一個香港留學生在美國的生活: 港女

幫完Heather整隻窗，返到屋企已經成四點，做埋啲公司手尾差唔多夠鐘去接個香港學生妹，經歷過今日朝早個上海妹，我對呢個自稱香港留學生有少少期望，睇相又算幾吸引，加上年紀比較後生，衰極都有限，即本去會一會佢啦。  

個女仔叫做Gigi，住響Sunset 25街夾Balboa附近一個in-law單位，其實就係非法改裝車房再出租，響三藩市中國人業主非常之普遍，我開車去到嘅時候已經七點，早就天黑，好彩冇再落雨，我搵咗一輪先搵到個響兩間屋中間十分隱閉嘅鐵閘入口，撳鐘冇耐就有個女仔行出嚟，「Hello，你係Gigi？」「Hi，係呀，你係John？」「係呀，答應帶你去食飯吖嘛，你想食乜嘢呀？」「係咪食乜都得先？咦，跑車喎！乜嘢車嚟㗎，好靚喎，你好有錢㗎？」「你連係乜嘢車都唔知，你又知係靚車？」「認得出嗰啲係普通車，認唔出肯定係貴嘢！」  

Gigi衣著同樣貌都非常港女feel，我幾肯定係香港土生土長，一身名牌貨，年紀應該啱啱入大學，十八到二十左右，扎住條馬尾，化咗個淡妝，仲有淡淡嘅香水味，「不如你帶我去食日本嘢吖？」「食日本嘢都得，不過你又唔係我女朋友，有乜著數先？」「咁你陪我行街睇戲食飯，我咪做你一晚女朋友囉！」「係咪做女朋友愛做嘅嘢先！」「知啦知啦！」我笑一笑大腳踏油門，架Boxster「轟」一聲向前衝「吖！」Gigi嚇咗一跳，「帶你食好嘢呀！坐隱啲，帶安全帶呀！」跟著我直接去Japan Town。  

冇錯，又係返去Japan Town食呃鬼佬大陸人開嘅日本餐，儍嘅先會帶條靚妹食兩百蚊一個人嘅sushi bar，泊咗架車響地下停車場，Gigi好主動咁拖住我隻手，小鳥依人，上到去一樓，又係人山人海，所有餐廳都要排隊等位，最後Gigi揀咗食迴轉壽司，Waiter話要等大約半個鐘到九個字，「不如去行下街先啦，我唔想企響度等咁耐。」J Town除咗餐廳多之外，仲有好幾間賣日本精品毛公仔化妝品電器之類嘅店舖，我同Gigi行咗陣，當然少不了賣啲小玩意畀佢，又同佢去咗夾公仔，Gigi最後仲夾到隻賤兔公仔。  

我係第一次食迴轉壽司，以我所知三藩市應該就只有J Town呢一間，我一早就有心理準備會好難食，到坐低真係食落口先知有幾恐怖，除咗舊魚質素差唔新鮮冇魚味，連舊飯都係又凍又硬，我試咗兩舊已經冇哂胃口，反而Gigi食得好開心，前後食咗十幾碟，不過埋單都唔洗一舊水，算係咁。  



「點呀，食飽未？食飽去隔離睇下有冇戲睇？」「都好喎，我未係J Town睇過戲。」J Town入面就已經有間小型戲院叫做Kabuki，平時有唔少香港人響度睇戲，不過當我地去到嘅時候已經全院滿座，冇辨法，禮拜六晚好難即場買飛，於是我問Gigi「既然冇戲睇，不如送你返屋企？」「咁行啦！」跟著佢又好自然咁繞著我隻手行去攞車。