一個香港留學生在美國的生活: 報復 （1）

禮拜五中午食完晏之後我同小詠開車一齊出三藩市，呢一日約咗小玲同阿漢食飯，順便會計畫講咗好耐嘅Napa Trip。我同小詠嘅事，除咗Aaron同Joe之外，大部分人都唔知發生乜事，而小玲同阿漢就估到啲，感覺到唔同，但係我哋唔講佢哋又冇問，反正大家當冇事囉！  

我同小詠之間嘅交流比以前少咗好多，經過咁多事，可係一種默契吧，有好多嘢大家唔問唔講總比攞出嚟嘈交好。出三藩市一個多小時嘅車程，絕大部份時間都係聽歌，過Bay Bridge嘅時候小詠終須開聲「今晚瞓邊？」「Joe屋企，佢去咗旅行，八月中先返，間屋冇人。」「咁都好，小玲屋企太細，唔係咁方便。」「如果你有其他朋友想見，唔洗一定住響Joe屋企。」我講完之後有啲後悔，咁樣講其實真係撩交嗌，又好似好小氣咁！點知小詠聽咗冇出聲，只係望住窗外風景，唔知道諗緊乜。  

到達小玲屋企嘅時候差唔多四點，當我地見到小玲同阿漢嘅時候，又好似冇事一樣，談笑自然，就好似以前咁，「好快喎！禮拜五冇塞車？」阿漢問，「好順呀！揸咗一個鐘多啲已經過橋，Local又唔多車。」「唔攰就出去啦！小玲等小詠陪佢Shopping！」「咁行啦！唔好太夜！」「行李呢？」「我地今晚去Joe度瞓，聽日返入去！」於是我地四個人一架車去咗Union Square，兩個女人一齊行，我同阿漢就響後面跟著！「你同小詠係咪嘈交？」「點解咁問？」「直覺！」「冇嘈交喎！」「表面上冇嘢，不過我估你地應該炒過大鑊，總之感覺上你地兩個同以前唔一樣！」「咁你都睇到？真係世事都畀你睇透！」「貌合神離呢啲嘢，有心注意就好易發現！唔係個個好似小玲咁乜嘢都懵下懵下！乜都唔知！不過咁有咁好，人生少咗好多煩腦！哈哈！」「你冇睇錯，我地算係半分手中。」「你發現咗？」其實Joe早經同我講過阿漢係第一個發現小詠偷食「你知道啲乜？」我扮唔知咁問「你唔洗咁望住我，其實好早已經有好多Rumor，就連我都響街見到小詠同啲唔應該出現嘅人出現。」「睇嚟真係通哂天，我係最後一個知！」「算啦！又唔係過人世！玩下咪算囉！認真你就輸！」「其實我依家冇嘢！回復自由身！」「哈哈！學下我同Joe咁！唔好為一棵樹放棄成個森林！」咁我同Joe都知道阿漢一直有背住小玲偷食嘅，只不過冇講到出面姐！「如果你玩懨咗小詠就話我知！」阿「你有興趣咪去馬囉！」「哈哈！講下笑姐！佢同小玲咁好姊妹！」  

行咗兩個鐘，兩個女人已經買咗四五袋戰利品，睇吓錶差唔多到食飯嘅時間，我地訂咗七點王將，老闆留咗間細房畀我地，坐低之後我哋就開始計劃Napa Trip，對我嚟講，最重要係酒「我提議禮拜五晚入去，禮拜六全日參觀酒庄，至於食、入面大把好餐廳，住嘅地方我冇乜所謂，你地有乜提意？」小玲：「酒庄阿偉你決定啦！我最想係訂一晚French Laundry食飯。」「French Laundry我都想去，啱啱先買咗Thomas Keller本Cookbook！好想去試下！」阿漢就話「咁就訂禮拜六晚French Laundry，至於住，我提議住vacation rental 又或Winery，有好多Winery連住宿，好正㗎！」「咁我搵Winery順便問下，有好嘅就訂埋住兩晚！」就係咁，我地決定八月第二個weekend去Napa Wine & Dine玩個三日兩夜！  

食完飯開車先送阿漢同小玲返屋企，之後再同小詠去Joe個Condo，回程路上又變返相對無言。泊好車上到屋入面，我直接入Joe間房放低背囊，跟著同小詠講「我今晚瞓Joe張床，另外兩間房你隨便揀，我沖涼先！」「今晚你唔陪我？」「我有啲攰，沖完涼先再講！」之後我轉身入房預備沖涼，呢個時候電話響起…