一個香港留學生在美國的生活: 假期

自從呢一晚之後，我同Addie通過兩次電話，佢話想休息下，本來我想再約佢出嚟，不過佢都拒絕咗！到咗廿二號飛溫哥華，我地都冇再見面。  

到咗溫哥華已經五點，今年係第一次阿傑自己開車嚟接我機，佢女朋友Joanne都有嚟。今次我響Vancouver唔需要住小詩爸爸屋企，因為阿傑買咗樓，阿傑同Joanne已經住埋一齊一段時間，屋唔算大，一般兩房Condo，一間睡房一間書間，我就瞓書房。阿傑同Joanne都係啲讀書勁人，後來佢哋結婚搬去Toronto，攞埋PhD響大學教書。佢地間書房跟本就係圖書館，三個大書架仲要前後兩層放滿書，有兩張書枱兩部電腦，根本冇床，「阿傑少，你唔係要你大佬我瞓地吖嘛？定係你用啲書切張床畀我瞓？」「唔會！我有張氣墊床，等陣吹氣就甩得！」「唔係呀！咁阿爸下阿媽過嚟點瞓呀！」「佢都唔會住呢度啦！肯定住黃Uncle屋企。」其實我有諗過住黃Uncle度，不過始終住響自己細佬度點都方便啲，而我內心入邊有啲抗拒，怕見到小詩尷尬，就好似上次響Seattle見到小詩同佢未婚夫，我心入邊仲有啲好唔舒服。  

雖然話我有啲想逃避見小詩，但係嚟到溫哥華就點都冇可能唔同黃Uncle一家食飯見過面。就響平安如果一晚，黃Uncle請咗我同細佬Joanne三個去佢屋企食飯，小詩同佢老公阿Ben就去咗日本台灣旅行，小事上個月同Ben結咗婚，原來佢已經懷孕四個幾月，預產期係下年嘅六月，聽到呢個消息，我竟然有啲失落嘅感覺，畢竟我同佢之前有過一段曖昧嘅關係，聽到佢要結婚生仔，個心點都係哽住哽住。  

餘下嘅假期我都係響加拿大過，阿爸阿媽臨時決定飛過嚟陪我同細佬過新年，正如阿傑所講，佢哋飛過嚟肯定會住喺黃Uncle屋企，所以2001年嘅新年我哋係一家人聚埋一齊渡過，本來我打算一月初就飛返三藩市，但係因為阿爸阿媽過咗嚟，我哋一家四口再加上Joanne，安排咗一個road trip，由Vancouver開車穿過Rocky Mountain去到Calgary。沿途經過Kamloops 同 Banff，之後又上咗去Jasper睇冰川，前前後後差唔多玩咗兩個禮拜，結果我要到差唔多開學前幾日先返到三藩市！  

返到三藩市第一件事唔係返屋企，而係要去搞間屋嘅裝修。Joe通知我話我間新Condo裝修師傅有問題要問問我意見，咁我唯有飛車去工地先啦！去到工地裝修師傅話我聽原來廁所水喉位同圖則上有啲出入，需要作出更改，唔係乜嘢大件事，只係原本我選好嘅洗手盆就要換過另外一個Model， 經過一輪溝通，問題就已經解決！大廈已經開始有人搬入嚟住，我睇一睇我間屋，啱啱開始裝修，成個工程大概要三到四個月先可以完成，如果我畢業後搬出嚟，今年暑假應該可以入伙。  



當我離開嘅時候，我響大堂竟然又撞到Heather，佢又係一個人同個裝修師傅一齊，Stewart又唔響佢身邊，今次我只係同佢打咗個招呼就各自離開。我攞車嘅時候，電話響起，原來係阿漢打嚟：「響邊呀？」「新屋！」「咁啱？我以為你響屋企。」「啱啱由溫哥華返，落機冇耐！」「食唔食飯呀？」我睇吓錶，六點未夠，「好呀！返正得閑，小玲呢？」「出嚟先傾，今晚得我一個。」我同阿漢就約咗響Chinatown 食港式茶餐，「我同小玲分咗手啦！」「預咗啦！咁你自己搬咗出嚟？」「都係響Japan Town 附近，我同小玲係和平分手，各奔前程，有需要我都會照顧佢。」「搵到工未？」「搵到啦，銀行Trainee，都係Downtown。」「Good luck，Bro！」「Thanks！」  

2001年係好特別一年，身邊朋友好多已經畢業投身職場，有人結婚有人生仔。今年，將會開始我人生新篇章。