一個香港留學生在美國的生活: 見工

阿欣搬咗去San Mateo Downtown火車站附近，San Mateo算係中高檔社區，西邊上山嘅樓都係二三百萬豪宅，唯獨是火車軌以東係比較差，大部分係墨西哥人，阿欣就係住響呢區，佢係同幾個朋友分租一間四房嘅屋。  

我大約六點左右去到接阿欣，見到間房真係嚇一跳，外牆又爛又舊，門口雜草叢生，Driveway上停咗部起碼三十年前破舊不堪嘅Toyota，附近絕大部份嘅屋都係差唔多，阿欣就一個人企咗響行邊等我。  

「你都好誇張，開架咁靚嘅車嚟接我。」阿欣一上車就串鳩我，「小姐，我Weekend先揸部波子，點知你呢度咁Ghetto，你無啦啦做乜搬嚟呢度？唔危險咩？」「呢區係舊啲，不過冇你想像咁差，呢度好多都係藍領工人同學生。」「咁你啲Roommates 都係學生？」「係呀，連埋我三個女仔一個男仔，都係中國人。」「吓？有一個男仔？咁都得？」「點解唔得？四間房兩個廁所，各自有自己空間。」傾吓傾吓，好快已經過返另一邊San Mateo Downtown，「搵位泊車先，等陣再傾，幫下眼搵位啦！呢個鐘數好難泊車㗎！」「咁快到？間餐廳響邊㗎？」「San Mateo Downtown囉，由你屋企行路半個鐘左右。」「咁近？係就好啦！近過我以前返越南舖，要坐公車先到！」「你睇吓間餐先啦，又唔係一定响呢度做！門口有位！泊車先！」  

呢間港式甜品店係三藩市都算幾有名，響San Mateo嘅呢間係分店，除咗甜品之外會兼做埋港式茶餐，我同老闆娘認識，耐唔耐都會幫襯。「Hello，幾位？咦？阿偉？今日帶埋朋友嚟食飯啊！坐呢張啦？」老闆娘今日響店度，店內裝修簡單，地方唔大，只有六張細枱，禮拜六晩飯時段唔算多人，除咗我同阿欣，就只有另外一枱一家四口香港人。Order完食物，我就問阿欣「你有冇興趣試吓響呢度做呀？」「呢度唔錯，不過人少Tips就唔多。」「呢度係夜晚先旺，好多人嚟食甜品。」「我其實冇所謂，反正近屋企，方便返工。」「咁我介紹你畀老闆娘啦！」  

老闆娘係一個五十歲左右嘅香港人，中失婚，有一個讀緊中學嘅仔，仲有一年就入大學。食完飯埋單嘅時候「老闆娘，呢個係阿欣，啱啱搬嚟附近，仲讀緊書，想搵份Part time做，我知道你要請人，介紹畀你。」「多謝你呀！阿欣？你叫我May姐啦！你聽日有冇時間？十點鐘見面傾？依家太多客人唔方便。」阿欣「可以呀！咁聽朝見！」