一個香港留學生在美國的生活: 面對

返到咗Joe屋企已經差唔多中午食飯嘅時候，Joe少啱啱起身「瞓到咁晏先起身，琴晚做賊啊？」「你就做賊！無啦啦走咗出去瞓，你去咗邊度過夜啊？」返嚟之前我其實已經諗好晒故仔點樣同Joe講，所以我諗都冇諗就答佢：「我琴日一個人開車行Hwy1落咗去Santa Cruz睇日落，太夜唔想開返嚟，咪求其搵間酒店過夜喎！」「係真唔係呀？」「呃你有錢分咩！」「咁你依家好啲未，心情有冇好啲？定係仲放唔低呀？」「冇啦！心情平靜，冇嘢係放唔低嘅！我哋之間嘅問題已經唔係第一日，Aaron都提醒過我班印尼仔有問題，係我冇上心，自己攞嚟衰！唉！」「咁又唔係咁講啦！正所謂姣婆守唔到寡！牛唔飲水唔㩒得牛頭低！呢個女人唔要得啦！」「我明白，等我諗諗點處理先啦！」「仲要諗？飛咗佢啦！」我冇再出聲，好多時候兩個人之間嘅感情唔係外人可以明白，明知留住個人都留唔住個心，但係就死唔放手！我對Joe苦笑一下，拖住疲勞乏腳步，慢慢行返入房。  

可能Joe都知道要比啲空間我，所以佢冇再入嚟煩我，我攤響床上望住天花板，諗返起過去幾日發生嘅事，好似發咗場夢咁，本來平靜嘅生活，已經變得不一樣，原本計劃好嘅將來變得未可知，我應該點樣面對，真係越諗越心煩，諗諗下，冇耐就瞓著咗，瞓咗冇耐，Joe就拍門叫醒我「兩點啦！食唔食晏呀！餓死人啦！」睇下個鐘，原來已經咁晏！於是匆匆忙忙起身洗個臉，就出去同Joe食Lunch，Joe成餐飯冇再提起小詠，食完飯已經差不多四點，我就同Joe講「我返入去啦，問題始終要解決，過兩日再聯絡。」「保重啊兄弟！唔好睇唔開！我唔捨得你呀！」「屌！你顧掂自己先啦！」  

沿住Hwy80，一路開車一路聽住Leon最新專輯眼睛想旅行，其實我真係好想去旅行散心，除咗同阿爸阿媽去旅行之外，好似好耐冇自己同朋友去玩，又諗到仲有冇機會同小詠一齊去玩呢？個心就有啲痛，點解到依家仲會諗住同小詠一齊？我真係放唔低咩？越諗越覺得自己犯賤，又唔係自己錯，又唔係冇其他女，點解就係放唔低呢？諗下諗下，已經返到屋企條街，正常人都應該轉入Driveway開Garage泊車返入屋，我今日竟然響間屋外邊兜咗幾圈都冇入去，因為我仲未知見到小詠要用乜嘢態度講，要講啲乜，其實講到尾就係犯賤冇撚用....  

「屌！你真係冇撚用！」Aaron用手指督住我個頭係咁鬧！好彩Café入面冇其他人，除咗老闆之外Joey今日都冇返工。「返到自己屋企都唔夠膽入去！仲要走嚟Café，你得㗎啦！咁大頂綠帽你都仲忍得，所有男人嘅架都俾你丟光晒！」「我都唔知點解，兜咗幾個圈就嚟咗呢度，可能我真係唔想面對掛！」好無奈咁笑咗幾聲，「早啲返屋企面對面講清楚，你都想知件事前因後果，分定唔分，點都要解決！」Aaron難得好正經又有條有理咁同我講！  

最後我都係扮曬晒肚餓，叫咗個下午茶餐，食埋先返屋企！要面對明嘅問題德總要面對，返到屋企，見到只有小詠架車響車房，；阿浩應該唔響度，我泊咗車行入屋，大廳冇人，我放低鎖匙銀包，直接行入我同小詠間睡房。雖然外邊好猛太陽，不過房入面就了漆黑一片！我慢慢行去床邊，雙眼開始適應黑暗，隱隱約約可見到床上小詠身影，佢背對住門口方向冚住被，我行到埋床邊佢都冇反應，於是我背住佢坐響張床，我坐低咗冇耐，小詠轉身望向我「返嚟啦！」「唔！」之後大家沉默咗一陣，「對唔住！」我冇反應，應該係我唔知應該點反應，小詠見我唔出聲，於是爬過嚟從後面抱住我「對唔住，可唔可以將以前嘅嘢抹咗去，我哋從新開始？」「你覺得呢？你覺得我可以高當乜事都冇發生過？可以咩？」我開始有少少火！而小詠終於忍唔住叫喊住話「咁唔錯都錯咗，咁你想我點？我都唔知點解會同班衰人玩埋一齊，我控制唔到，我唔想㗎！」「我早早已經叫你唔好同班印尼仔一齊上堂，你有聽咩？依家玩到咁大，你叫我當冇件事？你當我係儍仔？」「我唔會再同班印尼人玩唷啦！唔含會上同一圭堂！」「哈！比我捉到應就先話唔見！咁Chris呢？你唔好同我講你唔知係邊個！成個三藩市都知！」小詠聽到之後完全靜晒，「點呀，你有冇嘢想講？定係你又想話你唔想，又係唔知點解會去搵人？」等咗陣，小詠終於開口「對唔住！我真係知道我好錯，比次機會我，當係比次十機會大家，從新開始好唔好？」小詠從後打攬住我，雙手伸入我衫入面，其中一隻手扣插入褲頭摸我細佬，呢個時候我突然有種厭惡感，完全唔想同小詠有任何身體接觸，我一手推開佢「我地替暫時分開冷靜下，我會搬過去書房瞓！」之後我起身離開。