你是一名在戰場上的無名士兵: 第5章EX2：未來的結晶 - 6

你們看準腳步，跳過一個一個的冰柱，雖然途中也有驚險的時候，不過終於到達了對岸。

看着洞窟的出口，你想着又要面對寒風，還是從正面而來寒風，便令你顫抖起來。

「真係好多謝你...」海迪路絲縮着身子說。

你向她微笑，「喺戰場我都唔知救咗幾多個人，我就嚟連救命之恩嘅意義都唔記得喇。」你帶着開玩笑的語氣說。

「不過都係嗰句，等我哋拎到個結晶先講啦。」你走向出口。





一走出來，便有白雪紛飛的大風吹過，而風比另一邊的還要強。

「講真，我差唔多連企都企唔穩，你要我喺啲咁嘅情況下行懸崖？」你用左手擋住迎面而來的雪。

「有一個好簡單嘅方法，一路紥住馬步一路行就得㗎喇。」海迪路絲走上懸崖的邊緣。

你也跟上去，雙腳已經沾滿了雪。

懸崖的邊緣是一個半圓，上面有冰牆擋着，不過最大問題是在飄來飄去的雪粉。





你往下看，望見一大片雪林，還能看見不斷分歧的道路。

「你肯定要向下望？」海迪路絲一邊打側身子向左走一邊說。

懸崖的邊緣非常窄，雖然仍夠人的雙腳站上去，但你背着的袋子就...

「嚟雪山點可以唔睇景呢？」你用右手拖着袋子走。

「都係嘅，不過我之前已經嚟過，都真係幾靚。」海迪路絲說。





「如果我可以整一樣嘢嚟停留呢一刻就好喇。」海迪路絲歎了一口氣。

如果要呈現景色，你唯一想像的方法是畫，「點樣唔畫畫又可以畀景人睇？」你問。

「要做一樣嘢一定有方法嘅，問題係你搵唔搵到個方法啫。」
「當然做一樣嘢有唔同嘅方法，但唔同嘅方法會需要唔同時間，帶嚟唔同嘅效果。」
「識畫畫同畫得好嘅人始終係少數，我想希望有一樣嘢可以令唔識畫畫嘅人都可以將人、事物、或者靚景保存。」
「如果你真係想嘅，可以學畫畫，但你要問下你嘅目標係咩，足唔足夠令你堅持。」
「如果你嘅目標淨係畫一幅靚景，咁畫完之後你就會失去動力，失去動力之後技術就會退步，最後咪又係徒勞無功。」
「做完一樣嘢唔代表完結，人生唔係戲劇，唔會兩個人向夕陽行就完，你要諗下點樣堅持。」
「打仗都係啦，你打贏一場戰鬥，你打完一座城唔代表完，直到對方投降或者消滅對方先叫完。」
「每樣嘢做做下就放低係唔會成功，唔係嘅話點樣發明嘢，又或者純粹實現自己嘅夢想？」
「戰鬥總有一日會完結，到時候我哋再講未來嘅事，但戰鬥未完都要一直打落去。」海迪路絲認真地說。

「拎住呢個，如果有咩事跌咗落去即刻用把斧頭插住牆。」海迪路絲給你一把斧頭。





在這一刻，你很好奇為甚麼剛剛海迪路絲不用這把斧頭，「咁你啱啱點解唔用？」你說。

「嗰個係冰柱，我諗住唔係到最後關頭都唔會用，如果唔係插爛咗，爬返上嚟都會跌返落去，但呢個係石壁。」海迪路絲向着左邊走。

你們剩下四分之一的路程，「啲雪真係好大。」你的視線差點被吹過來的白花掩蓋了。

突然一個大雪打中了你的眼睛，「啊！」你馬上嘗試擦掉雪，誰知你突然滑到了，「哇啊啊！」你正從懸崖掉下去。

你在想這是否就是你人生的終結，你想起雪倫，尼克，羅傑斯隊長，還有在軍隊中形形色色的人，那兩個人坐着奇怪載具的自稱未來人。

「原來人生都可以咁有趣。」你閉上眼睛迎接墜落。

「快啲用把斧頭插住塊牆啊！」海迪路絲大叫。





你張開眼睛，用在左手的斧插在牆壁，向下滑了一段距離才停下來。

「我要點上返嚟？」你問。

「你見唔見到牆上面有啲突出嚟嘅位？用右手捉住拉自己上嚟，再不斷重複。」海迪路絲繼續說。

你見到藍白色的冰冷牆壁上的確有些位置是突了出來的，你馬上用右手捉緊其中一個，然後開始爬上去。