一個香港留學生在美國的生活: Stewart

估唔到響售樓大堂阿漢會碰到熟人，阿漢嘅朋友睇個樣係混血兒，高大靚仔，拖住個一睇就知道係香港嚟嘅女仔，正響門口同另一個Sales攞樓盤介紹，阿漢「喂Stewart！咁啱嘅？」「咦！阿漢？又碰到你！」「我陪朋友睇樓！你呢？」「我諗住買個單位比Heather，佢依家響Downtown返工，住呢區比較方便！」「真係廿四孝男友！呀！唔記得介紹，呢個係阿偉，啱啱做咗業主，呢個係Stewart同佢女朋友Heather，係我大學認識嘅朋友，不過Stewart係讀Master，已經畢咗業！」我同Stewart禮貌性咁握手，之後我同阿漢行去攞車，阿漢問我「你知唔知道Steward係邊個？」「咪你朋友囉！」「佢係Chris同Andrew嘅朋友，出哂名嘅花花公子，小詠件事佢都有份，Joe都知道，佢冇同你提起過Stewart呢個人？」我沈默咗一陣「你講起我依家有印象，Joe有提過，除咗Chris之外，呢個Stewart有份攪過小詠！」「Stewart玩過好多女，佢應該唔會記得小詠，我估小詠應該冇同Stewart有任何聯絡，佢更加唔會知道你係邊個。」「有冇聯絡都唔關我事，我同小詠已經分咗手，佢同乜嘢人上床已經與我冇關！」話就係咁話，不過呢一刻當我知道Stewart冇份玩過小詠，我心入面始終有啲唔舒服。「咁佢隔離條女又係乜水？」「Heather唔係佢啲SP，係真正嘅正牌女友，好似已經定咗婚添，不過Heather都知道Stewart響出邊玩，有錢吖嘛，又高大靚仔，咁咪隻眼開隻眼閉囉！」  

行到去停車場，阿漢又話「Heather都係高材生，Stanford畢業，依家響大行入面做Trainee，如果佢搬咗入嚟，咁就做你鄰居啦！」「我買咗呢個單位唔代表我一定會響度住！可能出租呢！」「點都好，可以同靚女為鄰都係唔錯嘅，哈哈！」第一眼見Heather嘅感覺係好李嘉欣Feel，真係有八成似，同我差唔多一樣高，由頭到尾佢都冇同我地打個招呼，成個冰山美人，拒人於千里。 

之後嗰兩日我冇約人，大部份時間都留響Joe間屋入面，一個人出去食咗兩餐好嘢，一個人做Gym，唔需要應酬，又唔使讀書上堂做功課，一個人靜落嚟嘅時間其實都可以好好享受。到咗禮拜一，我去咗銀行處理埋啲文件同手續，跟住再返返去售樓處完成埋最後簽約，等到棟大廈裝修好可以入伙，我就可以搬入去住。離開售樓大堂嘅時候，又碰到帶我睇樓嗰個經理，佢主動過嚟同我打招呼，跟著同我講「嗰日你另一個朋友都買咗個單位，就響你樓上Penthouse！」我突然間有啲好奇，於是我問個Manager「我可唔可以參觀下個Penthouse？」「可以！當然可以啊！都未正式交樓！」於是個Sales Manager帶咗我上頂層最大最豪華嘅四房Penthouse參觀。  

我買嘅兩房單位大約千五尺，Penthouse呢就差唔多四千尺，有上下兩層，一樓係客飯廳廚房同一間書房，二樓有三間房同一個室外陽台，價錢當然差好遠啦！不過如果要我畀咁嘅價位，我會去其他區買獨立屋好過！  

個Sales Manager知道我同Joe阿爸係相熟，我又好爽快咁買咗樓下個兩房單位，以為我仲有興趣買多個Penthouse，於是不停咁Sell我「呢棟大廈一共有四個Penthouse單位，要唔要睇吓其他唔同間隔同方向？」「哦！唔洗啦！我都係隨便睇下姐！」呢個時候，有另外幾個人入咗嚟，我轉頭一睇，原來係Steward未婚妻Heather。