帶水，彷彿虧欠了誰似的，然而你真的有。即使你不想記起，它仍然纏繞着你。