一個香港留學生在美國的生活: 行街

禮拜日朝早嘅三藩市非常清靜，車少行人少，我去咗KFC買外賣先返屋企，成晚冇返嚟瞓，電話竟然有五個留言，除咗Aaron有三個全部癈話錄音之外，一個係阿爸響英國打嚟，另一個係Heather。阿爸阿媽十一月嘅時候已經搬咗去London正式開始佢哋嘅新生活。阿爸打算返大學再讀書同追佢嘅音樂夢，阿媽就先休息一段時間再搵下有乜嘢可以做，話晒佢兩老其都係啱五十歲，退休真係太早，睇下時間，應該係London朝早，於是我先打畀阿爸。響呢個年代，我哋仲係用緊電話咭，不過太多數電話咭係針對中港台市場，一張打去香港有120分鐘嘅咭打去英國只有30分鐘，非常之唔抵。輸入一大串電話號碼同密碼後，終於聽到阿爸把聲，「仔，咁遲先打返嚟嘅？尋晚又去咗玩冇返屋企瞓？」「唔係吖！我等到你起身我先打畀你，你依家唔係朝早咩！」「我打嚟睇下你下個禮拜有冇時間飛過嚟過過聖誕節。」「唔得呀，我啱啱從新入紙申請工作簽證，唔出得境呀！」「係喎，咁我睇下明年我哋過嚟探你啦。」「阿媽呢？等我同佢講兩句。」「你阿媽一早去咗同啲舊同事食早餐，跟著去行街，下晝先返。」「咁早晨去搵同事？」「其實都打算話你知，你阿媽準同朋友夾份開補習學校，依家搵下啲舊同事睇下有冇人有興趣。」「勁喎！自己開學校！」「咁你阿媽仲後生，退休又真係好悶..」講到一半，發覺有電話入，「阿爸，我有另一個電話要接，遲啲再傾。」  

同阿爸收線再接聽第二條線「喂？」「Hello，阿偉？我係Heather。」「Sorry Heather，啱啱返到屋企聽你個Voice Message，正準備打畀你。」「我想話你知我下晝三點響Union Square有個Appointment，完咗睇下幾點再約食飯。」「咁就約響Union Square附近食，反正我都想去Union Square行下。」「我去Shopping，你又啱？」「乜有話男人唔可以Shopping㗎咩？」「哈哈！咁又冇，如果你唔怕悶咁咪一齊囉。」「咁等我食少少嘢先，兩點先大堂等。」  

匆匆忙忙咁食完啲舊炸雞，換返件衫跟住講落樓同Heather𣿬合開車去Union Square，「你個appointment喺邊度㗎？」「你泊去Stockton停車場啦，我要去Neiman。」Neiman Marcus等如香港嘅連卡佛，屬於比較高檔嘅百貨公司，入邊買嘅都係名牌手袋同高級時裝，珠寶首飾。三藩市呢一間屬於旗艦店，連埋地牢一共有五層，地牢嗰層就係男裝部，其實我都成日響呢度出入，所以都算熟路。泊好車我同Heather沿着Stockton斜路行去Neiman Marcus，琴日啱啱落完雨，雖然今日天晴，但係氣溫仍然非常之寒冷，我又頸巾又手套包到隻糭咁。臨近聖誕，店舖櫥窗都係聖誕嘅裝飾，好多人都趁住呢兩個禮拜出嚟購物，四周圍都係人山人海，呢段時間買嘢其實就好似打仗咁，遇到減價貨，你可能仲同人搶先買到。  

入到去Heather就帶着我直接行去Customer Service Counter，原來嗰度已經有個manager企咗響度等緊佢，個manager一見到佢就走上來同佢打招呼「Good afternoon Ms Heather，Welcome to Neiman Marcus！」我終於知道佢個三點鐘嘅appointment，原來係約咗Personal Shopper服務！