你是一名在戰場上的無名士兵: 第12章 - 2

你衝上前，想試探對方的實力，但尼哥爾只是不斷避開你的攻擊。「做咩係咁避開？」你發狂般向他揮劍，但他都精確地閃開，「我冇講錯，你真係以為贏到啲卒仔，又或者有人幫，就認為自己好犀利。」

「你咁講係咩意思？」「咁囉。」他格開你的劍並一腳伸到你的肚子，你痛得退後幾步，但他又馬上發起攻勢。「好似你呢啲、」「亨！」「咁嘅人、」「亨！」「自大得嚟、」「亨！」「得把口、」「亨！」「可以贏到我咩？」你勉強地擋住他強烈的批判，並拉開距離。

「我同你第一次見面，十分鐘都未過，你有咩資格話我？」你忍着痛楚，一邊思考對策。「因為我睇落，你只係一個有好多人都冇嘅嘢，仲喺度怨天尤人嘅廢物。」「我咪講咗囉！」你再次向他衝去，並朝他的鎧甲刺擊。

「終於露出真面目喇......嗯？」當他想捉住破綻時，你在半路轉向左邊。「你做緊咩？喺度浪費體力？」他把劍指着你，你卻露出微笑，「你好快就知。」你擺出刺擊的姿勢，前腳彎膝，後腳伸直，然後像螃蟹般，慢慢地一步一步走向他。

「你到底想點？......」當他幾乎破口大罵時，彷彿發現了些甚麼，專注地觀察你的動作。你繼續這可笑的舉動，在這荒蕪的戰場上更顯得格格不入。你步步進迫，每走前一步，他便退後一步，在壓抑的空氣中，你自然地呼吸並準備抓緊他的空檔。





兩邊人馬都凝視着你們兩人，而他們都絲毫沒有想介入的意思，只是站在河邊一言不發。你認為對方已經看穿你的意圖，便飛身刺擊，劍尖和劍身的衝突就像蜻蜓點水，他利用衝擊力向後退，「正面唔夠打所以想出陰招？」尼哥爾在你重整態勢時攻擊，每一下都讓你非常吃力。

「佢講到咁，其實係咪仲未知我想點？總之第一步已經成功咗。」你不斷格檔他的攻擊，一邊尋找空間。「無論經驗、力量、劍術我都好過你，你點贏到我？」他的斬擊清脆而點到即止，速度不是一般的快。

「既然你講到自己咁勁，點解唔畀我睇下？」他的攻勢快要把你的手臂震斷，「再等多陣，好快就得......」你在防禦的同時觀察他的攻擊模式，一邊思考着最佳時機。「快啲畀我睇下，嗰個可以隻身潛入一座城，打倒格利得林大人嘅你！」「哼哼。」你在摸清他的路數後架開他的劍並退後。

「咩話？」「咁我想講聲唔好意思，嗰兩個都唔係我嚟。」「所以我咪話......」「但係！依家，企喺呢座要塞前面，同你打緊嘅係，貨真價實，冇加糖加鹽嘅我！雖然我唔知打唔打得贏你，但你唔使再講埋晒啲無謂嘢，因為你想要嘅我就喺你面前！」

「哈哈......真係估唔到你喺啲咁嘅情況都仲可以扮型。」「既然要講，點解唔講得型啲？」「你真係令我又憎恨又煩厭。」「唔好話你，有啲自己人都頂唔順我。」「夠喇，我地繼續。」他朝你橫劈，你跳後並閃開，他朝你直斬，你向右躲開，在你不能再閃開的時候，你們的劍對上，雙手就像在寒風中顫動。





但對手的力量明顯比你大，你在劍快要割斷手前放開，並決定主動發動攻勢。你從右上方斜劈，對方把你的劍彈開，在快要擊中的時候，你向右方翻滾，避開了致命一擊。

以往都是有別人的幫助，你才可以擊退強敵。但在獨身一人面對在各個方面都比自己優秀的對手時，你只想到一個方法。當然不是逃跑，士兵在戰場不應臨陣脫逃。雖然有些時間都需要隨風躍動、隨水流逝，但並不適合現在的情況。

試想想，你向別人提出單挑，但棄權的卻是自己，多麽怯懦？「你唔夠我打㗎，投降啦。」他轉向你，你站起來，「而我都知道有啲人會喺自己處於下風嘅時候勸人投降，避免自己實力唔夠人嘅事實曝露。」