一個香港留學生在美國的生活: 補償（1）

禮拜五一早返到學校，響canteen終於見到Aaron，條友一個人響度食緊早餐，「喂！等阵放學去唔去做gym，跟住同Joey去睇戲啊？」「你約你個Joey，做乜次次都拉埋我落水？」「一世人兩兄弟，有好嘢梗係益埋你啦！」「好心你啦，自己女朋友都已經過咗嚟，仲日日出去滾，你小心啲遲早出事呀！」「你放心喎，我有分寸！」  

我當然冇話俾Aaron知道我夜晚約咗Addie去我屋企練琴，食完飯之後Aaron就直接去咗Café搵Joey，我就去咗超級市場買餸煮飯。自從同小詠分開之後我已經好少喺屋企認真咁煮返餐飯，啱啱同小詠住埋一齊嘅時候都仲會花啲心機整吓啲浪漫二人晚餐，我已經唔記得對上一次係幾時認真咁煮返餐飯，難得今晚屋企得返我同Addie兩個人，於是我決定買返兩塊牛扒今晚煎。買完餸返屋企差唔多三點，阿浩同小詠已經開咗車出三藩市，我好快咁將今晚嘅食材清洗好，一個沙律一個湯再加塊扒，簡簡單單。  

Addie好準時四點鐘就到，我着住條圍裙開門「打攪晒！」「歡迎光臨！屋企有啲亂，唔好介意呀！」Addie入到屋四圍望，「得你一個響屋企？我對鞋放喺門口？」Addie今日着住一件一字膊黑色冷衫，紅色格仔短裙加一對短靴，「放喺門口，鞋櫃有拖鞋，你自己隨便，我去廚房整埋少少嘢就可以開始上堂。」「咁我唔客氣啦！」Addie到自己一個人行咗去客廳，我行返入廚房煮埋個湯，冇耐就已經聽到鋼琴聲，我抹乾手除咗條圍裙，靜靜咁行去Addie身後聽佢練習，Addie係一個非常認真嘅學生，名副其實係嗰種香港名女校乖乖女，口響佢背後望住佢又白又滑嘅頸同膊頭，真係有個衝動想一口咀落去！正當我胡思亂想，「阿偉，呢一首我彈成點啊？我仲係覺得我彈唔到首歌應該有嘅箇中感覺！」「哦！呀！我啱啱先行過嚟，冇好仔細咁聽哂全首，不如你再彈多次呢？」Addie又再從頭彈過，我搬張櫈坐響隔離，專心開始同佢補課，唔經唔覺就過咗差不多兩個鐘，外邊天已經黑哂，「你其實已經彈得好好，pass就一定，可唔可以Merit就要睇臨時表現啦！你自己休息下，我煎埋塊扒就有飯食！」  

我去廚房開火煎扒，湯同沙律早就整好，唔洗十五分鐘已經有得食，Addie走過嚟幫手擺枱，「嘩！好似好好食喎！估唔到你煮飯咁勁！」「煎扒有幾難吖！方便快捷！」「我同Kevin都唔識煮飯，平時都係我Roommate煮先有住家飯食！」「其實我平時都好少煮，大部份時間都係買外賣或者出去食。」放好哂食物，坐低準備開餐，Addie就問「有冇嘢飲呀？」「你想飲乜？雪櫃有果汁有汽水。」「吓？食牛扒唔係飲紅酒嘅咩？」「我有酒，不過你掂唔掂㗎？」「飲少少ok嘅！」我屋企最唔缺就係酒，我響酒櫃摷咗支比較輕身嘅Pinot，雖然唔多配食牛，不過相對容易入口，適合女仔。  

Addie好有興致咁睇住我開酒，仲問咗我好多有關紅酒嘅知識，「你問咁多嘢，睇嚟你平時都有飲開紅酒喎！」「飲過幾次咁啦，我Roommate好鍾意飲，佢開酒我咪飲囉！」最令我出奇嘅，係成支紅酒我飲咗三分二，Addie飲咗三分一，竟然冇事，塊面紅都唔紅！食完飯執枱，佢仲打算幫我洗碗「過門都係客，等我嚟啦，用洗碗機好快，你去睇陣電視先，我好快過嚟！」「麻煩哂！咁請問洗手間響邊？」「響走廊轉左直行，響你左手邊。」Addie去廁所我就繼續收拾廚房洗碗。兩個人嘅碗碟唔多，唔洗十分鐘乜都已經攪掂，轉頭行返去客廳仲未見到Addie，唔通仲響廁所？我唯有去廁所睇吓佢有冇事。