你是一名在戰場上的無名士兵: 第12章 - 4

他拔出一把被耀眼藍色包圍的劍，光芒就像晶石般奪目。「蒼藍之劍？」「冇錯。我都估唔到另一把竟然就喺你手上，呢個簡直係天意。」如此一說，老闆是知道他擁有蒼藍之劍，才將它交給你的嗎？這些事遲點再想，目前最重要的是將他擊倒。

你拔出劍，劍就像燃燒殆盡的火般，只留下暗紅的餘光。這時候你聽見我軍的方向有些騷動，但你望過去又一切如常。「呢把劍都係冇變過。」尼哥爾撫摸劍。「呢兩把劍有咩咁特別？除咗比較重之外，根本只係一把普通嘅兵器。」

「只係你唔識貨。既然有三把同等嘅武器存在，證明佢哋會互相吸引，然後互相毁滅。」「聽你咁講，佢哋嘅價值唔係佢哋本身，而係佢哋可以引起一啲作用。」「冇錯。」「咁係咩作用？」「比起我講畀你聽，不如我哋親自試下。」

你和他做好一擊決勝負的準備，你以左手為主，右手為輔握劍，擺出刺擊架式。「哈.....」「哈......」「停手！」你聽見羅傑斯隊長的聲音，他正策馬跑來。雙方人馬立即過河，連躲在要塞門後的士兵也衝了出來。尼哥爾和隊長分別命令自己的士兵停下。

數千人包圍着你們三人，「老嘢，你咁樣係咩意思？」「你係咪真係知道自己做緊嘅嘢會有咩後果？」「喺講呢樣嘢之前，我記得戰書上面清楚咁寫明，如果有任何人喺分出勝負之前干擾，係要受軍法處置。」「我寧願用我自己嘅自由去阻止厄運降臨。」





你從來沒有看過隊長為了任何事，也在所不惜打破規則，他的神情帶着憤怒和恐懼，而你想知道他作出這個舉動的理由。「我唔認為只係失去自由咁簡單。」「咁你想點？」「一係你繼續畀我哋打落去，一係你哋撤退，咁我可以當冇事發生。但如果你要堅持嘅話.....」你從尼哥爾口中聽見緊張感。

隊長要阻止必定有他的原因，但勝負只是一步之遙，該怎麼辦？

「隊長，我唔明......」「副隊長你收聲！我哋收隊。」「至少講下......」「呢個係命令。」「唔通 -」「我就知道你會問點解。依家一係我帶住敗將嘅身份返去，一係你帶住叛國嘅身份受死。」「我想喺決定之前明白理由。」「好。你可唔可以叫你啲人散開，再放低把劍喺中間？」「可以。但你哋就要返去。」「冇問題。」

尼哥爾吩咐士兵退回河後，然後將蒼藍之劍放在地上。「副隊長，將把劍放喺佢對面。」「好。」你把緋紅之劍放在蒼藍之劍旁邊，羅傑斯隊長下馬並走到兩把劍前面。他拿起兩把劍，「呢個，就係前所未見，嚟自大自然嘅力量。」他將它們互相磨擦。

兩把劍發出「啪啪啪嘞」的噪音，而且有些小型的煙花，差點把人弄盲。他把劍分開，兩把劍之間形成了數道藍白色的屏障，而且聲音極為刺耳。「咩嚟㗎？」「好恐怖！」「好似落雷咁！」兩方士兵們紛紛討論神秘光芒，而你認為有人可以解答這些問題，但你不知道他們在哪裏。





「如果你哋啱啱撞埋去，我諗爆炸都似。」隊長將雙劍的背面磨擦，光線和聲音都停止了。「不愧係同過我師父交手嘅人。」尼哥爾緩慢地拍掌。「你師父？」「我相信你仲記得五年前發生嘅事。」「咁你應該慶幸我係一個守承諾嘅人。」「兩條地道我哋好快會整返好，多謝你哋幫手過嚟。」

「咁好彩你都肯放過我哋嘅人。」「大家咁話。咗係喇，可唔可以畀返把劍 －」氣氛突然變得極為嚴肅，「快啲畀把劍我。」你趁機向其中一個士兵問，而後方也把武器遞給你。雙方軍隊開始擺開陣式，要塞的門也隨之關上。「我諗我哋係咪有啲咩誤會？」你走到盾兵後面，「呢個係最後警告。」「你唔好唔記得，」隊長磨擦雙劍，「主導權喺我手上。」

「你好嘢。不過既然你有馬德嘅劍，我都有高立嘅盾。」「此劍非彼劍，咁你嘅盾係咪就係呢座要塞嘅祕密？你會死好多人。」「全部人退返入去！」尼哥爾和士兵們返回要塞，「隊長，咁我哋仲攻唔攻？」

「你覺得呢？」