相戀之時(偷懶中): 序章- 一覺回到16歲

「軒！要起身啦！」媽媽略帶責怪既聲音傳入我既耳入面。

自從畢業之後，我唔知道幾耐未聽過咁美妙既聲音。以前細過既時候，最憎既就係老母個把死人聲，尤其係佢叫我起身既時候。但係當你搬出去住，住係間又迫隔音又差既死人劏房入面，每人唔係俾隔離條仆街吵醒，就係俾冷冰冰既電子鬧鐘叫醒。個時你先會知道，老母把聲真係最好聽既仙音。

雖然好想再聽多幾次，但係尋日啱啱同班中學同學飲完酒，宿醉之後既感覺十分唔好受，再加上今日係星期六，唔使返工我訓多陣應該冇問題掛？

我用棉被蓋過頭，略帶撒嬌既語氣對門外大叫:「媽，好攰啊！俾我訓多陣啦！」

講完我就安安樂樂咁想繼續訓。但係，好快我就發現咗啲唔對路。我自從搬咗出去住之後，就再冇返過屋企。老母亦都冇我間屋既鎖匙，我個間50尺既劏房都唔允許老母係出面咁叫我。我即刻嚇到彈起身，一個既熟悉又陌生既環境映入我既眼入面。呢個係我訓咗18年既睡房，陳設同10年前一模一樣。滿牆既謝拉特海報，日曆掛係門上。床側邊就係我個張俾無數書本覆蓋既書枱。一落床就可以直接行出去，簡約，亂中帶序，卻係我最懷念既感覺。但係我黎唔切懷念我既過去，眼前既一切都令我覺得毛骨悚然。





我強行壓下心中既不安，擦咗擦額頭上唔存在既冷汗。心入面暗暗安慰自己：「冇事既，我發夢啫！冇事既，幻覺黎既啫！應該冇事既？」

我走到日曆前，清楚咁見到日曆上面寫住，2010年8月10號。5日後，係15號既格仔寫住「軒仔16歲啦」。

我大大力摑咗自己一下。我雖然好清楚，我，肯定冇發緊夢。因為我呢世一未曾試過好似呢一刻咁清醒。但係，我仍然接受唔到眼前既呢一幕。我接受唔到一覺過後我竟然返咗去16歲。

我向後退咗兩步，我直接跌咗係床上面，口中喃喃自語：「冇可能㗎！冇可能㗎！...」

（序章完）





「人生如夢，如真似幻，令人迷失其中」