你是一名在戰場上的無名士兵: 第12章 - 8

「啊！」你打開眼看見一個木造的天花板，而你正在一輛馬車上躺着。「唔好郁。你一郁就會痛到想死。」你聽見雪倫的聲音。「雪倫？咦？點解我畀人綁住咗？」你被包帶和鐵鎖牢牢鎖緊。「真係唔好亂郁。」你聽見海迪路絲的聲音。「海迪路絲？我哋去緊邊？」

「喺講去緊邊之前，你聽咗兩封信先，不過唔好太激動。」你聽見一個小女孩的聲音，是凱倫的？「咩信？妳係咪凱倫？」「咔呼。」凱倫清了一下喉嚨，「第一封係尼克寫嘅。」

「巴奇，你讀緊呢封信嘅時候，場戰鬥已經完咗。而我哋雖然有損傷，但座要塞都攻咗落嚟。尼哥爾應該喺你後面㗎馬車一齊運送返嚟。我好多謝你一路都咁努力，特別係領導大家嗰陣。雖然你有時有啲亂嚟，但我知你係真心想報答國家。某個人就係邊個邊個嘅事我都知道咗，但我喺佢身上唔係真係攞到啲咩有用情報，最多係有幾個要搵嘅目標。但你咁嘅款都係做唔到嘢，等你返嚟先講。我會繼續留喺前線，至於其他嘅嘢，你睇完隊長封信應該就明。祝早日康復，尼克。」

「咩早日康復？」「第二位係由羅傑斯隊長寫嘅。」「副隊長，我諗你應該喺尼克伍長嘅信入面了解咗大概情況。係咁嘅，喺你暈咗之後，伍長帶嚟咗一個驚人嘅信息，就係愛莉文帝國同加斯林帝國互相宣咗戰。所以我哋依家積極咁處理緊外交問題，例如愛莉密斯之城應該點分之類。不過你唔使擔心，因為你已經光榮退役，你應該要接受嘅審判都取消，變做封爵。如果打完仗我會返嚟搵你聚下舊。祝早日康復，羅傑斯隊長。」「讀完。」

「咩光榮退役？你講笑？」你很想移動身體任何一個四肢，但完全動不了，你只能小幅度地移動頭部。「事實就係咁。」「唔要啊，我唔制！唔公平！」你像小孩子般淚流滿面，不斷大叫。「嗚啊啊啊啊啊！！！！！」「巴奇，有我喺度。」「仲有我。」雪倫和海迪路絲走到你旁邊。





「咁，咁又好似幾唔錯。」你把淚水停下來。「變態佬。」你聽到凱倫在諷刺，「依家係妳陰我喎！妳叫我打仗唔使理嗰啲死人嘢，妳同我講嗰隻怪物叫冇受影響？係原本就有？」你大聲地向着看不見的人說。「仲有，妳點解會喺度？唔通妳就係？」

「我處理完你嘅嘢咪去搵佢，有咩問題？」「啫係妳哋三個都知發生乜事喇。咁我瞓咗幾耐？」「兩日。」雪倫開始眼泛淚光。「見到你個樣，我以為你死咗......」

「老實講，唔講塊臉，同畀人綁咗喺稻草上面燒冇分別。」海迪路絲說。「我雖然好想喊，但應該喊夠。」「我想攬住你，但驚你會好痛。」雪倫抹掉眼淚。

「所以，我到底受咗咩傷？我唔係幾感覺到我啲手手腳腳。」「聽住，你嘅諗法基本上係冇錯，但電唔係你諗得咁簡單。啊......」凱倫好像在翻着甚麼，「當中就有好多複雜嘅理論，不過避免造成啲唔知咩影響，我都係簡單啲講。」「我諗妳係睇唔明咋啩？」

「總之啫係同你用手發射雷電差唔多，然後你除咗頭部之外全部燒傷，啲皮都冇埋。我都好好奇點解你仲未死。」「咁我係咪成世都要瞓喺度？明明我嘅人生先啱啱開始......」「係啊，你玩完㗎喇。」「妳講多次？」「妳講多次？」「唔好推，我講笑啫。」三人在車廂內推推撞撞。





「我哋返到去再幫你諗辦法。」雪倫靠在你耳邊說。「都係妳最好......」「喂，妳應該知道跟住會發生咩事同我點醫返好，快啲講！」「呢層就，天機不可......」「你老......！」「冷靜啲！」海迪路絲嘗試按着你，但因為怕弄傷你而作罷。

「總之，我哋返到去再講。」凱倫說。「我哋依家去緊邊？」「首都，奧姆城。」

「兩輛在路上行走的馬車，在陽光帶領下，展開了新的旅途。」凱倫像唱詩般說。「詩人，可唔可以醫返好我？」「雖然我好想......」「得喇，又講埋啲廢話。」

你本以為在接近全身被廢的狀況下，自己便可以從此遠離戰爭，但在首都等待的，卻是更大的陰謀。